Press "Enter" to skip to content

BREAKING NEWS: One Championship Ah Ṭial Cung Thang A Kir Ṭhan Cang Lai!

Chin mi nih MMA arfi kan i ngeihmi Ṭial Cung Thang cu caan saupi aa dinh hnu ah February 11, Bad Blood: One Championship puai ah kan hmuh ṭhan lai. Miphun dang nih Ṭial “The Dragon Leg” Thang tiah an hngalh mi, Myanmar MMA arfi hi Indonesia MMA ṭhuat thiam Sunoto he an i ṭhua lai. Ṭial Cung Thang he aa celh ding mi Sunoto hi One Champioshio ah voi 10 teinak a hmu cang mi a si.

Ṭial Cung Thang hi professional MMA a luh hnu puaithum tiang ah sungh a rak tong lo. Sinain, nikum July 2021 ah khan Korean MMA ṭhuat thiam Min Jong Song nih round 3 an i celh hnu ah judges pathum biakhiahnak in a rak tei. Hi hnu hin caan saupi aa dinh rih hnu ah a ra lai mi February thla ah lente i celh ṭhan ding in One Championship fb page nih an langhter.

Ṭial Cung Thang ca ah atu tan puai hi a biapi ngai mi puai pakhat a si kho. zeica’h tiah Bantamweight i ranking hmu kho ding le Champion taisawm cuh kho ve ding cun a peh deuh in teinak a hmuh a hauh caah a si. Aa celh hmanung bik i a rak sungh cang caah Champion kho ding cun atu tan puai hi cu sungh a rem ti lo tluk a si.

Hi lio ah Ṭial Cung Thang he aa celhṭi ding Sunoto hi hmuhton a ngei tuk ko nain, kum 36 mi a si cang lengah One Championship a luh hnu in voi 7 a sung cang. Aa celh hmanung bik pathum ah voihnih a sung mi a si. A ngakchiat lio tein Taekwondo a thiam mi a si i, Indonesia ram chung hmunkip ah teinak tampi a rak hmu cang mi a si. Kum 2013 khan One Championship he minthutnak an ngei i, Indonesia mipi nih arfi bantuk in an i zohthla ve mi pakhat a si.

February 11, 2022 One : Bad Blood puai ah hin Ṭial Cung Thang lengah One ṭhuat thiam minthang dang Ken Hasegawa le Muay Thai ṭhuat thiam Jonathan Haggerty zong an i tel lai. Main Event ah Bantamweight champion Bibiano Fernandes champion taisawm cu John Lineker nih a cuh lai i, Co-Main Event ah Heavyweight champion sui taisawm(interim champion) Anatoly Malikhin le Kirill Grisenko nih an i cuh lai. Ṭial “the dragon leg” Thang le Sunoto “The Terminator” hi puai onnak(a hmasa bik) ah an i ṭhua lai.

Be First to Comment

Leave a Reply

Your email address will not be published.