Press "Enter" to skip to content

Breaking News! SAC Ralkap Helicopter Hakha A Phan Than Cang Ee

#Breaking News! Kalay in SAC Helicopter pakhat Hakha a phan țhan, niam tein a zuang i Rungtlang lei a panh tiah theih a si.

Tutan a rak zuang thanmi nih hin thilri le hriamthil a phurh lai tiah zumh asi. Credit: The Chin Post

Relchap; Aa Herh Cio Mi Minung Ah, Laimi nih kotho in ngeih mi nunphung, holhnak hmanh ah “Mi le mau hram” ti kan ngei. Tlamtlin lonak tampi a ngei mi minung, puicimh zawttlak, zawtfah temtuarnak, ngaihchiatnak le lunglawmhnak a tong kho mi minung kan sinak nih minung hi khat le khat aa herh dih mi kan sinak a fianh.

Bawmhchanh kan ti mi zong hi phun tampi a um ko lai. Suingun chawva in siseh, thiamnak in siseh, tha le zaang in siseh, pekchanhnak in siseh, herhnak cung hngat in a tam lengluang lai. Cucu Pathian nih kan nun he sengchih in a kan pek mi minung nunphung a si.

Mi le mau hram tlaihtleng kan ngeihnak zong hi har caan ah siseh, lawmh caan ah siseh i chemtonh le dirpi ti khi a si. Hi ruangah chiatnak nakin lawmh ni ah mualpho a fawi khun. Kan Lai nunphung ah Laimi nih lawmh ni kan ngeih caan ah “Sa phawt hrelh caan, misawm/kawh hrelh caan ah “i thlathlauh/muikhum” kan ngeih mi hna hi khat le khat aa herh mi kan sinak nih a hrin mi nun he a sengtlai mi dawtnak in uhtanhnak khi a sullam cu si.

Aa herh cio mi minung cung ah “Dawtnak lungput he tuah mi thil le upatnak in tuah mi thil hi” a sunglawi khun. Ka ngakchiak lio ah a ka hringtu ka pa nih a rak ka ti bal mi cu, “Dawtnak le upatnak he an in pek mi thil paoh cu lunglawm tein cohlan thiam na zuam lai. Hnahchawl ro hmanh laksawng ah in pe hna sehlaw, cucu a sunglawi,” a rak ka ti bal.

Dawtnak hi thilri man in tuak ahcun khiah awk a tha lo mi a man sung hmuhpiak khawh a si lo. Pheh awk a tha lo mi kan sifah harnak nih mualpho in a kan chiah tikah i pheh awk a tha lo, cohlan a hau. Cohlan khawh lo ahcun mi le mau hram nun hi a thlau ding in kan um.

A poi mi cu, Chiandeih nih Zute bawmhnak a herh bantukin, Zute zong nih Chiandeih bawmhnak a herh ve ti kan hngalh lo hi a si. Kan thazaang le ngeihchiat tlukruan lonak ah si loin “dawtnak” in a luang mi pekchanhnak “man” in tuak a hau. Anih nih cu zat in a ka bawmhchanh i kei zong nih cu zat in ka bawmh ve a hau ti mi ruahnak hi kan i herhnak phihkharnak a si lo, thangchuahnak a si.

Tlawmte a pechan mi hnuchit riangmanh i tampi a pechan mi cung lawng ah lungawi hmang mi lungput cu, a thiang mi dawtnak ngei a si kho dih hnga lo. Aa herh cio mi minung ah kan khap tawk cio in kan i dirpinak, ngaihchiatpinak le lawmhpinak cung i lunglawmte cohlan thiam/khawh tuhi, thil kal ning deuh a si hnga lo maw? Cu si loin herh lo mi minung hnuchit kan dih ahcun vawlei hi a buaithlak tuk hnga teh! Salai C. TT

Be First to Comment

Leave a Reply

Your email address will not be published. Required fields are marked *