Press "Enter" to skip to content

BREAKING NEWS : Thantlang Khuapi A Kaang Ṭhan Cang Ee!

BREAKING NEWS : Thantlang A Kaang Ṭhan! Thantlang khua cu nihin February 25 chun ah a kaang cuahmah ṭhan, tiah theih a si. A kanghnak hi Palek sakhan thlang ah a si i inn 7 hrawng a kaang cang, tiah mi pakhat nih The Chin Post ah chim. Credit; The Chin Post

Myaung Bo Tauk Tun(MBTT)/MRA Nih Avoi 12 Nak Training An Liim: Sagaing ramṭhen, Myaung peng ah Maung Bo Tauk Tun(MBTT), Special Force Army nih a voi 12 nak training limnak puai kan tuah khawh, tiah Myaung peng mipi vengtu ralkap nih nihin February 25 ah cathanh an chuah. Training limnak puai ah a rak kai kho mi dohthlennak hruaitu pawl le dohthlennak tuahtu dihlak cung ah kan i lawm, tiah an cathanh ah an langhter.

Training limnak puai ah Myaung Revolution Army(MRA) in an hruaitu ralbawi Sein Kyaw le Pengkip Pah-Kah-Phah phu in rianngeitu hna nih biachimnak an ngei. Training chung ah laksawng a hmu mi mipi vengtu ralkap pahnih cu laksawng pek an si i khua mi zong nih upatpeknak ah pangpar an pek hna, tiah theih a si.

Kachin ramkulh, Puta-O peng Suanpian khua cu ralhrang nih vanlawng in voihnih bomb an thlak ruang ah khua mi minung 1000 leng an zaam i atu hi facang le eidin tirawl emergency in an herh tuk, tiah khuachung mi nih an chim. Suanpian khua in rianngeitu pakhat nih, “Kan khua ning in harnak kan tong ko, cuhlan bantuk in facang kan rial ngam lo, facang zong kan la ngam ti lo, facang le meh haang, eidin tirawl emergency in kan herh tuk hringhran,” tiah a chim.

Suanpian khua cu ralhrang nih February 3 zanlei Sml-4 luan ah ah vanlawng pahnih in bomb an rak thlak i February 22 zing Sml- 10 tluk ah voi 2 nak bomb an rak thlak, tiah theih a si. “A voi 1 nak bomb an rak thlak ah hin kum 12 ngakchia le kum 50 mi nu pahnih le kum 18 nu pakhat cu hliam an rak tuar i Myitgyina siizung ah an thlop hna.

Cu leng ah Suanpian khua he meng 3 hrawng aa hlatnak Siankat (Bon) tlang ah a um mi SAC ralhrang phu hna cu KIA le PDF nih an doh hna i SAC ralhrang hna cu vanlawng nih a bawmh hna caah Suanpian khua mi hna cu voi 2 nak ah ral kan zaam hi si,” tiah Puta-O khuachung in rianngeitu pakhat nih cun a chim.

Ralhrang le KIA/PDF kar kahdohnak cu a faak chin lengmang i Puta-O peng ummi Lungsian(လုံရှာယာန်), Insian(အင်စီယာန်), Phatma(ဖက်မာ), Suanpian le Tancia(တန်ဂျာ) khua pawng kiangkap ah kahdohnak fak piin a chuak. Cu kahdohnak ruang ah cun khua mi hna cu fingtlang le ramlak ah an ral an zaam, a cheu cu Puta-O i an chungkhat hna sin ah an zaam i eidin tirawl an ngeih lo caah emergency in bawmh an herh tuk, tiah ralzaam bawmtu phu le khuachung rianngeitu hna sin in theih a si.

Credit : The Chin Post

Be First to Comment

Leave a Reply

Your email address will not be published.