CDF-Kanpetlet Pasaltha Hna Nih Ralkap 57 Kan Thah Hna Tiah An Thanh

Ralhrang 57 kan thah hna tiah CDF-Kanpetlet nih a thanh! 2022 March 7 – Chin ramkulh, Kanpetlet peng le Magway ramṭhen, Saw peng chungah January 23 in February 28 tiang ah kahdohnak voi 9 a chuak i ralhrang 57 an thi, 26 nih hliamhma an tuar tiah Chinland Defense Force-Kanpetlet nih March 6 ah thawng a thanh.

Kanpetlet peng, Masatwi,Swelwekyin,Kyindwe le Mawchaw khua pawng hna ah thlahnih chungah kahdohnak voi 5 a chuak. Saw peng ah voihnih, Apawna khua le Kanpetlet khua chungah voikhat kahdohnak a chuak. Kahdohnak ah CDF-Kanpetlet in mipi hriamtlai pakhat nih a nunnak a pek i ralhrang nih hriamngan in kah ruangah Kanpetlet mipi pakhat a thi tiah an langhter.

Kahdohnak pawl ah PDF-Saw, YDF, Kyauk Htoo, CDF-Daai, CNA le CDF-Kanpetlet hna an i bawm tiah theih a si. Ralhrang pawl nih Mawchaung khua inn 4 an hrawh lawng si loin an thilri pawl an firpiak hna. Masatwi khua ah sia pahnih an thah, pakhat an ei i pakhat an kalpi tiah thawngthanhnak ah an telh chih. Crd; The Chinland Post

Russia nih bom tamtuk a kah caah Ukraine khua pawl ah mipi sing tamtuk an tap. 2022 March 7 – Russia nih Ukraine ram khua tampi ah hriamngan in dinlo a kah lengmang caah khua tampi ah mipi sing tamtuk an tap. Russia nih hriamngan (missile) le bom in a kah lengmang caah mipi aa khawngdengmi le thimi an karh chin lengmang i a thi lomi zong mangṭam an tong deng cang.

Chaklei Ukraine, Kyiv khua pawng Irpin khua mipi hna cu an ngeihmi thiltom hna, fale hna, innzuat saram hna cawi pah in ke in an zaam tiah theih a si. Asinain, zarhpi ni (March 6) ah ralzaam pawl an tliknak lam, Irpin khua leng ah hriamngan a tlak caah pa, nu le hngakchia tampi an thi tiah a hmu mi BBC ah an chim.

Nichuah lei Ukraine, Summy khua ah a ummi India siahngakchia pakhat nih rawl ka ei lonak zarhkhat a si cang tiah BBC ah a chim. A ngeihmi protein dip pawl kha hawhra he cawh in khua ka sa tiah a chim. Chaklei tiva kam pawngah a ummi Mariupol khua in a zaami hna zong mei um lo, lumnak um lomi vawlei tang khaan chungah zarhkhat chung tap a si cang i eiawk vialte a dih dihnak kong zong BBC ah a chim.

Mariupol khua ah a tapmi hna chanh dingin an timhnak hi ni 2 a si cang nain a tlamtlin lo caah sau deuh an tap cun mipi hna caah thinphang a si. Cun Russia nih a kahmi hi mipi le ralkap lei thleidang loin kah thlorh in a kah dih tiah a hmumi nih BBC ah an chim. Russia nih Ukraine a kah ni 10 a tlin hnu ah Ukraine mipi a zaammi hi singkhat le cheu leng an si cang.

Russia nih Ukraine mipi lei ah a tu nak fak deuhin a kah lai tiah Ukraine President nih ralrinnak a pek hna. Russia hi Ukraine khuapi chungah a ummi sehzung pawl kha tinh in bom thlak le hriamngan in a kah lengmang caah tinhmi ngei tein a kan thah a si tiah Ukraine President nih a chim.

“Mipi hna nih an zaam lo a ngah ti lo, zaamding dirhmun kan phan cang. Mipi himnak ah an zaamkhawhnak hnga a lam ka sial piak hna lai timi biakamnak a um ko nain a tak ah a cang kho lo. Mipi dawtnak si loin thi tu a luang” tiah Ukraine President nih a lungfahnak a phuan. Nitlak lei ram hna i chawleh lei khamnak nih Russia thinhunnak a khamkhawh lo hi a fiang tuk tiah President Zelenskyy nih a chim chap. Ref: BBC, The Chinland Post