CDF-KKG Le Ralhrang Kahdohnak Ah Ralhrang 7 An thi
Kalaymyo Chaklei Kahdohnak Ah SAC Ralkap 7 An Thi, Kalaymyo chaklei Pyindaw Oo khua pawng hrawng kahdohnak ah SAC ralkap 7 an thi tiah CDF-KKG nih nihin April ni 5, ah cathanh an chuah.
Kalaymyo chaklei March ni 31, ah Nansaungpu(နန်းစောင်းပု) khua in a chuakmi SAC ralkap, pyusawhti phu le CDF-KKG kar Pyindaw Oo thlan hmun ah suimilam 3 chung kahdohnak a chuak tiah an langhter.
Cu kahdohnak ah cun SAC ralkap ruak 7 hmuh a si i MA 3 kuanbawm pakhat, 5.56 kuan zun 20, nam pakhat le ruksai telh in SAC ralkap hmanmi thilri zeimawzat kan laak tiah CDF-KKG nih an langhter.
SAC ralkap hna cu TCDF, CNDF, PDF Kalay, HNB, CR, PDA, pahkahphah, CDM Siyin le dohthlennak tuahtu ralkap phufonh nih an doh hna caah kaphnih kar kahdohnak a fak chin i SAC ralkap nih hriamngan le ral tuknak helicopter hmang in kahdohnak an tuah tiah an langhter chih.
Kaphnih kar i kahdohnak ah CDF-KKG in ralkap pakhat nih hliamhma a tuar tiah theih a si. April ni 1, ah hmunhma thianhfelnak tuah lioah MA 3 kuanbawm pakhat le 5.5 kuanfang zun 8 kan laak chap tiah an langhter.
April ni 2 le 3 ah kaphnih kar kahdohnak a chuak ṭhan i SAC ralkap hna cu fak ngai in hliamh an si caah, SAC ralkap nih vanlawng in voi tampi kahdohnak an tuah.
Atu ah SAC ralkap hna cu Nyaungkone khua phungki sianginn le Pyindaw Oo khua pawnghrawng ah minung thazaang tam ngai in umhmun an khuar i an umnak khua pawng hrawng ah minung thazaang i ṭhen in rallam an sial caah caan rikhiah um loin kahdohnak a chuak ṭhan kho tiah CDF-KKG nih nihin April ni 5, ah cathanh an chuah.
