Press "Enter" to skip to content

CDF-Mindat In Kahdohnak Ruangah A Mit Aa Hliam Mi Hein Phyo Wai Cu Phaisa Tampi Bawmhnak An Pek

CDF-Matupi In A Mit Aa Khawngmi Hein Phyo Wai Cu Rupee 23,000 Bawmhnak An Pek/ Sikpar [November] 06, 2022_CCN Channel/ Kahdohnak hmun ah bomb hmanhmi i pah sual ruang i a mit pahnih in a cawmi Hein Phyo Wai (Kum 17) cu mipi minung 26 hna nih Zalen sin in 795,200 kyats bawmhnak an pek tiah theih a si.

A luancia ni 5 ah khan Zalen nih video file thil chih in CDF-Matupi ralkap Hein Phyo Wai caah bawmhnak an rak hal. Cu bawmhnak a chuakmi cu Nihin Sikpar 6 ah anu he an umnak ralzam camp hmun pakhat ah tlamtling tein kan pek khawh cang tiah Zalen nih a langh ter.

”A Pa nih kum 3 a rak si lio in a thih taak cang. A tu kan umnak pawng hrawng ah le rian ṭuan ding a um lo. A tu cu amah Hein Phyo Wai pawng ah um peng ka hau cang i zei hmanh ka ṭuan thiam ti lo. A tu bantuk kan har tuk lio caan te ah mipi nih dawtnak he tangka nan rak kan hlut i kan i lawm tuk hringhran. Pathian tu nih thluachuah in pe ko hna seh,” tiah a nu nih a lunglawmhnak a langh ter. Cherhchan: Zalen, CCN

Relchap; November (Sikpar) November (Sikpar) Chuankhan ngei lo in kawhauh mi thla a si ve. Romulus Calendar c. 750 BC ah thla rel pakuanak ah a rak chiah a si. Latin holh “Novem” in lak mi biafang a si i “pakua” sullam a keng. Cucaah thla rel pakuanak rak chiah a sinak zong a si.

Lai nithla rel ning in “Sikpar” tiah chuankhan ngei tein kawhauh a si. Zeicahtiah a Sikpar ah cun van a thiang, khua cuanh ah khuaza a lang, van a fim, lung a leng, laimi (miphun chim duhnak si loin “minung” ti duhnak) cu van chim lo ramsa thlaidor sakhi tiang hmanh nih an lunglen an celh lo ti duhnak. Khuasik a tla cang, dap a tla cang i mi a kirh cang.

Chum nih Nika um awk hngal lo in a tuah caan, ni mui hmuh lo a tam. Rian le khai lei in chim ahcun, lo facang tuan ai lim, ruuk le haan chiah mi rawl phorh le cheek caan a si. A cheu thak-bere (hmathak) cing pawl ca ah pawl bongh liopi a si. Sikpar a nuamh khunnak cu, Pheikalh tunh a nuamh caan a si. Zuu-sa a ei lo mi pa pawl zong Pheikalh tunh nuamh cu thei tuk hna kaw, ngakchia in upa pipi tiang pheikalh tunh caan a si.

A cheu sianginn kai lio ngakchia pheikalh tunh ca ah zing arkhuang in mau-cher tom vaan bu he pheikalh luah siloah ven ah kal a si. Khuasik lak ah zingkhuan in dapti lak le bua lak ah pheikalh luah cu a fawi lo, sinain a nuam kho tuk. Pheikalh tunh kho lo nunau rual cu tiva kal dahlo rian ngaingai an ngeih lo caan a si. Christmas thla phak lai si kaw, Christmas caan i ngaihnak nih November thla dongh a fawiter, cucaah “Lo Vurmar” thla tiah an ti phah. Crd; Salai C Twintwin

Be First to Comment

Leave a Reply

Your email address will not be published. Required fields are marked *