CDF+ PDF Fonh Hna Nih Ralhrang Tam Tuk An Thah Hna
Magwe ramṭhen, Saw peng, Kyaukthu khuapi ah aa chok mi SAC ralkap phu hna cu PDF-Kyaukthu le CDF-Mindat i fonh in an kah hna i SAC ralkap 7 an thi i, hliam an tuar mi 8 cu helicopter in an laak hna, tiah Kyaukthu PDF nih a chim.
March 8 zinglei Sml 8:30 hrawng ah Kyaukthu palik sakhan in khuachung ah ralveng in aa chok mi SAC ralkap 20 hrawng cu Kyaukthu PDF le CDF Mindat hna i bawm in, bomb lung 3 in an puah hna i hriamhme in an kah chap hna caah SAC ralkap 7 an thi; minung 8 hliam an tuar, tiah theih a si.
Cu lio ah cun Kyaukthu palik sakhan in bawmtu an rat khawh lo nakding caah Kyaukthu khuapi palik sakhan chung ah hriamngan in an kah hna. Sakhan chung ah aa hliam mi le a thi mi an um le um lo fiang in kan thei kho rih lo, tiah Kyaukthu PDF nih an cathanh chung ah an langhter.
Cu hnu ah helicopter pakhat in SAC ralkap bawmtu a ra i hriamnam pawl zong a run thlak hna lengah hliam a tuar mi hna cu a laak hna. Kyaukthu ralkap sakhan in a ra mi Tank 2 cu Kyaukthu Bank Zung pawng ah an dir i micheknak an tuah lengah Kyaukthu khuapi chung ah Tank in an duhnak poh an kah. Kahdohnak a chuahnak pawngkam um mi, sualnak ngei lo nu 3 le pa 2 hna cu SAC ralkap nih an tlaih hna, tiah Kyaukthu PDF nih cathanh an chuah. Credit: The Chin Post
Moengyein University ah umhmun a khuar mi ralhraang hna cu Nanma PDF nih an kah hna i ralbawi pakhat tel in 12 an thi, March 8, 2022, Kachin ramkhulh, Moengyein University ah umhmun a khuar mi Council ralhraang hna cu March 8 zing suimilaam 3:00 hrawng ah Nanma PDF nih an kah hna i ralbawi pakhat tel in 12 an thi tiah Nanma PDF nih an thanh.
Nizaan Moengyein le Nanma kar kahdohnak i a thi mi PDF hna ca ah phu kan hlam mi a si i Nanma PDF lei hliamtuar kan um lo tiah an thanh.
March 7 zinglei ah Kachin ramkulh, Moengyein peng Nanma le Ngyaunkung kar ah council ralhraang hna le Nanma PDF, PDF phukomh hna kar kahdohnak ah PDF in 7 an thi i Council ralhraang motor pakhat a rawk dih, 20 leng an thi tiah kan theih. The Hakha Post
