CDF Ralkap Hna Nih SAC Ralkap Tam Tuk An Thah Than Hna

March 7 ah CDF-Kanpetlet le SAC Ralkap karlak voihnih kahdohnak a chuak i, SAC ralkap Captain pakhat tel in minung 6 an thi, tiah theih a si. “Nihin March 7 ah Magwe ramṭhen lei in Kanpalet khuapi lei ah hmunthum in rallam a rak sial mi SAC ralkap hna cu zing sml 7:00 ah voikhat le

zing sml 9:00 ah voikhat ti in CDF-Kanpalet/Mipi ralkap phufonh hna nih vanlawng tual/Airport (Sak cuahmahmi) hmun ah voihnih kan kah hna i, SAC ralkap captain pakhat tel in 6 an thi. Kannih lei thi le hliam umlo in hnu kan kir kho, Kan i kah lio ah Kanpalet khuachung um mi SAC ralkap hna nih hriamngan in an vun bawmh hna,” tiah CDF- Kanpetlet nih March 7 zaan ah cathanh an chuah. Credit: The Chin Post

March 7 zing sml. 10:00 thok in Ukraine khualipi Kyiv le Kharkiv, Sumy le Mariupol khuapi hna ah Russia nih kahdohnak a ngolnak kong a thanh i minung hawi zawnruahnak bawmchantu caah lam an on, tiah TASS thawngzamh nih a langhter.

Hiti kahdohnak a ngol zau i minung hawi zawnruahnak bawmchantu phu a luhter hna nak hi French President nih Russia President Putin a nawlmi a phi chuak si, tiah TASS nih cun an langhter. Cun, Mariupol in chuahnak lam hmun hnih ah onpiak an si lai i, a pakhatnak lam cu Mariupol – Novoazovsk le Rostov-on-Don khuapi hna ah an si lai i mizapi hna cu tlanglawng le mawṭaw in an kal duhnak hmun poh ah va chiah an si lai, A pahnihnak lam cu Nikolskoye, Respublika, Rozovka, Bilmak, Pologi.

Orekhov, Zaporozhye khuapi hna tan pah in Portovskoye, Mangush khuapi hna cu lampi ah palpah an si lai. Kharkov in a chuak ding mi mipi hna cu Nekhoteyevka le Belgorod ah kalpi an si lai hmundang kal a duh mi hna zong vanlawng le tlanglawng in, a herh ning in an i thimnak hmun ah kalpi an si lai, tiah Russia ram mibawmchantu phu nih a thanh ve.

Summy khua mi hna cu Sudzha le Belgorod ah vanlawng le Tlanglawng in kalpi an si lai i hmundang kalduh mi zong an duhnak ah chiah an si ṭhiam lai, tiah theih a si. Credit: The Chin Post