CDF-Thantlang nih thawngpang an chuah
Thantlang Kahdohnak ah SAC Ralhrang 5 an Thi. Nizaan February 1, Thantlang khuachung ah CDF-Thantlang/CNA le SAC ralhrang karlak ah kahdohnakba chuak i ralhrang lei minung 5 an thih pin ah minung pakhat hliam a pu, tiah CDF-Thantlang nih thawngpang an chuah.
SAC ralhrang lei nih bomb in voi tampi an kah hna pin ah Drone zong in bomb an thlak, tiah CDF-Thantlang thawngthanhmi ah an langhter. Ralhrang lei nih bomb kah thlok in a kahmi ruang ah January 30-31 karlak ah Thantlang khuachung inn 94 zong a kaang tthan. Credit; The Chin Journal
United Kingdom(UK) ah a um mi kawlram mipi 1000 hrawng le UK ram um The Royal College of Health i mi fimthiam hna nih, ralhrang nih uknak an laak kumkhat a tlin ni February 1, 2022 ah lam an zawh. Cu lamzawhnak ah cun UK parliament chungtel in Lord Crips, Lord Alton le Barones Cox nih biatawi an chim. UK a phan mi Myanmar Muslim phu zong nih biatawi chimnak an ngei ve.
Myanmar ah a um mi ngandamnak lei rianṭuantu hna an hremnak, an tlaihnak hna le an thahnak hna kong he pehtlai in Britain ram ngandamnak rianṭuantu phu in Mr. Ben nih biachimnak a ngei ve. UK ram Ministry of Foreign Affair zung hmai, UK Prime Minister zung hmai le London Myanmar Embassy hmai ah duhlonak an langhter tiah theih a si.
February 1 zaan zong ah UK ram um The Royal College of Health i rianṭuantu hna nih meisen i vaan in kawlram ngandamnak rianṭuantu hna le kawlram mi vialte upatpeknak an tuah, tiah theih a si. Yangon Ah Ralhrang Ngeih mi Mytel Zung Ah Bomb Voihnih A Puak!; Yangon ramṭhen, Alun peng, Sinmin sang, Kuenkyaung lam ah a um mi ralhrang ngeihmi Mytel zung cu nihin February 2 zingka suimilam 5:00 hrawng ah bomb voihnih an puahhnawh i, a kaang tiah theih a si.
“Bomb voihnih puah thawng kan theih hnu ah mei a kaang i Meithat motor an rak phan colh. Minute 15 hrawng a rauh hnu ah mei a dai. Minung an i hliamh thawng cu kan thei lo,” tiah Alun sang mi pakhat nih a chim. Myanmar meithat zung lei nih cun, February 2 zingka suimilam 4:59 ah Yangon ramṭhen, Alun peng, Sinmin sang, Kuankyaung lam ah inn a kaang i, 5:10 am ah mei kan thah khawh, tiah cathanh an chuah.
Crd: The Chin Post
