Chin Pasaltha Hna Nih Ralhrang 80 Leng An Thah Cang Hna
CNA/CNF hmunhma chung ah a luancia February 27 in March 7 tiang Chin mizapi vengtu ralkap le SAC ralkap kar ah voi 18 tiang kahdohnak a chuak i, cu kahdohnak chung ah cun SAC ralkap lei in minung 80 leng an thi. Chin mizapi vengtu ralkap phu lei in minung 4 nih ram le miphun caah an nunnak an pek.
Chin ramkulh Falam in Hakha lei ah riahcaw phor in a kal mi SAC ralkap motor 27, tank 2 le minung thazaang 200 hrawng cu lampi ah voi 15 kah an si, hi chung ah hin SAC ralkap 70 hrawng an thi. Mizapi vengtu ralkap CNA in minung 3 le CNDF in minung pakhat tiin an dihlak minung 4 an nunnak a liam. Cu kahdohnak ah cun Chin ralkap CNA, CNDF le CDF-Hakha phufonh hna nih an kahdoh hna.
Cun, Chin ramkulh Falam peng no.2 India-Myanmar lampi ah cawlcanghnak a tuahtu SAC ralkap phu hna le CNA, mizapi vengtu ralkap phufonh kar kahdohnak a chuak i, cu kahdohnak ah cun SAC ralkap in minung 8 hrawng an thi. Mizapi vengtu ralkap phufonh lei hliamhma tuar an um lo.
Cu kahdohnak ah cun Chin National Army(CNA), Chin National Defense Force (CNDF), People Defence Force- Zoland(PDF-Zoland), Civic Defense Militia (CDM-Siyin), CDF-Hualngoram phufonh hna an i tel, tiah Chin National Front nih cathanh an chuah. Credit: The Chin Post
Yinmapin Peng Phungki Sianginn Ah Ai Dormi Minung 8 SAC Ralkap Hriamngan Kuan In An Nunnak Liam: Sagaing ramṭhen, Yinmapin peng Letpandaw khua Phungki sianginn cu March 8 chun sml 12 hrawng ah SAC ralkap nih
hriamngan in an kah caah phungki sianginn i ai dormi hngakchia 2 le nausem chang lio nu pakhat ti in mimung 8 an nunnak liam, tiah Chindwin Alliance Force nih an thanh. SAC ralkap hna nihcun Yinmapin peng, Kantha khua le Letpandaw khua ah umhmun an khuar i khuachung ah hriamngan an kah,
a tlizaam kho lo i phungki sianginn ah ai dormi tar kum upa 5 le hngakchia 2 le nausem chang nu 1 an nunnak a liam hi a si. Letpandaw phungki sianginn lawng siloin Kantha khua um mi phungki sianginn zong cu SAC ralkap pawl nih hriamngan in heh tiah an kah i, a chung i ai dormi hna cu hmundang ah tlizaam ngam loin an hren hna. Credit: The Chin Post
