Chin Pasaltha Hna Uar Nan Um Tuk! SAC Ralhrang Tam Pi Pi In Kan Thah Piak Lengmang Uh

Chinram, Matupi-Mindat tlawnlam ah ralhrang ralhmai ser in a ra mi cu CDF Mindat nih lampi ah an rak kah lengmang hna i Febuary 2 zanlei sang kahdohnak ah ralhrang 6 nak tlawm lo an thi; hliam tuar an tam tiah CDF in biachimnak nawlngeitu Ko Zaw Man nih a chim. “Tuzing (Feb. 2) zing suimilam 8:00 ah mengtung 32 ah kan i kap i ralhrang 3 hrawng an thi,

zanlei sml 4:30 ah mentung 30 ah kan i kap ṭhan i, 3 hrawng an thi ṭhan. MA 3 meithal zunkhat kan laak pin ah hliamtuar zong an tam,” tiah nizan february 2 ah a chim. Hi ralhrang pawl hi Matupu in Mindat lei ah a kal mi an si i lamthluan chuak kah an ton peng caah hliam tuar an tam taktak, tiah theih a si. the chin post

Chindwin tiva zul in a kal mi ralhrang tilawng hna le tiva ral ah a um mi Phyo Saw Htee hna cu nihin February 2 ah kah an tong i ralhrang phu le Phyo Saw Htee minung 20 nak tam an thi, tiah MinKin(မင်းကင်း)-PDF nih cathanh an chuah. “Ralhrang phu nih ralhrang a thi mi ruak pawl cu tilawng ah an khin i, an kal pi hna.

An i kah chung hi a sau pah i, ralhrang lei in 20 leng cu an thi lai. Kan hman mi hriamnam kuan zong a tam. Cun, Tiva ral in Phyo Saw Htee nih ralhrang pawl cu hriamngan he an rak bawmh hna. A bawmtu hna cu Sniper in kan kah hna i, Phyo Saw Htee 7 an thi,” tiah Minkin PDF nih an chim.

Ralhrang hna cu a thli tein kah khawhnak ding ah Minkin-PDF cu ni 8 chung timhtuahnak an ngei i, ralhrang tilawng cu bawh in nihin chun Sml 1:00 ah an kah hna, tiah theih a si. “A voikhatnak ah cun ralhrang tilawng hna nih kan umnak cu an rak hngalh cia cang caah an kan kah hmasa i khatlei in kan kah ve hna, kan kah tuk hna caah an hrial kho ti lo.

Kah zong a kan kap kho ti lo i, tilawng cu rang taktak in an zampi. Atu cu kan umnak in a hlat deuhnak khua ah an um cang,” tiah Minkin PDF nih Yangon khit thit ah kahdohnak kong cu a chim. Cu kahdohnak ah Minkin PDF in a thi mi le a hliam mi um lo tein hnu kan tolh kho, tiah a chim chap. Khit Thit Media