Chin Pasaltha Nih A Nun A Pek
Kalay Thonginn Ah CNDF Ralkap A Nunnak A Liam! Nizaan March 15 ah Sagaing ramṭhen, Kalay Thonginn chung ah a cang mi buainak ruangah CNDF ralkap Salai Shalom Siang Thang Lian, kum 28 cu a nunnak a liam. Kalay Thonginn ah Thongtla Shalom Siang Thang Lian nih hruaimi thongtla minung 50 hrawng nih Thongbawi pawl cu hnahnawhnak pe in, zaam an i timh caah kah an si, tiah SAC nih an thanh.
Salai Shalom Siang Lian Thang hi 2021 June thla ah Kalay i dohthlennak mission pakhat a tuah lio ah SAC ralkap nih an rak tlaih i, Kalay Thonginn ah an hren. Ram le miphun caah nunnak a petu Salai Shalom Siang Lian Thang hi upatnak kan pek i a taantak mi a chungkhar hna zong kan ngaihchiatpi hna, tiah CNO/ CNDF nih cathanh an chuah. Credit; The Chinland Post
Tuluk Ram Ah Covid-19 Zawtnak A Zual Tuk Cang Caah Millions 24 Umnak Gyi Lin Ramkulh Cu An Lockdown! Tuluk ramah March 15 ah khan nikhat ah minung (50000) bak covid zawtnak ngeitu hmuhchuah an si tiah nawlngeitu nih cathanh an chuah i, a tambik cu Gyi Lin ramkulh an si caah millions 24 bak umnak cu lockdown an tuah.
Gyi Lin ramkulh dihlak le technology hmunhma bik a simi Shan Cian hmunhma le cuka ummi mipi dihlak telh in ramchung miliion tampi nih atu ah hin covid zawtnak ruangah lockdown an tuar.
Atu baktukin covid-19 zawtnak ruangah lockdown an tuah tikah Tuluk ramchung ah a ummi ramdang company hna zong an riantuanmi zong an i din tiah theih a si. Covid-19 zawtnak ruangah lockdown an tuahnak thawngin a biapi tukmi le a herh taktakmi bawmhchannak hna hi an i pe kho ti sual lai lo timi thinphang in an um. Crd: Voice of Myanmar
Kalay-Rih Khua Dar Lei A Kalmi Motor Cu Ralhrang Ralkap Nih Ningcang Loin Phaisa Hal! Kalaymyo in Rih Khua Dar leikap ah a kalmi thilphor motor le minung phortu motor hna cu SAC ralhrang ralkap nih ningcang loin hmun (3) bakin phaisa an hal hna tiah theih a si. Kalay-Rih Khua Dar karlak ah thil phortu driver pakhat nih “facang a si ahcun dip khat ah thongkhat an kan laak,
Aa caan ahcun motor pakhat ah singkhat le cheu an kan laak caan zong a um i, eidin a si ahcun motor pakhat ah thongsawmruk (60000) an kan laak” tiah a chim. SAC ralhrang ralkap nih gate an hngahnak cu, Meng (😎 nak, Khai Kam gate le Taingen khua tiin hmun (3) bakin phaisa an hal.
Minung phortu hna cu Meng (😎 nak zawnah thonghra, Khai Kam gate ah thonghra le Taingen khua ah thongnga tiin an hal hna. Kalay-Rih Khua Dar karlak ah minung phortu pakhat nih “a hlan ahcun thongnga lawng an kan laak. Lampi an hun than hnuin thonghra bak an kan laak, direct in cu zat tiah mi an hal” tiah a chim.
Cucaah Kalay-Rih Khua Dar karlak zong a hlan nakin motor man hi a lethnih in a kainak a si. Kalaymyo in Rih leiah a kalmi cu minung pakhat ah thongsawmli an laak hna i, Rih in Kalaymyo leiah a kalmi cu minung pakhat ah thongsawmsarih an laak tiah driver pakhat nih a chim. Kum dang ahcun Kalay-Rih karlak cu thonghleinga lawng a si tawn nain SAC ralhrang ralkap nih nawlngeihnak an laak kum 2022 kum thar hrawng ahcun 30000 tiang a kai. Crd: Zalen
