Press "Enter" to skip to content

Chin Pasaltha Salai Sui Thawng Lian Cu Upat Peknak He A Ruak Vui A Si!

Bomb puah sual ruang ah a nunnak a liam mi CNDF ralkap Salai Sui Thawng Lian ruak cu upat peknak he an vui cang. 2022 May 7, Falam peng raalram hmun pakhat ah bomb can sualnak in ram le miphun ca ah a nunnak a petu CNDF ralkap Salai Sui Thawng Lian @Khiangawi cu upat peknak he vui a si cang tiah CNO/CNDF nih an thanh.

[Burmese]

၂၀၂၂၊ မေလ (၇)ရက်နေ့ ချင်းပြည်နယ်၊ဖလမ်းမြို့နယ် ရှေ့တန်းတနေရာတွင် မိုင်းမတော်တဆမှုကြောင့် တိုင်းပြည်နှင့်လူမျိူးအတွက် မိမိကတိသစ္စာပြုသည့်အတိုင်း အသက်ပေးဆပ်ခဲ့သည့် CNDF ရဲဘော် Salai Sui Thawng Lian@Khiangawi အသက်(၁၉)နှစ်အား ကောင်းမွန်စွာ သဂြိုလ်ခဲ့ပြီးဖြစ်ကြောင်း CNO/CNDF က ထုတ်ပြန်သည်။ Photo- CNO #The Hakha Post

Thawngdang Relchap>>>>><<<<<< တံတားဖြူ (White Bridge) Umnak Pyi Lampi Laifang Ah Siangngakchia Thong Tampi Ralkap Le Riot Police Nih Hnu Hmai In An Kan Kham I Mi Tampi Tukvelh Le Tlaih An Rak Tonnak Kong. Mah hi kan rak ton mi hi, cu lio i aa tel le a um ve nih cun an philh khawh cio lo mi a si. Hi lio ah siangngakchia tampi an tlaih mi hna le an thi a rak luan mi philh khawh ti lonak ca ah တံတားဖြူ (White Bridge) min cu တံတား နီ (Red Bridge) tiah thlen in a chim a ṭial zong an hung um hna.

1988 kum March thla ni 13 zaan i RIT siangngakchia pawl palek le ralkap nih an tlaih an kah mi hna thinhunnak mei-alh nih Rangoon khuachung um university sianginn dang pawl sin zong ah a hei tlaih chih dih ve hna. Cu ti i buainak a hun i peh in cun 16/03/1988 ni cu university dang i siangngakchia pawl zong aho nih kawh theng si lo in Rangoon University (Main) ah cun kan hei chuaklang cio hna. Convocation Hall hmai ah siangngakchia nih BSPP – Ne Win cozah hruai ning a ṭhat lonak le an duh lonak kong pakhat hnu pakhat an chim hna.

Mah cu lio ah Ne Win cozah duhlonak kong ṭial mi ca a pe le a phaw zong an rak um ve. Convocation, RC le Library inn hmai Adipati lampi le a pawngkam ah siangngakchia pawl cu duhsah duhsah in an hung i bu thluahmah hna. Siangngakchia pawl aa bu mi cu a thong leng pi an hung si cang hna. Cu ti i pakhat hnu pakhat cozah duhlonak an vun chim cio ah mi pakhat nih RIT sianginn lei ah kal ding in ruahnak a vun chuah i adang zong nih e tiah an hnatlakpi cio dih. Kanmah cio zong cu mah ti cun zapi lakah cun kan hei um ve hna.

Chun hnu suimilam 3:00 pm hrawng a vun ti ah Rangoon University chung i siangngakchia pawl cu leng lei ah chuah i Pyi lampi zulh in Hlaing campus (University of Yangon) ah, cu in RIT sianginn lei ah va i ton dih hna ding in ti khi a si. Mah cu kalnak ding cu a hlan kan in program an rak tuah cia theng mi a si lo. Cu ni ah mi pakhat-hnih nih kal ding tiah an vun timi kha e tiah an hnatlakpi colh cio mi khi a si.

Sianginn chung in cun kan chuak hna i duhsah in Hlaing Campus lei fuh in Inya Lake tidil tlaang kam in a kal mi Pyi lampi cu kan zul hna. Zei tin dik a si ka hngal ti lo, kannih pawl cu hmailei hmaisa a kal mi phu ah khin kan rak i tel ve. Mah ni i Inya Lake kam Pyi lam cung pi i a kal mi hna cu, Rangoon University in a vun i thawk i Inya Lake tidil tlaang kam zul in hei kal khawhnak, inn a umnak tiang khi kan khat dih hna. Minung zei zat dah kan si lai timi a chim awk a har. Acheu nih thong nga lengkai kan si lai ti a chim ṭial an um i, high school siangngakchia pawl le khuachung mi a hung i fon mi hna he cun chim porh deuh in a ṭial mi nih thong kul cu kan si lai a ti zong an um ve.

Fur tik caan i luti luannak ah an ser mi ti kalnak cung ah hlei fate a um i, mah cu တံတားဖြူ (white bridge) tiah an auh mi hlei fate kan vun lonh in Inya Lake tidil a tlaang kam kal khawhnak tiang kan vun phanh ah khin ralkap nih an hmai ah thirhri hling in lampi cu an kham i ralkap 100 tluk nih G-3, G-4 meithal he raltu lai bang standby in, aartlaang tlaang thum thluan in an dir i an kan kham ko e. An hnu lei nawn ah khin ralkap armored thir kham car cung in heavy machine gun pi cu kanmah lei tinh in a dir ko khi kan hei hmuh.

Mah ti cun hmai lan kho ti lo in cun taap lakin an kan kham ṭhup kho. Mah cu lio ah Yangon Division army commander a hung kal i, siangngakchia cheu khat nih, Phone Maw a thihnak kong i an lungsilonak le cozah nih ṭha tein hlathlainak tuah an duhnak le siangngakchia a kaaptu pawl phung ning tein cozah nih biaceihnak tuah hna seh ti kan duh ruang ah hi ti hin duhlonak kan langhter mi a si, tiah a kan khamtu ralkap bawipa cu an hei chimh lengmang.

Cu lio ah cun hmai kal phu kan si i cu hna pawl he cun feet 15-20 tluk hrawng hla ah khin kan um ve hna. Mah cu ti i an kham chung ah cun ram hla – national anthem “Kaba Ma Kyei” (ကမ္ဘာမကျေ) hla cu kan bupi in kan vun sa pah hna. Minung mah vialte hlasak aw pi nih cun thin-lung a vun hnoter pah. Cu lio cu March thla ṭhal ni linh lingcing lio pi a si. Acheu cu lampi ah a ṭhu na zong an tampi.

Cu lio i white bridge umnak Pyi lam umtu ning cu, Yangon University hmun kulh donghnak hmai zawn in khin chuk zau nawn tein a kal i, white bridge a phanh hrawng in khin cho zo nawn in a hei kai ṭhan. Kan umnak zawn in kan hnulei cu ka hei zoh hna i lampi cu Judson Church hmai tiang khi minung kan khat dih. Mah cu ti i ralkap nih an kan kham i kan um cu suimilam pakhat chung cu a si lai dah. Fiang in kaa cinken kho ti lo. Mah lio i ka mitthlaam ah a cuang mi hna cu tleicia Pu Uk Lian Thang (Sawke) le Par Ṭha pa (Pu Victor Biak Lian) khi an si. Hmai lei i a um ve mi ah cun aa tel mi kan si hna.

Mah cu ti i hmai kal kho ti lo in kan um lengmang lio ah cun ruahlopi in kan umnak hnulei Judson Church hmai le Inya Lake le Rangonn University karlak Inya lam in police Hino car pipi i cit in riot police pawl cu riot shields, batons, tear gas (riot gun) le rifle meithal he armored car nih a hun zulh hna i Pyi lam pi cung i hnulei um siangngakchia pawl cu tlaih ding in an vun zuan hnawh colh hna.

Heh tiah an baton fung in cun nu hual lo pa hual lo in an tuk an velh hna. Hngerhte bu funghreu in vun sawh hna i kaakip ah a ṭio dih mi bantuk pi khi kan lo. Minung cu kan tam tuk hna i, zokzok in vun zaam manh khawh zong cu a si ti lo. Acheu siangngakchia nu cu an thinphan lung in Inya Lake tidil khamnak tlaang lei ah an zaam i a tidil ah a va tla mi zong an um hna. Cu hna pawl cu riot police pawl nih tidil kam ah an tuk an velhnak hna hma in a thi zong an um hna ti si.

Pyi lampi cu Rangoon khuachung lei in hei kal ah cun orh lei ah Inya Lake tidil, keh lei kam ah mi umnak inn le tlakrawh le thiarhri hling in kham mi hauhruang lawngte an si. Cu ti i hmai lei a ummi pawl zong cu thirhri hling zam mi he ralkap nih standby position in methal he kham cu kan si ve hna i, kan hnu in riot police nih an tuk an velh an tlaih mi hna aw-aan thawng pi le buai lut pin an vun um cu lau lengmang in kan hei theih/hmuh ve hna. Cu ah zei zei ti ruah leen awk um ti lo in, a rannak in mi inn hauhruang kulh mi cung ah cun kan kai kan tli cio hna.

Mah cu kar-lak kuam hrawng cu mirum deuh pawl umnak inn an si hna i hauhruang an kulh mi zong an sang, an kutka zong a fek i nu pawl ca hrim ah cun a fawi lo mi khi a si. Inn karlak ah lam fa tete zong an um pah hna. Mah ti cun heh tiah mah le thiam ning cio in Insein lampi kalnak lei ah cun kan zaam cio hna. Saingngakchia nu cheukhat cu an va tlikzaamnak lei i inn ngeitu nih an zaangfak hna i an inn chung ah an luhter hna. Police le Riot Police pawl cu ralkap bang lampi ah cun um ziar ko hna loin, kan tlikzaam nak lei ah pistol le meithal he a hung kan dawi zong an rak um.

Mah ti cun thinphan thlalau bu he lusam hngal lo in cun kan tlizaam hna i a tam deuh cu Insein lampi lei ah kan phan kho hna. Lampi kan va chuah ah siangngakchia cheukhat nih an thinhun tuk lung in Khuachung le Insein karlak a kal mi cozah Bus No.8 pakhat an kham i a thlalang kuaimaan dihlak in an cheh. Motor car dang zong kal ngam ti lo in an dir, an i leet hna. Mah cu kan ton a ni tlawmpal hnu ah Sawke nih a ka chimh ṭhan mi cu, an tlikzaam naklei i a dawitu hna police pa nih pistol in a kan kah i a kan kheng lo a ti. Kannih tlikzaamnak lei tu ah cun police an rak phan kho lo.

Insein lampi kan hei phanh in cun acheu cu kan ke in Hledan (လှည်းတန်း) lei i kan kal hna ah San Yeik Nyein lam pial in Judson Church lei ah kan hei luh ṭhan cu, riot police pawl cu Pyi le Inya lampi aa tonnak hrawng ah khin cu lio i an hman mi armored car he an dir ko hna khi kan hei hmuh hna. Cu ah siangngakchia cheukhat nih Judson Church Centre hmai i Bus dinhnak shelter inn cu an nam i lam laifang ah an thluk.

Riot police pawl cu armored car he kan sin lei ah cun duhsah nawn in khin an hung kal ah lam kam kilnak i an hman mi tlakrawh cheu le lung he heh tiah kan vun cheh ve hna. An rifle meithal kuan vaan lei an vun kah. Mah cu hnu ah tear gas (riot gun) in phung phung tiah an vun kan kah thluahmah. Cu hlan ah tear gas zei dah a si ti zong kan rak hngal bal lo i, kan thinhun lung in tear gas nih a vun kan khut dih hrawng tiang khi kan vun cheh ve hna ah a khu kan vun i hamh pah mi nih ka dang a ka hriah dih bantuk khin a um i ka sia a rem lo ngai.

Mah cu ti i an vun kan naih deuhdeuh ah cun San Yeik Nyein lam pial lei ah kan tli dih ṭhan hna. Lam chung lei kan hei luh ah aho dik a si ti ding uh, ti ding uh a ṭha tiah a vun kan ti i lam kam inn ngeitu nih ti an vun kan pek mi in cun ka dang cu kaa tlengh nain hmakhat te ah cun a thiang kho tak lo. Ka dang ah a hraat mi bantuk i benh seh law a lo. Natein minutes 9-10 hrawng a vun rauh in cun a ṭha ṭhan ko. Mah cu tear gas khu kaa hamh ve cu ka chan chung ah a hmasabik le a hmanungbik a si. Crd: David C B. Ling

Be First to Comment

Leave a Reply

Your email address will not be published.