Press "Enter" to skip to content

Chin Ram Kahdohnak Thawngfiang

Chin ramkulh chung ralhrang hna le mizapi vengtu ralkap CNA/CDF/PDF hna cu January, 2022 chung ah voi 71 an i kap i ralhrang phu lei in minung 197 an thi, tiah theih a si. Mizapi vengtu Chin ralkap lei in minung 18 an nunnak a liam, tiah Chinland Joint Defense Committee(CJDC) nih cathanh an chuah. Kaphnih karlak kahdohnak chung ah ralhrang phu lei minung 197 an thi i minung 68 nih hliamhma an tuar. Chin ralkap lei in minung 18 an nunnak a liam i minung 20 nih hliamhma an tuar, tiah theih a si.

Ralhrang phu hna nih Chin mipi hna cung ah phung ning lo in thil ṭha lo tampi an tuah i, sualnak ngei lo minung 13 an thah hna, leng ah ralhrang kut in minung 15 nih hliamhma an tuar tiah theih a si. January, 2022 chung ah, Matupi peng ah kahdohnak voi 29 a chuak i, cu kahdohnak cazin laak mi chung ah cun khuachung kahdohnak le kahdohnak a faak lo mi hna relhchih an si lo l, tiah Chinland Joint Defense Committee nih nihin February 3 ah cathanh an chuah.

Chinram Ah Mawtaw 80 Nak Tam Ai Zulmi Ralhrang Hmun 7 Ah An Kah Hna, 20 Tluk An Thi; Chinram chung ah mawtaw 80 nak tam in ai zul mi ralhrang motor run cu hmun 7 nak tam in kan kah hna i a tlawmbik ralhrang 20 cu an thi lai, tiah CDF-Mindat nih an chim. Ralhrang motor ai zul mi pawl hi Chin ralkap pawl nih an kah lio hna ahhin Mindat khuachung ah umhmun a khuar mi ralhrang No. 275 Battalion nih hriamngan in an vun bawmh hna tiah theih asi. Tutan Ralhrang motor 80 leng ai zulmi pawl hi Matupi CDF zong nih an ramchung ah an rak kah ve hna, Cun, Chinram chung ah hriamtlai ṭhawngbik simi le caan saubik hriamtlai phu CNA le Chinram he ramri ai tlai mi Sagaing le Magway ramṭhen in PDF pawl le Pengkulh 5 fonh in dirhmi Yaw Defense Force (YDF) le CDF Mindat fonh in an kah hna.

Hakha Peng Ah Covid-19 A Karh, Khuapi In A Zawmi Zong An Um; Chin ram, Hakha pengkulh, Surkhua le Bunlung le Hausen khua hna cu an khuapi ti awk in Covid rai nih a tlunh hna, tiah theih asi. “Surkhua ahhin Covid hrik kai mi minung 300 renglo an um, tiah theih asi. Surkhua ahhin a hlan ah cun Khuate sii-inn( တိုက်နယ် ဆေးရုံ ) a rak um, nain atu ah cun rianṭuantu an um ti lo, Nikum May thla 8 lio ah khan Surkhua um mi Palek sakhaan cu CDF nih an rak luhhnawh i mei in an rak khangh dih bal cang.

Covid in an zawt tuknak Surkhua khuapi, Buanlung le Hausen khua hna ahcun Hakha Pengkulh Ngandamnak Zohkhenhtu Committee nih an kal hnawh hna i RDT Test Kit in zawtnak an chek hna, Zawtnam hrik ngei mi zohkhenh/thlopbulnak le thop bul ningcang chim fiannak an ngeih hna. Chin ram chung pengkulh kip ah Covid raikhamsii chunh a si ko, nain rianṭuantu tam deuh nih CDM an tuah caah rianṭuantu an i phanh zawhlo pin ah thiamnak ngei taktak an tlawm caah harnak phunkip an tong, tiah theih asi. Ref:Mizzima, The Chin Post

Be First to Comment

Leave a Reply

Your email address will not be published.