Chin Ram Khualipi Ah Ralhrang Le CDF Kar Kahdohnak Fak A Chuak
Hakhathar lam 6 tonnak ah kahdohnak a chuak, 2022 March 3 zinglei sang, Hakhathar lam 6 aa tonnak ah Chin ralkap CDF le SAC ralhraang hna karlak ah kahdohnak a chuak tiah thawng kan theih. Pawngkam um mi hna nih, “Tuzing zinglei sang ahkhan kahdohnak thawng a thang. Bomb le meithal thawng ti cawk a si lo.
SAC ralhrang lei a thimi le hliam a tuarmi an um pah,” tiah The Hakha Post ah an chim. Hi kahdohnak ah ralhraang lei in pahnih an thi i rammi ralkap lei in a thi mi le hma pu an um lo tiah kan theih. Atu banuk in kahdohnak a chuah hnu ah Rungtlang le Khuathar in bomb le meithal he tlerhkhawnnak, i hrocernak an tuah i khuami hna a herh lo ahcun leeng chuah lo ding fb cahmai ah ca an tar cio. Credit; The Hakha Post
Sagaing ramṭhen, Kalaymyo ah CDM cawlcanghnak a tuahtu palik phu hna he fonh in dirhmi Kalay mizapi vengtu palik phu hna nih February thla thlakhat chung ah rithai-sii ruangah tlaihmi case 25 le ngakchia kum no tlaihhremnak case pakhat cu kan tawlrel khawh, tiah nihin March 3 ah cathanh an chuah.
Rithai-sii ruang ah tlaihkhih a tong mi hna chung in rithai-sii a tawngtu pa 22 cu a herh mi biakamnak tuahter an si i, rit-sii zuartu minung 3 cu dan-tatnak tuah ding in timhtuah an si, tiah theih a si. Khuate lei zong ah mizapi hruainak tlamtling in a kal khawhnak ding caah, khua 31 ah tlawng in biaruahnak zong an tuah, tiah theih a si.
Cun, sualnak a tuahtu hna cu an sualman tuar ding in dan-tatnak tuah an si lai. Thonginn pakhat zong sak cuahmah lio a si, tiah an chim. Kalaymyo mizapi vengtu palik phu hna nih khuapi chung an hmunhma le khuate lei ah dai tein le phungning tein zatlang nun a kal khawh nakding in mizapi caah rian an ṭuan, tiah theih a si. Credit: The Chin Post
