Chin Ramkulh Ah CNA Le ZRA Kar Kahdohnak A Chuak, CNA Ralkap Pakhat Nih Ram Le Miphun Caah A Nun A Pek

Chin ramkulh, Tedim peng, India ramri pawng ah nizaan March 23 zaanlei slm 6:30 in 7:00 pm tiang ZRA le CNA Kahdohnak a chiak i, CNA ralkap Salai Tuan Peng Lian a nunnak liam, tiah kan theih. CNA in ṭuanvo ngeitu pakhat nih cun, “ZRA pawl hi meithal ”khohchu” timi deuh an hmang, M16 ,G3 meithal pawl zong an hman hna thazaang 20 hrawng nih umhmun kan khuarnak ah an kan rat hnawh i an kan kah,” tiah a chim.

CNA le ZRA hi SAC nih uknak an laak hnu in voihnih an i kap cang i, 2021 December 17 zing sml 3:00 ah Ngawsing khua pawng ah umhmun khuar mi ZRA pawl cu CNA nih an rak kah bal hna. Tutan ZRA le CNA kahdohnak ah ZRA lei thi le hliam an um le um lo atu tiang hngalh a si rih lo. Credit: The Chin Post

Myanmar buainak a zual chin i SAC ralkap le tlang cung hriamtlai phu hna kahdohnak a chuak peng ruangah umnak a chuahtak mi minung 900,000 deng an phan cang, tiah UN Office for Coordination of Humanitarian Affairs(OCHA) nih an thanh. Myanmar ram nichuah thlanglei le nitlak chaklei ah buainak a faak chin lengmang i kahdohnak ruangah umnak chuah tak in a zaam mi hi 2022 March 14 tiang ah minung 889,500 an si cang, tiah OCHA nih an cathanh ah an langhter.

Umnak chuah tak in a zaam mi hi 2021 February hlan tiang ah minung 370,000 tiang an rak si i, SAC ralkap nih uknak an laak hnu in a zaam ṭhan mi minung 519,500 an um tiah an langter. Ramkulh le ramthen kip in Myanmar ram nichuah thlanglei ah minung 228,900 tluk an um. Kaya (Karenni) ramkulh ah 93,800, Karen ramkulh ah 69,100, Shan ramkulh thlanglei ah 54,000, Mon ramkulh ah 7,500,

Taningtari ramṭhen ah 3,700 le Pago ramṭhen ah 800 cu umnak chuahtak in an zaam hna, tiah theih a si. UNOCHA nih umnak a chuah tak mi hna an bawmhnak ah umkalnak le thil cheknak ding ah harsatnak an tong nain bawmh a herh mi hna caah emergency in bawmh khawhnak ding le humhimnak pek ding kan i zuam cuahmah lio, tiah an chim.

Relchap; KIA Brigade -5 hmunchung Bwan-Ye-Bwan ah umhmun khuar mi SAC ralkap nih nihin March 23 zing sml 3:30 hrawng ah KIA Headquarter umnak Laiza khuapi lei ah hriamnam ngam zuun 4 nak tlawm lo an kah, tiah theih a si. SAC ralkap nih an kahmi hriamngan cheukhat cu Laiza lonh in China ram Naban khuate ah an tla i an puak, tiah The Kachin Net nih a langhter.

Cun, KIA Battalion -5 hmun Ga Hkyeng Bum chung ah rallam sial in a rak rami SAC ralkap hna cu KIA le PDF nih bomb an puah hnawh hna, tiah theih a si i, thi le hliam kong hngalh a si rih lo. Kachin ramkulh chung ah rallam a sial mi SAC ralkap le KIA,PDF karlak ah atu le tu in kahdohnak a chuak, tiah theih a si.

Pathein-Monywa Motor Lampi Ah SAC Ralkap Bomb Puah An tong, Minung 10 An Thi: Pathein-Monywa motor lampi, Awngzaeyiah(အောင်ဇေယျ) lei in a chuak mi SAC ralkap minung thazaang 50 hrawng nih citmi motor cu palik battalion 28 le Yama(ယမား) hleidonh thlanglei kar ah nizaan March 22 zinglei 11:30 hrawng ah bomb puahhnawh an si i, SAC ralkap 10 an thi, tiah theih a si.

“SAC ralkap hna cu Yama(ယမား) hleidonh thlanglei ah bomb puahhnawh in kan doh hna i, SAC ralkap minung 10 an thi. Minung thazaang 50 hrawng an si i, bomb lung 10 nak tlawm lo kan puah,” tiah mizapi vengtu ralkap phu lei chimphuannak nawlngeitu nih a chim. Bomb puah in doh an si hnu suimilam 12:30 hrawngah SAC ralkap hna cu khuachung ah lut in,

Gaysajah(ကျေးစာကျ) khua le Setawgyi(ဆည်တောကြီး) khua inn 14 cu an khangh leng ah innchung thilri zong an hrawh dih caah khua mi hna cu khuachung ah um ngam lo in hmundang ah an zaam hna, tiah a chim chap. SAC ralkap hna cu mizapi vengtu ralkap lei nih ni 5 hrawng an rak hngah hna tiah an chim. Cu kahdohnak ah cun tualchung mizapi vengtu ralkap hna, Regional Frend Fighters (RFF) le Revolution Youth Group (RYG) phufonh nih an kah hna, tiah theih a si. The Chin post