Press "Enter" to skip to content

Chin Ramkulh Chungah SAC Uico Ralkap Le AA Kahdohnak A Chuak, Hriamngan He Hriamhme An Hman Caah Kahdohnak A Fak

Paletwa Ah Arakan Army(AA) Le SAC Ralkap An I Kap!: Chin ramkulh Paletwa ah Arakan Army (AA) le SAC ralkap cu nihin June 27 zinglei ah an i kap tiah tualchung mi nih an chim. Kahdohnak thawng cu Paletwa nitlak lei meng khat tluk aa hlatnak Abawngta(အဘောင်သား) khuataw lei ah theih a si i, zing Sml 9 tluk in kahdohnak cu a chuak, tiah theih a si. Kahdohnak cu sau a rau lo nain SAC ralkap lei nih hriamngan le hriamhme suimilam cheu chung an kah thawng theih a si, tiah khuami nih an chim.

Abawngta khua pawng zong ah June 26 ah khan AA le SAC ralkap kar kahdohnak a rak chuak cang. Nihin kahdohnak a chuahnak pawngkam khua cu SAC ralkap nih luhchuahnak an phih, tiah tualchung mi sin in theih a si.

Kahdohnak a chuahnak hmun ah Paletwa ah umhmun khuar mi kah-lah-yiah(ခလရ) 289 batallion nih hriamngan an kah i tualchung mi a thi le hliam tuar an um le um lo theih khawh a si rih lo. Atu ah cun Paletwa khuachung cu a dai rih ko i zei a chuah te lai ti theih a si lo. June 26 kahdohnak a chuah hnu ah Abawngta khuabawi tel in khuami cheukhat le Paletwa khuami cheukhat cu tlaih an si. Credit: The Chin Post

Yee Peng Ah Tualchung Mi Hna Phaisa A Haltu Pyusawhṭi Le SAC Ralkap 5 Thah An Si: Mon ramkulh, Yee(ရေး) peng Asin(အစင်) khualuhnak hleidonh ah tualchung mi hna sin in phaisa a haltu SAC ralkap le pyusawhṭi hna cu June 27 zinglei ah kah an tong i SAC ralkap le pyusawhṭi lei in 5 an thi, a thi mi hna meithal 3 an lakpiak hna, tiah tualchung mi nih an chim.

“Yee(ရေး) peng Asin(အစင်) khua luhnak hleidonh hngaktu SAC ralkap 5 cu nihin zinglei ah cycle 3 aa citmi nih an kahthah hna. Kah an ton in suimilam 2 hrawng a rauh hnu ah an ruak cu an char hna. Kahthah a tong mi hna cu tualchungmi cycle le motor he aa chawkmi sinah phaisa a haltu an si. Minung 4 cu kah an ton lio ah an thi colh i, a dang pakhat tu cu siizung ah a thi, an hriamthil zong an chuh hna,” tiah tualchung mi pakhat nih a chim. SAC ralkap 5 a thattu cyle in aa chok mi hna cu hote an si theih a si rih lo.

Myinmu Ah SAC Ralkap Motor 3 Le Private Motor Pakhat Bomb Puahhnawh An Tong!: Sagaing ramṭhen Myinmu ah SAC ralkap motor 3 le private motor he a kalmi SAC ralkap motor pakhat cu nihin June 27 ah bomb puahhnawh an ton caah SAC ralkap motor 2 a rawk, tiah Black Eagle Defense Force-MMU sin in theih a si.

Sagaing ramṭhen Monywa in a chuakmi SAC ralkap motor 3 lengah private motor pakhat he minung khat tein aa cuangmi SAC ralkap hna cu Myinmu le WanPih(ဝမ်းပြည့်) khua karlak ah nihin June 27, zinglei suimilam 9:45 hrawng ah bomb puahhnawh an ton caah motor 2 an rawk, tiah theih a si.

Cun, cu SAC ralkap hna cu zinglei suimilam 9:53 ah Myinmu peng BuMinGyi(ဘိုးမင်းကြီး) khua le GwayPinTaw(ဂွေးပင်တော) khua kar ah bomb lung 6 in hmunhnih ah an puahhnawh ṭhan hna i, bomb puahhnawh an tonnak hmun ah motor 2 hliamhpiak an tong ṭhan. Bomb puah a tong mi SAC ralkap 7 cu faak ngai in hliamhma an tuar, tiah Black Eagle Defense Force-MMU nih cathanh an chuah.

SAC ralkap bomb puahnak ah cun Myinmu Black Eagle Defence Force-MMU hruainak in People’s Defense Force Myinmu-MMU PDF, Myinmu Civil Revolution Force-CRF Myinmu, Myinmu Lightning Guerrilla Force le Myaung peng tualchung hriamtlai phu CDSOM phufonh hna an i tel. Tualchung hriamtlai phufonh lei hliamhma tuar um lo in hnu an tolh kho, tiah theih a si.

Nizaan June 26 ah Sagaing ramṭhen Bamauk peng ah Shan Ni PDG le SAC ralkap, SNA karlak kahdohnak a chuak i, cu kahdohnak ah cun SAC ralkap 17 an thi tiah Shan Ni Revolution nih an chim. Credit: The Chin Post

PinOoLwin – Mandalay Lam ah SAC ralkap Mawtaw Run Bomb Puahhnawh An Tong Mawtaw Pathum A Rawk , SAC Ralkap 3 An Thi
PinOoLwin – Mandalay lampi ah SAC mawtaw run cu mizapi vengtu ralkap phufonh i bawm in kan kahdoh hna tiah DRM Rangers Mandalay phu nih nihin June 27 ah an thanh.

Nihin zing Sml 10 : 30 hrawngah PinOoLwin – Mandalay lampi Tammataw khua pawng ah mawtaw 8 in a ra mi SAC ralkap hna cu bomb puahhnawh an tong i SAC ralkap 3 an thi i tampi hliam an tuar tiah DRM nih a fehter.

Kahdohnak ah SAC ralkap mawtaw he neih tein a ra mi mizapi tlawmpal cu hliam an tuar caah kan lungțha lo, kan ngaithiam ko uh zaangfah kan in nawl hna tiin kahdohnak chung a tel mi mipi ralkap nih a chim. Credit: The Chin Post

Relchap>>><<< KNU brigade 3 hmunhma, Ngawnglaypin pengkomh chungah hmunhma rilonhtu SAC ralkap le KNLA kar June 25 le June 26 nihnih chung ah kahdohnak voi 3 a chuak i SAC ralkap 19 an thi tiah KNU nih an thanh

June 25, zinglei suimilam 7:30 hrawngah Ngawnglaypin pengkomh, Kyaukgyi(ကျောက်ကြီး) peng NgaByatInn(ငဗြက်အင်း) khua le InNat(အင်းနက်) khua kar ah SAC ralkap le KNLA kar kahdohnak a chuak, SAC ralkap lei bu-gyi pakhat, tat-kyat-gyi pakhat le SAC ralkap kuttang um khuabawi Tan Lwin telh in minung 14 an thi tiah KNU nih an thanh.

Cun zaanlei suimilam 5:00 hrawngah Mung(မုန်း) peng NawngKung(နောင်ကုန်း) khua nichuahlei ah kahdohnak a chuak ṭhan i cu kahdohnak ah cun SAC ralkap 2 an thi.

June 26, zinglei suimilam 7:00 ah KyaukGyi(ကျောက်ကြီး) peng NaYuayPin(နရွဲပင်) khua le NgawngKung(ညောင်ကုန်း) khua kar ah SAC ralkap le KNLA kar kahdohnak a chuak ṭhan i SAC ralkap 3 an thi tiah theih a si. SAC ralkap hna nih cun InNat(အင်းနက်) khuakomh chung NgawngWai(ညောင်ဝိုင်း) khua ah hriamngan an puah,

Cun zaanlei suimilam 6:00 hrawng ah SAC ralkap nih motor 5 in minung thazaang le hriam thazaang an chap leng ah NgaByatInn(ငဗြက်အင်း) khua ah SAC ralkap motor 6 in minung thazaang le hriamthil thazaang an chap tiah KNU nih cathanh an chuah. Credit: The Chin Post

Be First to Comment

Leave a Reply

Your email address will not be published.