Chin Ramkulh Falam CNDF Hna Nih Ralhrang 10 Hrawmng An Thah Hna
Chin ramkulh, Falam peng ah SAC ralhrang motor pawl cu kan kah hna i ralhrang 10 hrawng an thi, tiah CNDF nih nihin February 25 ah cathanh an chuah. February 24 ah SAC ralhrang motor run 30 cu Falam peng ah riahcaw chaan ding in a rat lio ah Falam,
Thinshusakhan khua pawng an phak in CNDF nih an kah hna, tiah theih a si. Kahdohnak ah hin mipi vengtu ralkap hliamhma pu lo tein hnu kan kir kho ṭhan, tiah CNDF nih an cathanh an langhter.
February 12 zong ah Falam Khah-Lah-Yah 268 ah riahcaw a rak chaantu ralhrang motor cu an kir lei ah ralhmai i a kal hmasa mi SAC ralhrang pawl cu kan kah hna i 3 hrawng an thi, hliamhma a pu mi zong an tam, tiah CNDF nih cathanh an rak chuah. Credit; The Chin Post
Russia nih Ukraine a tukmi kong ah Myanmar ram uknak latu SAC Ralhrang nihcun Russia leiṭang in bia a chim hoi ṭhan. SAC ralhrang in biachimnak nawl ngeitu Zaw Min Htun cu Russia le Ukraine kong ah VOA nih bia an hal i pakhatnak ah “Russia nih amah uknak fehternak caah a tuahmi a si tiah ka hmuh;
A pahnihnak ahcun Russia nih vawleicung ramkip daihnak le cuaithlainak ah ram lianngan a sinak a langhter” tiah a chim. Vawleicung ramkip nih Russia an mawhchiat lio ah SAC ralhrang nihcun Russia nih a tuah dingmi rian a tuah a si ko,” tiah a dirkamh.
SAC ralhrang le Russia cu a fekmi pehtlaihnak a ngeimi an si i Min Aung Hlaing zong kan hnu kum June thla ah Russia a tlawng i Doctor degree an rak pek bal cang. Min Aung Hlaing nih uknak a laak zong ah Russia nih a dirpi pin ah hriamnam zong a zuarh peng, tiah theih a si.
