Press "Enter" to skip to content

Chin Ramkulh Kahdohnak Ah CDF Pasaltha Hna Nih Ralhrang Ceilak An Thah Than Hna

Chin ramkulh le Magwe ramṭhen aa tlaihnak Saw peng Suailuaicin khua le Kanpetlet peng Masahtwe khua ah nihin Febuary 28 zing sml 8:00 in zaanlei 4:00 tiang SAC ralhrang le CDF – Kanpalet karlak kahdohnak a chuak i ralhrang 10 nak tlawmlo an thi, tiah theih a si.

SAC ralhrang pawl nihcun an hawile ruak cu lamkam thlam pakhat ah an pumh hna i, a thlam cop in an ruak khanghnak ah an hman colh.Lamkam i ramcar le burbuk pawl zong an duah pah thluahmah, tiah CDF- Kanpetlet nih an chim. SAC ralhrang run pawl cu

CDF- Kanpetlet nih pyukya in kan kah lengmang hna caah faak ngai in kahdohnak a chuak, tiah CDF- Kanpetlrt nih an chim. Nihin february 28 kahdohnak ah Laungsi PDF zong nih an an bawmh tiah theih a si. Credit; The Chin Post

Case 7 in SAC ralhrang nih tazacuai mi Sagaing ramṭhen Chief Minister Dr. Myint Naing cu kum 21 thong thlak ding in SAC ralhrang nih bia an chahpiak, tiah theih a si. CM Dr. Myint Naing cu Mongya thonginn ah an thlak i thonginn chung biaceihzung nih nihin, Febuary 28 ah kum 21 chung thong tla ding in bia a khiah piak hi a si.

CM Dr. Myinh Naing cu SAC ralhrang nih phunrelnak caang 505(b) tel in case 7 in taza an cuai, Phungrelnak caang 505(b) ca ah 2021, December 20 ahkhan kum 2 thong tla ding in bia an rak chah i nihin february 28 ah case 7 dihlak fonh in bia an chahpiak chap hi a si.

“Sagaing ramṭhen CM Dr. Myinh Naing thong an thlak ruangah teirul kan cham lai, a dik lo ti a hngalh ko nain SAC ralhrang lei ṭang in biachattu biaceihbawi zong nih a in ve te lai. Mipi le ramkhel thiamsang hna an him lo bantuk in SAC ralhrang dirkamhtu zong an him ve lai lo,” tiah Sagaing ramṭhen PDF ralkap pakhat nih a chim.

Relchap; Student Unions Chungtel 4 SAC Ralhrang Nih Kum 3 Cio Thong Thlak Lai: SAC Ralhrang uk duhlo langtertu University Student Union chungtel minung 4 cu SAC ralhrang nih phungrelnak caang 505 (a) in thong kum 3 cio tla ding in bia an ceih hna, tiah Student Unions phu sin in theih a si.

Thong tla ding in bia an ceih mi hna hi Ko Wai Yan Phyo Moe, Ko Thu Ta Soe le Ko Zaw Htet Naing hna an si i, 2021 December 10 ah khan ram pumpi silent strike SAC ralhrang uk duhlo langhternak ah aa rak i tel mi an si i SAC ralhrang nih an tlaih hna hnu ah an tukvelh hna, tiah theih a si.

Thong tla ding in bia ceih a tong mi hna lak ah hin All BurmaFederation of Student Unions vice president Ko Wai Yan Phyo Moe cu a voi 2 nak thong an thlak a si i, a voi 1 nak hi 2021 December 29 ah thong kum 2 le thlakhat tla ding in bia an rak khiah bal cang. Cu leng ah Mayangon peng (မရမ်းကုန်း) biaceihzung nih phungrelnak caang 505 (a) le 19 in taza an cuai rih, tiah theih a si. The Chin post

Be First to Comment

Leave a Reply

Your email address will not be published.