Chin Tlangval Pate Nih A Tonmi Cu Khuaruahhar Bak A Si Ko

Hi a cunglei biatlang tawite hi chungkhar nih an i bochan tukmi an fapa a tlau ni a thaizingah chungkhar hna sinah phone chawnh in an chimhmi hna bia a si. Biatlang tawite a si ko nain chungkhar caah nunchung lungfahnak a petu a si ai!

Thilsining cu hitihin a si. Jan 27 ah khan kum 29 a simi Chin mino pakhat cu Kalaymyo Thazin sang in Tahan i Haimual mawṭaw dinhnak pawngah a ummi a pi le inn ah a va leng. A pi le inn in zanlei 6:00pm ah a lawi, asinain inn ah a phan ti lo. Cu zan ah cun a chungkhar nih palek sakhan ah mitlau thawng an thanh hna i siizung le hmundang dang ah an kawl nain an hmu lo.

A thaizing Jan 28, zan suimilam 8 hrawngah a chungkhar cu mizeimaw nih phone a vun chawnh hna. Phone chungah cun pa pakhat nih “Hihi…..te inn a si ko lo maw? Sing 40 in maw nan rak tlanh lai, asiloah kan thah lai dah” tiah a chim i phone a thlak colh.

A chungkhar cu lungrethei in awlokchong in an um i a thaizing Jan 29 ah ihkhun 100 a ummi ralhrang siizung ah an va kal. Ṭuanvo ngeitu hna sinah thilsining an chim i miruak an chiahnak hmun ah an kalpi hna. Maw ka thin! An dawt tukmi le an i bochan tukmi an fapa ruak cu plastic in an tuam i hri in an rak ṭemmi cu an hmuh.

A ruak cu tangka liam loin an lakter hna. Asinain a phone le a motor cycle 125 a tharmi te cu an lak piak. Motor cycle 125 a hlun ngai cangmi pakhat tu a chungkhar cu an pek hna.

Inn ah an fapa ruak cu an phoih i an zoh tikah a hmai fak ngai in a phing, a hnarruh a kayak, a kut hri in an khih/rehnak hmaneh an um. Cun a hnulei in kuanfang pakhat a lut in a hmailei a paw in a thawinak neh a um fawn. Cun kuanfang luhnak neh pakhat an hmuh rih.

Hi Chin tlangval pate hi payan (ပန်းရံ) ṭuan in chungkhar a zohkhenhtu a si. Hringtu a pa cu thi-thlum le zun-thlum zawtnak in a thi cang. Hringtu a nu, naupa pakhat le farnu pakhat he khua a sami an si. Fa upa cem a si bantukin a pa um lo hnuah a nu le a naule a zohkhenhtu, a cawmtu a si. Crd; the chin post