Chindwin Tiva Ah Ralhrang Riahcaw A Phor mi Tilawng Mipi Ralkap Nih An Kah Hna
Chindwin tiva ah Mongwa in a rak kai mi riahcaw a phortu ralhrang tilawng cu mipi vengtu ralkap hna i bawm nih nizan January 23 ah Kani peng, Muhngaw(မုဌော) le Ngawngpinwin(ညောင်ပင်ဝန်း) khua karlak ah an kah hna. Hi kahdohnak ah hin ralhrang lei in ralbawi senthum pakhat le midang 4 an thi, tiah theih a si.
“Kahdohnak hi January 22 zanlei in aa thawk cang. Zaan ah i kah deuh a si caah a thi mi fiang in kan thei kho lo. January 23 zingka suimilam 11:00 hrawng i kahnak ah ralbawi senthum pakhat le midang 5 an thi, mipi ralkal nih an kah mi hna hi tilawng 9 an si,” tiah Kani-PDF in chimphuannak nawl ngeitu pakhat nih Yangon Khat Thit media ah a chim. Cu ralhrang tilawng pawl cu Kani-PDF, MPDF, Golden Triangle Forces le M&K The Boys phu aa fonh mi nih an kah hna tiah theih a si.
THAWNGPANG DANG: Caan Tawite Chungah NUG Bond Cu Ting 5000 mmk Man An Zuar ; San Fancisco ah NUG Prime Minister’s Cup (pumpululh) laksawng peknak an tuah i, hi lio ah hin NUG bond zuarnak an ngei chih. US dollar 277,100 man leng an zuar khawh, tiah theih a si.
American ram San Francisco khua ah January 23, zarhpini ah an tuah mi NUG prime minister’s cup pumpululh zuamnak laksawng peknak le Bond zuarnak cu Pan Sae Loe(ပန်ဆယ်လို) le a ṭuanpi hna nih an tawlrel tiah theih a si. Dollar 100 in dollar 5000 man tiang Bond cu an zuar i tlap 500 a dih tiang minung i tlang in thazaang an kan pek, tiah Pan Sae Loe (ပန်ဆယ်လို) nih amah social media ah a langhter.
Myanmar ramchung um mipi hna ca ah NUG Bond zuarnak cu caan sining nih a pek rih lo caah ramleng um Myanmar mipi deuh lawng zuarh an si nain, ramchung um mipi cheukhat hna zong cawktermi tampi a um tiah theih a si. Cu an zuar khawh mi dollar rate cu Myanmar phaisa in ting 5000 leng man a si i. Cheukhat cu tlap hnih tlap thum tiang a caw mi an um. Phaisa chuak zat dihlak cu NUG tuanvo ngeitu sin ah thawngthanh a si cang, tiah Pan Sae Loe (ပန်ဆယ်လို) nih a chim. AkonThi
