Chinram Falam Ah A Panhmi SAC Ralhrang Phu Hna Cu Bomb Puah An Tong
Nizan, February 23 zing slm11:00 hrawng ah Tedim peng Taingen khua in Falam lei ah ke in a kal mi SAC ralhrang hna cu Zawngkong khua pawng ah PDF-Zoland le CDM-Siyin in bomb in an phomh hna.
“Nizaan ah Taingen in Falam lei ah ke bak in a kal mi ralhrang pawl cu bomb kan puah hnawh hna i 3 hrawng cu a khen bak hna,” tiah PDF -Zoland ralkap pakhat nih a chim. Zaanlei slm: 4:00 hrawng ah riahcaw le ralkap zeimawzat a van phurtu ralhrang mawṭaw 18 ruun zong Chin Ralkap phufonh nih bomb in an puah ṭhan hna i mawṭaw pakhat cu a rawk, tiah theih a si.
Hi mawṭaw ruun pawl hi lam naih deuh in kah an har pin ah tukar hrawng khualtlawng an um tuk lem lo kan ti caah bomb in kan doh hnanak hi a si, tiah PDF Zoland ralkap pakhat nih a chim chih. February 15 lio zong ah kham Falam in Kalay lei ah a ṭummi ralhrang maw 23 cu PDF- Zoland le CDM-Siyin nih bomb an rak puah hnawh hna i ralhrang 10 nak tlawm lo cu an ruak zong laak awk ṭha loin aa ṭhenṭhek dih.
SAC Ralhrang nih rian an khinh mi Chin State SAC Pu Ngun San Aung nihcun Min Aung Hlaing sin ah, “Sniper in kan in kah lai tiah an ka hro peng,” tiah a chim. February 13 i tuahmi SAC meeting ah Pu Ngun San Aung nih hrocer le ṭhihphaih a tonnak kong cu Min Aung Hlaing sin ah a chim, tiah theih a si.
“Tu kar hrawng hi hrocer ka tong tuk, Ka chungkhat sahlawh rualchan tiang in hrocer an tong, Sniper in kan in kah lai, tiah an ka hro, CM ṭuan ti loin Mizoram ah kal ko mawṭaw hlanpiak na si, tiah an ka hrocer pin ah voikhat le bang cu rawl ka einak khaan chung ah Sniper in meiceu sen in an ka tinhmi ka hmuh i thlalang awng ka van on i a tlau ṭhan,” tiah Pu Ngun San Aung nihcun Min Aung Hlaing a chimh. Cu SAC meeting ahcun Rih zong hi thinphang a si i Rih chekgate ah kan ralkap umloin CDF lawngte an um caah ralkap kan chiahpiak tiah Min Aung Hlaing cu a nawl chap, tiah theih a si.
Depeyin Gwe Pin Kone Ah Minung 15 An Tlaih Hna: Depeyin khuapi, Gwe Pin Kone (ဂွေးပင်ကုန်း) khua cu ralhrang phu nih nihin February 24 ah khuachung minung 15 cu a ruang um loin an tlaih hna i, minung 3 cu ralkham ah an hman hna. Ralkham i an hman mi pathum chung in minung pakhat cu an thah, tiah Voice of Depeyin i upa pakhat nih Yangon Khit Thit ah a chim.
Cu ralhrang phu hna cu Depeyin khuapi Saipin ( စိုင်ပြင်) khuapi in an rak ra i thazang 30 hrawng an si, Gwe Pin Kone khuachung inn cheukhat cu an hrawh hna i facang pawl le cycle pawl cu an duahpiak hna, tiah theih a si. Khuachung ah lut in khua mi 15 cu an tlaih hna i minung pathum lam hmuhsaktu ah an kal pi hna. Saipin khuapi a um mi meithat zung pawng ah an tlaih mi pathum chung ah pakhat cu a ruak in an hmuh. A thi mi pa cu Gwe Pin Kone khua mi a si i a min cu an thei rih lo, tiah Voice of Depeyin i upa pakhat nih a chim.
Crd: The Chin Post
