Chinram Kanpetlet Pengah Kahdohnak A Fak Caah Mipi Nih Harnak Fakpi An Ton Cuahmah Lio A Si
Kanpetlet Peng Kahdohnak Ruang Ah Mizapi Eidin An Har Cang! Chin ram, Kanpetlet peng Sanmata, San Ingnu khua le a pawngkam khua cheukhat hna ah SAC ralkap le CDF kahdohnak ruang ah Kum upa, ngakchia, Mizaw le Naupawi lio hna tel in minung 900 hrawng cu ramlak ah an i dor hna i kahdohnak caan a sau caah mizapi eidin an har cang, tiah theih a si.
“Kanpetlet ah hin February 7 thok in SAC ralkap le CDF an i kah caah ral kan zaam, a hlan zong ah SAC ralkap pawl khuachung an luh ahcun lopil ah kan zaam tawn i an kir hnu ah kan tlung ṭhan tawn i eidin ding tlawmpal kan i ken tawn. Atu tan cu sautuk an i kah caah kan i ken mi sii-ai le eidin a dih cang i a har ngaingai cang,” tiah ralzaam pakhat nih cun a chim.
Atu tan kahdohnak ah hin Mindat khuachung ummi SAC khah-Lah-yah -274 Brigade le Kyauhthuh um mi ralkap hna nih hriamngan in an kah hna caah Sanmata khuahlun inn 9 a kang, tiah theih a si. March 15 zing zong ah SAC ralkap pawl cu Sanmata khua ah lut in, inn an baoh i an duah hna caah Sanmata lawng siloin a pawngkam khua mi zong an zaam dih.
Kahdohnak a sautuk i, a fahtuk fawn caah CDF Kenpetlet nih zenthong le ralhriam an chambau pinah Mizapi himnak ca ah ti in CDF Kanpetlet Headquarter camp zong caan karlak chung an chuahtak, tiah theih a si. Credit: The Chin Post
PDF Nih Khualtlawng Motor An Khangh Tiah Thawng Dik Lo An Thanh. Myawadi-Kawkariah kalmi Asian lamthar ah KKO le PDF nih khualtlawng motor an khangh tiah Nang Moh Moh Akari timi Facebook account nih March 14 ah a post.
”KKO phu le PDF ralhrang hna nih khualtlawng motor mei in an khangh” ti tlangtar in Nang Moh Moh Akari timi nih a thanh. Nang Moh Moh Akari nih ” KKO phu le PDF ralhrang i fonh in March 12 ah Myawadi -Kawkariah kal Asian lamthar ke 10 ngei motor pakhat cu Myawadi in Yangon lei ah a thawhmi Pakhat ke 22 ngei zong meithal in an kah i a dir hnu ah mei un an khngah, lung a nuam lo” tiah a tial.
Zei ruangah ti ahcun March 12 ah Myawadi -Kawkariah Asian lamcungbah khualtlawng motor cu mei khangh a si a dik ko nain hi meikhang tu hi zei bantuk phu an si hngalh a si lo. Ref; 21 the chin time
Kayinni ramkulh ah mipi ralkap le ralhrang kahdohnak cu March zarhnihnak tiang ah pehzulh in kahdohnak a chuak, ralhrang lei in 25 an thi hliammi an tam tiah KNDF nih nihin ah cathanh an chuah.
Ralhrang nih vanlawng in an kah hna nak le kaphnih kahdohnak ah KA, KNDF fonh in minung 6 an nunnak a liam tiah an fehter.
Cu hlei ah ralhrang hna nib Mobe-Demosi lam ummi, Pupha khua, Kunta le Dawngunkha veng, Loikaw-Tawngngu lam pi Nawnpalay khua ah ralhmai an ser.
March 9 Pupha khua ah hmunkhuar mi ralhrang cun Kayinni ralkap fonh nih an kah hna i hliammi an tam, Pupha khua le Tesulay khua inn 10 mei in ralhrang nih an khangh. March 9 in 14 tiang Loikaw peng Linphu khua le Thikayi khua pawng ah hmunkhuar mi ralhrang cu mipi ralkap fonh in an kah hna i ralhrang thi an tam.
March 10 Mobe peng kahdohnak ah ralhrang motor bomb puah an si i ralhrang motor Pakhat aa rawk. Ralhrang he kahdohnak a chuahnak hmun Loikawi peng, khuate hna cu ralhrang nih hriamngan kahthlorh in an kah tiah KNDF nih an thanh.
March 1 in March 15 tiang zarhnih chungah KNU Brigade 5 hmunhma ah kahdohnak voi 167 a chuak tiah KNU Brigade 5 nih March 6 ah cathanh an chuah. Kahdohnak ah ralhrang 54 an thi i 40 nih hliam an tuar tiah an langhter fawn.
KNU lei in minung 7 an nunnak a liam 16 nih hlian an tuar tiah an langhter fawn. Ralhrang nih Kayin ramkulh Phapon pengkomh, Kamamaung khua meng 21 ah minung umnak inn cun helicopter in an kah hriamngan in voi 200 hrawng an kah tiah KNU Brigade 5 nih an langhter.
Mipio kal mi hna cu hriamngan nih a hliamh hna caah minung 15 an nunnak a liam 4 nih hliam an tuar tiah an langhter. Ralhrang motor 12 KNU kuttang KNLA nih an hrawh, ralhrang lei cu ramri hngak BGF he an i bawm tiah KNU Brigade 5 nih an chim.
Thawngdang:Phaung Pin Peng Chungah Phung Ning Loin Sui Kawltu Hna Sinah Ralrin Pek An Si. Sagaing ramthen cunglei Phaung Pin peng chung Chin Dwin tivapi, Nat Sat khuafonh leikap ah ralhrang he i fonhin tiva chungum lung le thetse kan kawl tiah hrokhrol in chim mi cu phung ning loin sui kawltu hna nih hi ca nan hmuh le cangka in cun pehzulh in tuan ti hlah u.
Pehzulh in nan tuah sual ahcun nan cungah a chuak dingmi harsatnak le vanchiatnak kongah kanmah mawh a si lai lo tiah thawng kan in thanh hna tiah ralrin peknak an tuah.
