Press "Enter" to skip to content

Chinram, Tedim Peng Kahdohnak Thawngfiang, Mipi Hriamtlai Phu Nih SAC Ralhrang Tam Taktak An Thah Hna

Tidim peng Hiangzing khua kahdohnak kha Jan 12-22 tiang a rau i ni 10 chung an i kap tinak a si. Cu ni 10 chung kahdohnak ah ralhrang 80 leng an thi, miphun ralkap lei pathum an thi i hliamtuarmi 9 an um tiah Jan 24 ah PDF-Zolang nih an thanh. Hiangzing khua cu Kalay-Hakha lampi kam ah a um i Kalaymyo in meng 20 hrawng lawng a hlatmi khua a si.

Hiangzing kahdohnak ah Chin miphun ralkap in CNA, Zoland-PDF, CDM-Siyin, CNDF, Zomi – PDF, People Defense Army (PDA), Zogam Army, CDF – KKG le PDF – Kalay hna an i bawm. Ralhrang le tualchung hriamtlaibu kahdohnak ah miphun ralkap tambik an i fonh a si. Hi ni 10 chung kahdohnak cu Jan 12 i Kalaymyo in ralhrang 100 renglo Chin ramkulh lei an kainak khan aa thawkmi a si.

Jan 12 ah a kaimi ralhrang hna cu Theizang khua pawngah an riak i Jan 13, zinglei 10:00am hrawngah miphun ralkap CDM – Siyin, PDF – Zoland, Zogam Army, PDA le CNDF nih an kah hna i ralhrang 7 an thi. Miphun ralkap hna cu hliamtuar um loin hnu an tolh ṭhan kho. Cu ṭhiamṭhiam chunhnu 2:00pm hrawngah Theizang coffee dum i inn pathum cu ralhrang nih mei in an khangh.

Jan 14, zinglei 10:00am in zanlei 3:00pm tiang kahdohnak a fak i ralhrang 1 a thi, hliamtuarmi an tam tiah CDM – Siyin nih an thanh. Rahrang a thimi an tam caah Jan 15 ah Kalay University in ralhrang nih hriamngan in an kah hna pinah vanlawng pahnih in bomb an thlak caah miphun ralkap 7 cu fak ngai in hliam an tuar. CNA in Sergeant Thang Pui zong a hliam a fak ngai i Jan 16 ah a nunnak a liam tiah theih a si.

Jan 17, zinglei 10:00am hrawngah Kalaymyo le in an hawilei bawmh dingah a rak kaimi ralhrang mawṭaw ngan pathum le sniper meithal aa telmi mawṭaw hme pahnih cu miphun ralkap nih an kah hna caah ralhrang 10 an thi, hliamtuar zong an tam caah Kalay lei ah an kir ṭhan.

Jan 10 ah Kalay University le Kalaymyo Taungphila tlang cungin zinglei 8:00am ah ralhrang nih hriamngan in Chin ram lei cu an kah. Miphun ralkap le ralhrang kahdohnak a um nain a fak lo. Ralhrang hna cu umhmun an khuarnak in Hiangzing khua in an chuak-lang ngam lo tiah theih a si.

Jan 19, chun 1:30pm hrawngah Tidim peng Kanedy tlang ah Helicopter in ralhrang zeimawzat le thilri an thlak. Cu ni zanlei ah kahdohnak a um ṭhan i ralhrang 2 an thi. Falam in Tidim lei ah a kalmi ralhrang 180 renglo hna cu CNDF nih lampi ah an kah hna i hmaifong kho loin Lungbang khua ah umhmun an khuar.

Jan 21, zinglei 1:45 hrawngah miphun ralkap hna nih Hiangzing khua ah a ummi ralhrang cu an kah hna i ralhrang 15 an thi, hliamtuarmi zong an tam. Miphun ralkap lei in hliamtuarmi pahnih an um nain an fak lo. Cu ni ah cun an hawilei bawmh dingin Tidim khua in ralhrang 100 hrawng Hiangzing lei ah an rak ṭum.

Jan 22 ah Kalay University in Tidim peng Taingen le Hiangzing karlak hmunhma hna cu ralhrang nih hriamngan in an kah. Cu ni zinglei 8:30am ah ralhrang nih Helicopter pahnih in bomb tam ngai an thlak fawn. Tidim lei in a rami ralhrang hna zong lampi zulh si loin ramlak in an ra. Ralhrang nih lamhla kahnak 60 mah-mah, 120 mah-mah le 155 mah-mah pin ah Helicopter zong an hman fawn. Minung thazaang le hriamnam an i thlau tuk caah zanlei 5:00pm hrawngah miphun ralkap hna cu Taingen in chikhat hnu an tolh. Cu ni kahdohnak ah ralhrang 40 hrawng an thi i hliam a tuarmi cu an tam taktak tiah miphun ralkap lei nih cathanh an chuah.

Hiangzing kahdohnak ah bomb puahnak in PDF – Zoland in Tg.Kap Suan Mung@Mung No CNA in Salai Cung Lian Sang an nunnak a liam. Ni 1o chung Hianzing kahdohnak a dih hnu Jan 28 ah PDF – Zomi, People Defense Army (PDA), Civic Defense Miliatia (CDM-Siyin) le Zogam Army hawikom sinak an tuah i raldoh zong kan cawngṭi lai tiah an thanh.

Nawlngeinak lak hnu in January, 2022 tiang Chin miphun ralkap le ralhrang kahdohnak ah ralhrang a thimi dihlak 1019 an si i miphun ralkap 60 renglo nih an nunnak an pek ve tiah theih a si. Crd; the chin post

Be First to Comment

Leave a Reply

Your email address will not be published.