CNA Kan Ralkap Hna Nih Tonzang Peng SAC Ralkap Sakhaan An Lakmi A Si Ko Hih
Tonzang Peng SAC Ralkap Sakhan Pakhat Chin National Army (CNA) Nih An Laak. Chin ramkulh, Tonzang peng ah SAC ralkap nih umhmun an khuarnak Darkhai sakhan cu March ni 17 ah Chin National Army (CNA) nih an laak tiah theih a si.
SAC ralkap an umnak Darkhai sakhan hi no. 268 ke ralkap nih hram an bunhnak sakhan a si i, Chin ralkap CNA nih an kalhnawh hna lioah SAC ralkap cu an rak zaam dih cang caah, meithal zun khat hmanh puah hau lo in cu sakhan cu an laak khawh tiah theih a si.
“Kaphnih kar kahdohnak cu a chuak lo, sakhan kalhnawh an si lioah SAC ralkap hna nih an sakhan cu an rak zaamtak cang caah meithal puah hau loin cu sakhan cu CNA nih an laak i um awk ṭha ti lo ding in an sakhan cu an khangh dih” tiah tualchung media hna nih an langhter. Crd; The Chin Post
Magway ramṭhen, Pakokku peng Myitchay(မြစ်ခြေ)- Kyunchaung hrambunh tualchung hriamtlai Daungyin Twe(ဒေါင်ရင်သွေး) pahkahphah chungtel 5 cu SAC ralkap nih March ni 17 ah tlaih in an thah hna tiah theih a si.
Kum 20 tluk simi Ko Makyi le Ko Yama(kum 22) cu raltuknak kong he pehtlai in thirleng he khualtlawn an i timh lampi ah SAC ralkap tlaih in an thah hna. An phone cu an laakpiak hna i bawmtu ding ah tualchung hriamtlai phu lei minung cu an auh hna, bawmh ding in a kalmi tualchung hriamtlai phu chungtel minung 3 cu SAC ralkap nih an kah hna caah an nunnak a liam ve tiah theih a si.
“An phone cu hmang in kan cycle datsi a dih caah kan put uh tiin an kan hlen, an kan auhnak hmunhma tiang kan phanh hlan lampi ah bawh in SAC ralkap nih an kan kulh i an kah hna” tiah pahkahphah lei hruaitu Ko Kyaw Kyi nih a chim.
Bawmtu ding in a kalmi pahkahphah hruaitu telh in ralkap 7 nih meithal 2 lawng an i put, SAC ralkap minung thazaang 50 leng nih kulh in an kah hna caah minung 3 an nunnak a liam tiah theih a si.
Tualchung hriamtlai Daungyin Twe phu chungtel 5 cu SAC ralkap kut in an nunnak a liam pin ah, luatnak a hmutu pahkahphah hruaitu telh in chungtel 4 zong nih kuan hliamhma an tuar tiah theih a si.
