Press "Enter" to skip to content

CNA Le SAC Ralhrang Kahdohnak Ah Chin Pasaltha Nih Ram Le Miphun Caah A Nunnak A Pek

Dokthek khua pawngkam kahdohnak ah CNA Runno pakhat nih nunnak a pek than, March 3, 2022, Kalay in Hakha lei ah luh aa tim mi SAC ralhraang hna cu Chin National Army (CNA) nih an kah hna i, cu raltuknak ah cun CNA ralkap in

Runno Salai Thiang Bik Lian nih miphun le ram ca ah a nunnak a pek than tiah kan theih. Council ralhraang lei in a thi mi le hma pu an tam tiah theih a si nain zeizat set dah a si ti hngalh a si rih lo. Credit; The Hakha Post

Covid khamhnak sii a voi tling tein aa chun cangmi 2100,000 leng an si cang tiah SAC nih a thanh, 2022 March 3 – Kawlram pumpi ah covid-19 a karh chin lengmang bantuk in covid khamhnak sii a voi tling tein aa chun cangmi 2100,000 leng an si cang tiah The State Administration Council (SAC) tangah a um mi Ministry of Health nih a thanh.

Ministry of Health cathanhnak ahcun, peng kip le ramṭhen kip ah chunh a si i March 1 tiang ah covid khamhnak sii voikhat a chun cangmi hi 2.62 millions leng, a voi tling tein aa chun cangmi 21.03millions leng in a zaapi te 23.65millions leng an si cang tiah a langhter. Min Aung Hliang nihcun, a luancia 2021 kum dongh ah, Kawlram pumpi in 50% leng nih covid khamhnak sii an i chun cang tiah a chim.

Asinain, mipi hna nih hramhram uknak a latu phu cu an zumh hna lo caah covid khamhnak sii aa chunmi hi an tlawmte i tuzarh chung hmanh ah a thong leng nih covid zawtnak i chawnh a si caah next wave a phanh ṭhan lai hi thinphan cio a si. Kawlram pumpi in a tutiang ah covid zawtnak aa chawnhmi hi 590,000 leng an si i a thimi hi 19,375 an si tiah Ministry of Health nih a langhter.

2021 December 28 ah UAE, Dubai bawmhnak vanlawng in a rak lutmi Kawlram mi 4 sin in Omicron zawtnak rungrul an hmuh tiah thawng theih a si.
A tulio Kawlram pumpi in Omicron zawtnak in a zawmi minung 350 deng an um tiah Ministry of Health nih athawngthanhnak ah a telh. A tu bantuk cazin hi CDMers pawl nih dirhmi sizung,

siikhaan, laboratory pawl telh loin SAC kuttang ah a ummi sizung pawl lawngah zohfelmi a si caah a fiangmi cazin cu theihkhawh a si rih lo.
Ramkomh Kawlram ah hramhram in uknak lak a si kumkhat leng chungah ramkhel lei, chawleh lei, pawngkam kong le mipi ngandamnak zohfelnak cu a ṭumchuk chinchin. NUG nih thanhmi Covid-19 zawtnak he aa pehtlaimi cazin ahcun, sizung a kai kho lomi, online in a thlopmi, SAC nih a thimi le a zawmi cazin ṭha tein a langhter khawh lomi a fian tuk caah Covid-19 runvennak a tawlrel dan hi a dik lo tuk tiah a ruahdamh. The Hakha Post

Hramhram in uknak lak a si hnu kumkhat leng chungah, kahdohnak pawl ruang le himnak dirhmun caah tiin thlanglei Myanmar ah inn le lo a zaamtakmi 220,000 leng an um cang tiah United Nation High Commissioner for Refugees (UNCHR) nih a thanh.

Inn le lo a kaltakmi hi Kayah ram in 92,400, Karen ram in 68,400, Shan thlanglei in 60,500, Mon ram in 7,500, Tanintharyi ramṭhen in 2,600 le Bago ramṭhen in 800 hrawng an i tel tiah a langhter.

Thlanglei Myanmar ah ralhrang le tlangcung hriamtlai hna, mipi hriamtlai hna karlak ah kahdohnak a fah tuk caah Demoso le Pekhon peng i mipi 3,370 hrawng cu Kayah ram Demoso le Shan thlanglei Hsi Hseng, Wapsauk, Pekhon le Pinlaung peng hna ah February 16 te khan inn le lokaltak in an zaam cang tiah theih a si.

Karen ram, Laykaykaw ahcun a luancia February 18-19 chungah a caan si lo piin ruah a teh tuk caah ti a lian. Minung le minung bawmhchanh duhnak thinlung te he eidin, sii le i dornak an ngahkhawhnak hnga i bawm cio hna u sih tiah UNCHR nih a thawngthanhmi chungah a telh chih.

Minung 7,000 hrawng hi an umnak hmun ṭhing ah an kir than cang tiah theih a si. 2022 January thla thokin a kirmi chungah hin, Karen ram,Kawkareih peng ni thlanglei in minung 4,740 le Kayah ram, Loikaw peng in Shan ram nithlang lei ah chikhat aa ṭhial chungmi pawl zong an i tel.

A tu a buai cuahmah mi kahdohnak he kan zoh chih a si ahcun, Karen ram i a rak kirmi pawl hi chikhat caa lawng a si lai, tlikzaam ṭhan an hau te lai tiah UN nih a ruahdamh. Credit; The Hakha Post

Be First to Comment

Leave a Reply

Your email address will not be published.