CNA Le SAC Ralhrang Kar Kahdohnak A Chuak Than
Ramthlo le Dokthek kar ah CNA nih SAC ralhrang bomb in an kah hna, March 2, 2022, Kalay in Hakha lei panh in a kalmi SAC ralhrang hna cu CNA nih Ramthlo le Dokthek kar ah bomb in 2022 March 2 zinglei sang ah an kah hna tiah thawng kan theih. Thawng kan theih ning ah, “Atu SAC ralhrang a rak kai mi hna hi Ration a chantu ding an si men lai tiah kan zumh.
Cun tuzing hi bomb in kan thuat hna i a thi le aa hliam mi fiangin kan thei lo,” tiah kan theih. Atu a rak kai mi hna hi Lungrang pawng ah CNA nih an kah hna i Falam le Hakha kar kal ding ni thum an rau cang. Lungrang pawng kah tan ah SAC ralhrang lei a thimi an tam tiah kan theih. Credit; The Hakha Post
Ukraine ram Mariupol khuapi cu nizaan, March 1 in electric mei a mit nain European Union (EU) ram pawl nih Ukraine ram caah Electric an pek lai. Mariupol khuapi hi ‘Soviet Union’ chan lio zong ah Russia nih Electric thazaang a rak i laknak hmun a si. Ukraine nihcun Soviet Union chan lio tein Russia he an rak i hrawm mi Electric cu an phih colh.
EU Electric power i hrawm kho ding in Russia nih a tuk hmasa bik ni khan hneksaknak an rak tuah cang. Cu hneksaknak ahcun Ukraine ram lawng siloin Moldova ram zong ai tel chih. Atu bantuk in EU nih Electric mei a pek ahcun Ukraine ram cu Russia nih a control mi Electric hmang ti lai lo, tinak a si. EU Electric lei lutlai hna zong nih a ran khawh chung in Ukraine mei pe ding in Febuary 27 ahkhan bia an rak chah cang.
Japan Ram mi 70 Ukraine Caah Ral An Tu Lai!: Russia nih Ukraine tuk ruangah Ukraine ram mi, a duh mi poh nih hriamtlai in raltuk khawh si, tiah Ukraine nih a thanh. Ukraine miphun lawng siloin ramdang zong in Ukraine ralkap he raltuk a duhmi an um; Japan ram zong in minung 70 hrawng nih Ukraine caah raltu ding in an sok, tiah theih a si.
Ukraine President Zelensky nih February 28 ah International ralkap phu pakhat dirh ding in nawlnak a tuah hnu in Canada le US ram hna in mah pumpak lungtho tein Russia ral tuk ah tel ve duh in, halnak a tuah mi an tampi, tiah theih a si. Nizaan, March 1 ah Japan miphun ralkap hlun( pension) 50 hrawng le civil mi 20; an dihlak 70 hrawng le French ralkap 2 hna nih anmah lungtho tein Ukraine bawm ding in halnak an tuah, tiah theih a si.
Ukraine Embassy nihcun Febuary 28 ahkhan Ukraine caah raltuk a duh i a sokmi Japan mi hna cung ah lunglawmhnak social media in a langhter i, Sok a duhmi cu Japan Cozah ralkap sin ah Experience a ngei mi a si loah training a ngei ciami si lai,” tiah a thanh chih.
Ukraine Nih China(Tuluk) Bawmh A Hal: Ukraine Foreign Minister Dmytor Kuleba nih Russia he kahdohnak daihter ding ceihhmainak ding ah China ram cu ruahnak cheu ding in Nizaan March 1 ahkhan Chinese Foreign Minister WangbYi sin ah phone a chawnh, tiah theih asi.
“Ukraine nih cun China ram he pehtlaihnak ṭha ngeih kan duh i Russia he kahdohnak daihter ding ceihhmainak ah China i thlak ve ding in kan i ruahchan,” tiah Kuleba nih cun a chim, tiah China thawngzamhnak hna nih an langhter. Ukraine le Russia tukdohnak kong ah China cu kap/ṭanh ngei lo in a dir. Cucaah Russia le Ukraine karlak i China ai thlak a si zong ah ṭanh hlei ngei loin a dir ṭhiam lai, tiah ruah cio a si. Credit: The Chin Post
