Press "Enter" to skip to content

CNF, KNO, KNU Le KNPP Hna Cu Min Aung Hlaing Nih Biaruahnak Sawmmi Ah Kai An I Tim Lo

SAC Sawmmi Biaruahnak ah CNF, KNO, KNU le KNPP Kai Tim Lo. May 6 | The Chin Journal, SAC haotu Min Aung Hlaing nih tlangcungmi hriamtlai hna he biaruahnak ngeih ding in sawmnak a tuah nain KIO (Kachin), KNU (Kayin), KNPP (Kaya/Karenni) le CNF (Chin) hriamtlai bu hna nih kai lo ding in awaan an langhter. KIO le KNPP nih cun SAC sawmmi biaruahnak ah kan kai lai lo, tiah May 5 ah cathanh an chuah cang.

CNF hruaitu lei zong nih SAC he pehtlaihnak ngeih lo ding in khahlan ah an rak chim lengmang nihin May 6 ah cathanh an chuah i, mipi he fek tein kan dir lai tiah an langhter. KNU chimnak nawlngei Padu Saw Toney nih, “Ahlan i kan rak chim bang khan a si ko. KNU kan dirhmun aa thleng lo,” tiah a chim. “SAC nih remdaihnak biaruahnak tuah an duh ahcun Federal Democracy rampi ser ding in atak in an ttuan hmasa a herh.

SAC Sawmmi Biaruahnak ah CNF, KNO, KNU le KNPP Kai Tim Lo

Cun, mipi cung ah thahnawnnak le serhsatnak a phunphun an tuahmi an ngol a hau i, Myanmar ram daihnak kong ah ramdangmi zong i tel ding in an cohlan hmasa a hau,” tiah Padu Saw Toney nih NUG thawngzamhnak ah a chim. Aluancia April 22 ah Min Aun Hlaing nih tlangcungmi hriamtlai hna he biaruahnak ngeih ding in sawmnak a tuah i, atu tiang ah aho hriamtlai bu hmanh nih kan kai lai, tiah phungning in an thanh rih lo. Crd; The Chin Journal

Thawngdang Relchap; Azovstal Tuknak le Ukraine Dirhmun, Mariupol ah a ummi thir chuahnak sehzung tangin Russia ralkap a dotu Ukraine ralkap pawl cu an temtuartuk cang ko nain a sunghkhan an duh lo i, ‘a dongh tiang kan dir lai’ tiin an commander i a thaisungnu nih a chim. Khuaruahhar lei khi an si an ram caah an i pumpek nak hi.

A ral laimi Monday i Victor Day ah khin Putin nih Russia mipi sinah teinak tling pek a duh hna caah, asiloah an ram ningpi in ral tu dingin thanh lawlaw a duh caah, rilipkap khua Mariupol cu lainawng Russia ralkap nih heh tiah an kah hna.

Thir chuahnak sehzung i Ukraine ralkap hna an commander cu Thursday ah khan a nupi Kateryna Prokopenko nih phone a hei chonh. “Ka va le hi a sungh an khan lai lo. Khuaruahhar thil tlun ding lawng an hngak ko cang” tiin a chim. “Kan dawt zungzal ko lai e, tiin Azov Regiment commander ka va Denys Prokopenko nih a vun ka ti cun ka molh lo lawng khi a si. Byebye timi bia he ai lo e,” tiin Kateryna nih a chim.

Azovstal hmunhma cu Ukraine ralkap nih hehtiah an kham ko rih, asinain Russia nih vanlawng bomhnak he heh tiah an kah hna i, a ningpi in lak an i tim, tiah Ukriane military General Staff nih Friday ah a chim. Victory Day hi Russia calendar ah ramdawtu hna ni philhlonak ni sunglawibik a si i, Soviet Union nih Nazi Germny an tei ni philhlonak an tuahmi a si.

Asinain, thir chuahnak sehzung hi Ukraine nih a kilven khawh rih ah cun, cucu Russia caah sunghnak a hung sih rih lai i, Donbas i ral an tukmi hi a chiatchuah phah te lai, tiah British Defense Ministry nih a chim. Azovstal steel plant ah hmunhma a khuarmi Ukraine ralkap hi 2,000 hrawng an si, tiah Russia lei nih an chim. Cun mipi zakhat renglo zong an i tel ve lai, tiah ruah a si.

“Hma a pumi ralkap an tam ngai. Asinain a sungh an khan duh hrimhrim lo. Hmunhma an khuar peng ko rih hna. Cu dirhmun cu vun ruat hmanh u! Hngakchia an i tel. Thla hnih renglo chung bomb in heh tiah pehzulh in an kah, pehtlaiin mithi an um,” tiin President Zelensky nih a chim.

Steel plant an sernak layout kong a theimi electrician pakhat sinin bomhnak an lak i Wednesday ah khan Russia pawl an va lut kho, tiah Ukraine Internal Affiars Ministry advisor Anto Gerashchenko nih a chim. “Electrician pa nih cun sehzung tiang a phanmi vawleitang miang cu a piah hna,” tiah a chim.
Russia nih makhngallo in steel plant a kahmi nih hin a tangmi mipi pawl chanhchuahnak a donh, tiin Zelensky nih a chim.

Lamdang kan kawl lio a si, tiin UN Secretary-General Antonio Guterres nih a chim. “Hell bantukin tih a nungmi hi steel plant chungin mipi kan khamh khawh nak lai kan si khawh chungin kan i zuam ko rih lai,” tiin Antonio nih a chim. Hi sehzung hi bomb in kan kap hrimhrim lo, cucaah cuka i a ummi Ukraine pawl hi a sungh vun khan cang hna seh, tiin Kremlin nih a chim.

Anmah Ukraine ralkap lila hi pei mipi zam lo dingin a khamtu an si cu, tiin Russia lei nih an thang an chiat ve hna. Mariupol an sungh ah cun Ukraine i rili hmunhma biapi vialte ai rawk dih lai i, Crimea lei tiang in dai an chong (hmunhma an lak) cang lai i, Donbas pengkulh pumpi cuul in a ralkap a thlah khawh cang hna lai. Donbas lak ding hi Kremlin nih biatak tein ai hmaithlak lio pi a si, tiah ruah asi.

“Kan mipi, cun hma a pumi kan ralkap pawl hi steel plant in vun chuah kho zau dingin kan nawl ko hna. Thitha in an hma kan thlop khawh hna lo caah an thi chuahmah cang,” tiin Azov Regiment ah deputy commander a si mi Capt. Sviatoslav Palamar nih a Ukriane TV ah nawlnak a tuah.

Kan hnung zarh ah khan steel plant chungin mipi 100 renglo cu an chuah khawh hna. Asinain, Russia nih bomb in an kan kah peng caah, cuhlan i mipi luatternak kan i tinhmi vialte kha kan hlawh a tling lo, tiah Ukraine nih an chim. Tutan ral an tuknak zarh 10 chung a tlin hnu in cun, chalei pengkulh chung hmunhma cheukhat cu Ukraine nih an lak than cang i, a tu hi nichuahlei tiang in Russia pawl an vun nawr hna caah,

Putin nih Kyiv lak ai tinhmi cu a thazaang a pelhter ngaingai than cang. Khua kiap ti tluk lo ngacha in Ukraine le Russia ralkap hi an i Kap. Russia ralkap pawl nih Kyiv, Donetsk, Luhansk ah vanlawng in ngiatthlainak (survelliance) an tuah i, Ukraine nih voi 11 kahdohnak an tuah i Russia tanks le hriamnaam bunh mawtaw tampi an hrawh. Cu an sunghmi kongah Russia nih zei a chim rih lo.

Donbas i Russia hlawhtlinnak hi a khul a nuar ngaingai, tiin Pentagon spokesman John Kirby nih cun a chim. Kharkiv lenglei i Russia nih an lakmi hmunhma pawl chuh than dingin Ukraine nih kaudeuh in a lohma kalpi dawh dang in a um than cang. Kharkiv le Izyum in Russia pawl dawi dih dingin an i tim. Naite ah khan,

Russia nih bomb an thlak hnawh mi Kharkiv in meng 25 tiang Ukraine nih an dawi cang hna, tiah Ukraine chief of defense Gen. Valerii Zaluzhnyi nih Thursday ah khan a chim. Moscow nih a ralkap pawl kirter hau lakin, Ukraine nih miakpi in a kah ve lai.

April canceu lio i Ukraine nih Russia raltunak tilawng pil lak i an kahmi kha, kanmah US nih tilawng a umnak hmunhma kan chimh hna caah a si, tiah Thursday ah khan American official pakhat nih a chim. Raltunak tilawng an umnak hmunhma hlathlaipiaknak, hei ti bantuk hlathlainak ceilak kan ngeih piak khawh hna.

Asinain Russia tilawng missile cruiser Moskva kah dingin bia a chattu cu anmah Ukraine hi an si, tiin US official nih a chim. A min bel zapi theih in langhter a duh lo. Victory Day hrawnghrang ah kahdohnak a fak te kho mi a si caah, zarh khat chung hrawng cu ramri lei deuh ah nan zam chungah a tha lai.

Cun mipi umnak hmunhma ah a bu in um hna lai u ci, tiin Ivano-Frankivsk an mayor nih a mipi pawl thazaang a pek hna. Sunday zanlei in Tuesday zinglei tiang Zaporizhzhia ah curfew an thanh. Hi khua hi Mariupol ah a tangmi mipi an zamnak lampi ah a ummi khua a si.

Mariupol ah hin minung 400,000 an um i, ral a tu i tirawl, siai thitha ngei lo in tartahak in a ummi hi 100,000 hrawng an si rih lai, tiah zumh a si. Thursday i vanlawng in bomb kan thlakmi nih ralkap an chiahnak hmunhma, Zarozhne i miakpi le keralkap umnak, Mykolaiv i rokect kahnak an chiahnak hmun telh in Ukraine ralkap sakhaan a ceilak in kan kah, tiah Russia Defense Ministry spokesman Maj. Gen. Igor Konashenkov nih cun a chim.

Ral nih kan sizung dirhmun a hrawh dih. Sizung 400 renglo ai rawk dih cang, tiah UK i charity event he ai pehtlai mi video link ah Zelensky nih cun a chim. “Russia ralkap nih an ukmi hmun ko ah hin sizung le siai kong i kan dirhmun hi a chiakhat hringhran. A fawibikmi sitlang te hmanh kan ngei ti hna lo,” tiin a chim.

Hi ral a dih hnu i Bomb phalh le inn le lo dirhthan rian a ruah tikah, United24 timi min bunh in global fundraising tuah dingin Zelensky nih thawng a thanh. Cu ve rualrual in, Poland zong nih minunghawi bomhnak caah, tiin $6.5 billion chuahpi dingin International Donor conference a tuah ve. Cu conference ah cun European ram tampi hna i an prime minister le ambassadors siseh, ramdang aiawhtu le a cheukhat business pawl an kai hna.

Ral a dihhnu i inn le lo dir thannak caah, tiin Ukraine cabinet zong nih capar an tuah. WWII Marshall Plan bantuk te khan Ukraine ram sersiam thannak dingah kan hawi Western ram pawl nih program nan kan ngeihpiak nak lai kan nawl hna, tiin Zelensky nih a chim. Crd; Chelsea Bawi

Be First to Comment

Leave a Reply

Your email address will not be published.