Cung he Tang he Pale Peng Chungah Buesawtyi Tintan An Peknak Khua Cu Luhhnawh In An Kah Caah A thimi An Tam Ngai Tiah Bo Pale Nih Chim!
Sagiang ramthen Pale peng chungah Buesawtyi tintan an peknak khua Ing Ma Tyi (အင်မထီး) khua cu mipi ralkap fonhmi phu nih luhhnawh in an kahdoh caah a thimi le hliammi an tam ngai tiah Pale Jokers PDF in Bo Pale nih a chim hi a si.
Kahdohnak cu January 30 zanlei sang sml 4:00 in an thawk i, Buesawtyi leikap ah a thimi le hliammi an tam tuk caah SAC ralhrang ralkap nih vanlawng pahnih (2) hmangin a bawmh hna tiah amah nih a chim.
“Cuka Ing Ma Tyi khua cu Buesawtyi umnak khua a si. Tintan an i pek ruangah kan luhhnawhnak a si. Kan kah hna lioah cu khua chung ahcun Buesawtyi 50 tluk an um. An dihlak kan kah khawh hlan deuh ah vanlawng pahnih (2) an rat ruangah hnulei ah kan i zukphiak tiah a chim.
Pale Jokers PDF le Cakei Nak Phu, MRDA, Myaing PDF le PPDG phu i fonhin an kah hnawh hi a si.
January 28 le 29 zongah khan Pale peng chung Yi Phyu Kung khua ah umank sakhan tuahtu SAC ralhrang ralkap le Buesawtyi hna cu PDF fonhmi phu nih luhhnawh in an kah hna caah Buesawtyi le SAC ralhrang ralkap leikap ah (5) nak tam an thi tiah Aung San phu nih cathanh an chuah.
Pale peng chungah SAC ralhrang nih a hruaimi Buesawtyi tintan cu ahohmanh tel lo dingin mipi vengtu ralkap nih vawi tampi ralrinnak an pek cang hna nain nawl ngei loin a kaitu le a chungkhar cu SAC ralhrang ralkap he i tluk tein dantatnak kan in pek hna lai tiah cathanh an chuah hi a si.
Ref: People’s Spring
