Esther Van Hnem Sung Nih Nu Dir Hmun i Ka Dir Hnu in A Tu Tiang A Har Bik in Ka Theih Mi Cu Zan Chiar Tein Ka Fa A Rak Ttah Lio Kha Si

Nu(Mom) dir hmun i ka dir hnu in a tu tiang a har bik in ka theih mi cu zan chiar tein ka fa a rak ttah lio (from birth – 3mo) le hnuk ka phiat lio hi a si. Keimah in tuar ruang ah a harmi si lo in ka fanu ttah le a tuarmi zoh hi a har bik in ka theih.

Nau sem chan a harnak te te hi ka chim lengmang. A ruang cu keimah hi nu le dang nih an i harh ve nak kong an chim tik ah thazaang ka la. An har kha ka lawmh si lo in kei mah lawng retheimi ka si rak si lo ti mi nih thazaang a ka pek. Fa khatnak ngei mi le bang hna cu zei poah hi thilthar lawng te a si tik ah hawi teh hi tin maw an si cio hnga ti mi biahalnak tam pi ka ngei tawn. Cu lak ah “nau hnuk phiat” hi ai tel.

An chim nak ah cun zan thum tiang hi a har bik an ti. Cheu khat nih nu le pa zong ttah bu in kan phiat ko hna an ti. Mi cheu cu zan khat hnih an buai le mah pin khi cu tha ko an ti. Cheu khat cu an mah tein a phiat ti mi zong an um.

Kan nih chung bel zarhkhat chung , zankhua dei ttah bu le hngilh hua ha kho lo in kan i phiat. Ni zan kha a zan khatnak(zan 7 hnu ah) ttah lo tein kan ih khawh a si. Well done my daughter! A har bak ti pin cu chim ding ka ngei ve loh. Ka lung a dong deng lengmang nain a ttah cia mi a pam tuk lai tiah zan khat hnu zan khat kan i hnek. Zarh khat hnu cun ttah lo tein kan van um kho ve cang. Yay!

Nau hnuk phiat lio mi asi lo le a phiat dingmi nan um sual i keimah ban tukin nan i harh ve sual ah cun nanmah lawng nan si loh ti theihter kan duh hna. Cun a caan phak cun a tha te ko lai tiah thazaang pek kan duh fawn hna.Mi tampi caah ah cun hi kong hi theih nan herh men lai lo nain kei mah ban tuk in theih a herh mi an um sual ah ti siaherhnak te he ka tonmi kan cheuh ve hna.
Bawipa nih pumpak cio le nan chungkhar thlawchuah in pe ko hna seh!