Evan Rual Uk A Piangthar Cang Mi,Thlarau Thiang In Chinchiahmi Zûmtu Nih SualnK A Tuah Tikah..Rel A Phu Tuk
“Ka nau le hna, sualnâk nan tuah nâkhnga lo, hihi nan sinah ka țial. Cun mi pakhat khat nih sualnâk a tuah ahcun, Pa sinah chimpitu, a dingmi Jesuh Khrih kha kan ngei”. 1Joh 2:1.
Hi Baibal nih fiang tein a kan chimh bangin Thlarau Thiang in hmelchunhmi zûmtu (Thlarau in hrințhanmi zûmtu) nih Cathiang le Thlarau Thiang lamhtuainâk kha zul loin thisa duhnâk lei tukforhnâk tu kha a zulh ahcun thlaraulei a Pa Pathian duh lomi sualnâk a tuah khawh ti hi zeitilei hmanh in thlen khawh a si lomi, zungzal in a hmunmi biatak a si.
Asinain Hrințhanmi Zûmtu nih sualnak a tuah tikah khamhmi Pathian fa, van ro cotu asinâk kha ai rawk dih tinâk a si hrim hrim lo.Sualnâk tuah dingah tukforhtu Khuachia nih,”Na lo cang kha, Pathian nih an duh ti lo, an hlawt cang, tiah sualnâk a tuahtu lungthin le khuaruahnak ah bia a chim khawh.
Tukforhtu țhiam țhiam nih a hrințhan lomi zûmtu hna hmangin “An si lai kan ti țheu lo maw! sau an nguh lai lo kan ti țheu lo maw! Na comi khamhnâk a tlau bak cang khah! tiah nihsawh le diriam ngaiin an in ti lai.
Cucu tukforhtu Khuachia in a rami khuaruahnâk le bia an si kha philh hlah. Bia. 12:10.
Asinain Cathiang nih cun “Mi pakhat khat (hihi zûmtu a si) nih sualnâk a tuah ahcun, Pa sinah chimpitu, a dingmi Jesuh Khrih kha kan ngei” tiah a ti.
Na caah a nunnâk dihlak vailam ah a pe i thihnâk in thawhter a simi Jesuh Khrih cu atu ah amah zûmtu nangmah ca hrim hrim ah CHIMPITU (sihni) rian țuan in Pa orhlei ah a țhu ko rih timi biatak na hngalh fian hi tukforhtu nih a țih bik mi le a phân bik mi a si tihi philh hrim hrim hlah.
Rom dal 8 câng 34 ah, “A thimi kha Khrih a si, culawng hmanh si loin, a tho țhan i Pathian orhlei ah um in a kan nawlpiaktu cu amah țhiam țhiam kha a si” tiah a ti. Heb. 7:25 zong rak zoh.
Cucaah na tuahmi sualnak kha thlarau lei na Pa sinah phuang law na sihni Pa Jesuh zong nih an bomh lai i thlarau lei na Pa Pathian he nan i hawikomhnâk kha tharchuah a si țhan lai i na khualtlawnnâk hi lei ah hin hnangam daihnâk he a sunglawimi cân kha na Khamhtu Jesuh Khrih he na hmanh khawh țhan lai.
Zeicatiah Jesuh Khrih hi sual man zungzal thihnâk hell mei chungin an Khamtu lawng si loin ni fatin natlinlonâk le nasualpalhnâk ca zong ah Sihni rian an țuanpiaktu CHIMPITU a si.
