Falam in a chuakmi SAC ralkap pawl cu Falam in meng 4 hrawng a hlatnak ah Chin ralkap nih voihnih bomb an puahhnawh cang hna
Falam in a chuakmi SAC ralkap pawl cu Falam in meng 4 hrawng a hlatnak ah Chin ralkap nih voihnih bomb an puahhnawh cang i a voikhatnak ah a thimi zong an um! An leilawng Skart cu a rawk i an remh cuahmah lio a si tiah thawng kan theih. The chin Post
Magway ah Electric Zung In Director Le A Nupi SAC Ralkap Nih An Kah Hna, Magway ramṭhen, Magway Electric zung in Non-CDM Director le a nupi cu SAC ralkap nih, a ruang um loin an kah hna caah Director a nupi cu a ke ah hliamhma a pu, tiah SAC ralkap chung in theih a si.
March ni 19 zan suimilam 8:00PM ah electric zung in Director le a nupi cu zung rian kong he pehtlai in khual an tlawng i, Magway check gate an tan lioah SAC ralkap nih leilawng cu an dirter i chekhlatnak an tuah hnu an kal lei ah an kah hna tiah theih a si.
“Electric zung in Director a nupi cu a ke ah meithal kuan nih a khen caah hliamhma a pu. Chekhlatnak an tuah khawh hna hnu ah meithal in an kah hna hi a si. A hnu ah SAC ralkap nih Director pa a si an theih tikah PDF nih, an kahmi hna a si tiin Minster zung ah an lih le hrokhrol in report an pek,” tiah Magway ramṭhen, SAC ralkap chung lila sin in thawng theih a si.
Magway khuachung check gate hngaktu SAC ralkap hna cu zan ah zuu an ri i, tualchung mi hna cu a ruang um loin an kah hna pin ah tlaihkhihnak an tuah tawn tiah theih a si.
Ministry Of Transport And Communications Zung Chung Bomb Puahnak Ah Minung 4 Hliamhma An Pu. Mandalay ramṭhen, Mandalay khua ah March ni 20 ziing suimilam 11:05AM hrawng ah ramṭhen, Ministry Of Transport And Communications zung chung ah kutcheh bomb in doh an ton caah Deputy Chief telh in zung rianṭuantu 4 hliamhma a pu, tiah theih a si.
“Zung chung ah kutcheh bomb in an cheh ruang ah Deputy Chief cu a ke ah hliamhma a pu. Hliamhma pumi hna hi an nunnak ca ah thinphan awk a um lo,” tiah zung he aa naihniam mi pakhat nih a chim.
Bomb a puahnak hmun hi Mandalay, Chanayetharsan peng Aung Nan Yeikthar sang 83 lam, 34 lam le 35 lam kar ah a ummi Ministry Of Transport And Communications zung chung ah a puah hi a si, tiah theih a si.
Zung chung ah pa pakhat a lut i kut in sermi bomb in a puahhnawh hna caah Deputy Chief pa cu a ke ah hliamhma a pu i, lutlai cazi Zaw Myint zong a ke le a hnakhaw ah hliamhma a pu ve. A dang zung rianṭuantu pahnih cu a hnakhaw, an phei le an lu ah hliamhma an pu, tiah zung he naihniam in a ummi hna sin in theih a si.
Mandalay ah a luancia March ni 14 lio zong ah Amarapura peng Taungtamanin(တောင်သမန်အင်း) pawng ummi SAC ralkap hlathlainak zung luhnak kutka zong kutcheh bomb in AST-MDY nih an rak puah bal cang.
The chin Post
