Falam Khuachung Inn Khangh An Timh Lio Cu CCTV Nih A Record Hna Caah Tlaih Khawh An Si Cang
A luancia 2022 March 5, zaan suimilam 9:00 ah Chin ramkulh, Falam khuachung inn 4 cu minung pathum nih dat-sii toih in khangh an rak timh nain an hlawhtling lo. Misual 3 hna cu an i timhmi a tlamtlin lo caah March 6, 2022 zinglei suimilam 10:00 hrawng ah Falam-Rih lampi lei ah kal in, cuka lampi Laimual(လိုင်းမွာလ်) khua phak hlan inn pakhat cu an khangh.
Falam khuachung inn khangh an timh lio cu CCTV ah record a si i, mit hmutu hna zong nih CNO/CNDF sinah an theihter hna. CNO/CNDF nih hlathlainak an tuah hna i Biak Ceu Lal, Ceu Lian Hum le Sang Lian an si, tiah theih a si. Biak Ceu Lal le Ceu Lian Hum cu Mizoram state, Aizawl ah tlaih an si i, Sang Lian cu Mizoram chung ṭhiam Zokhuathar ah tlaih a si. CNDF nih thonginn ah an hren hna, tiah theih a si.
2022, March 6 zaanṭim suimilam 11:30 hrawng i Falam khuachung Tlanglo sang inn 3 kanghnak kong zong ah lunghrinh an si i, kherhhlainak tuah cuahmah lio a si. Falam khuachung mizapi umnak inn hrawhpiak duhnak le thinphan thlalaunak a chuahter khotu thil a tuahtu misual pathum hna cu mizapi vengtu CNO/CNDF nih faakpi in dan an tat hna lai, tiah Chin National Organization nih cathanh an chuah.
RELCHAP…Karenni Kahdohnak Ah SAC Ralkap Nih Multiple Rocket Launcher System(MRLS) An Hman: Karenni peng kahdohnak ah SAC ralkap nih Multiple Rocket Launcher System(MRLS) an hman, tiah SAC ralkap thawngzamhnak nih Yangon Khit Thit ah a chim. SAC nih Karenini ramkulh an uk khawh nakhnga biatak tein ṭan a la i, Senior Lieutenant General Soe Win he Operation an tuah cuahmah. Teinak an hmuh khawh nakhnga hramngan le vanlawng in an kah hna pinah Multiple Rocket Launcher System(MRLS) hmannak nawl zong pek a si i, MRLS phortu motor 3 cu Karenni ramkulh a phan i kahdohnak ah hman an si cang, tiah SAC ralkap thawngzamhnak nih a thanh.
“SAC ralkap nih Nanmae Khone(နန်းမယ်ခုံမြို့) an kan lakpiak hnu March 13 an Dawngankha(ဒေါငံခါး) khua an kan lakpiak ṭhan. Kahdohnak ah hin kanmah lei in hliam faak a tuar mi an um. Cucaah mipi nih nan si khawh tawk cio in kan ralkap hna hi rak bawm hram hna u,” tiah KNDF batallion-1 nih nihin March 13 zinglei ah thawng an thanh.
SAC ralkap nih Dawngankha khua cu nizaan March 12 zaanlei le nihin zing lei hriamngan in an kah i, inn zong an khangh lengah Sianginn, Biakinn le mipi inn tampi an rawk, tiah theih a si. KNDF ralkap hna cu February 24 ah Nanmae Khone in an rak chuak cang i nizaan March 12 ah Dawngankha khua zong an chuahtak ṭhan, tiah theih a si.
