Press "Enter" to skip to content

Falam Le Hakha Lam Cungah Ralhrang Nih An Thahmi Ruak Kan Hmuh Tiah CDF Nih An Chim

2022 March 2 – Chin ramkulh, Hakha-Falam lam cungah ralhrang nih an thahmi mino pakhat a ruak kan hmuh tiah CDF sin in kan theih. “Cycle in a kalmi a si. Lungrang ah a cycle kan hmuh ko. Ralhrang nih an tlaih i an thahmi a si lai” tiah CNDF in biachimnak nawl ngeitu Cung Ngai nih Mizzima ah a chim.

Falam-Hakha lam cung Ṭaal khua le Tlangzaar khua karlak, mengtung 16 zawn ah March 1 ah hmuhmi a si i a hnawng an hleh lawng si loin a mit zong khoih a si tiah theih a si. Kum 20 hrawng mino a si i hodah a si cu a fiangin theih a si lo.

February 27 ah Falam in Hakha lei ah a kalmi ralhrang mawtaw 20 le tank 2 cu ralkap thazang 200 hrawng an si i Lungrang khua inn pawl cu an bauh hna leng ah innzuat saṭil pawl zong an thah i an ei hna tiah theih a si.

Falam peng, Lungpi, Lungrang, Thlanrawn, Ṭaal, Tlangzaar le Ramthlo khuami 1500 hrawng cu khua an zaamtak. An kalnak lamthluan ah CDF/CNA he kahdohnak a chuak len ko nain a hliammi le a thimi cazin a fiang in theih a si rih lo tiah Mizzima nih a langhter. Credit; The Chinland Post

Zarhkhat chung kahdohnak ah ralhrang nih vanlawng voi 36 leng a hman, KNDF hriamtlai 1 nih ram caah a nunnak a pek. 2022 March 2 – Ralhrang pawl hna cu Moebye khua in Demoso peng Nanmaekhon lei ah phu hnih ṭhen in raltuknak an tuah. Battalion (66) le ramri a cawngtu ralkap hna telh in thazang 300 leng hrawng in Sinmataung khua le Nangphekone khua tiin hmun hnih ah raltuknak tuah in Moebye-Demoso lam le Sinmataung, Sinphotaung khua tlang hna ah hmunhma an khuar.

February 22 ah Sinphotaung, Sinmataung le Loinangfa khua pawng Natpauk tlang ah raltuknak a tuahmi ralhrang le Karenni phukomh hna karlak ah kohdohnak a chuak. Ralhrang nih Helicopters le vanlawng in Nangphekone,Wadawkhu, Sinkalay thlanglei ah voi 5 a kah tiah KNDF nih a thanh.

February 23 ah Sinkalay tlang le Nansankhan khua hna ah kahdohnak a chuak i ralhrang nih Nangmekhone, Nansankhan,Sinkalaytaung, Celidon, Dawkamee khua hna cu vanlawng in voi 19 a kah caah khuami 2 an nunnak a liam i 4 fak ngai in an i hliam tiah theih a si.
Ralhrang pawl nih Demoso battalion in Nangmeekone le khua pawng pawl ah hriamngan in din loin an kah lengmang caah khuami inn pawl an kaang dih tiah theih a si.

February 24 ah ralhrang nih Nankhansan khua phungki sianginn ah hmunhma khuar in khuachung inn pawl cu mei in an khangh dih. Mah khua pawng ahcun kahdohnak a chuak i ralhrang nih tank an hman. Cu lawng si loin, Sinma tlang kahdohnak ah ralhrang nih vanlawng in voi 12 a kah ṭhan tiah KNDF sin in thawng theih a si.

February 25 chun sml 12:30 pm hrawngah Demoso peng, Oo khua, Dawtasay khua phungki sianginn ah hmunhma a lami ralrang le KNDF phukhomh karlak ah kahdohnak a chuak. Cu lawng si loin, chun sml 12:00pm hrawngah Loikaw peng, Lingphongle lamṭhen ah kaphnih kar kahdohnak a chuak ṭhan. February 26 ni chun sml 2:00pm hrawngah Phrusko khua um LIB-428 gate cu Karenni Army (KA) le KNDF nih an kah ṭhan hna.

Cu kahdohnak cu sml pakhat tluk a rau i ralhrang lei in a thimi an um. Pa zeizah an si bel a fiang in theih a si lo. February 27 chun sml 1:30pm hrawng ah ralhrang nih Demoso peng, Lobakho khua ah vanlawng in a kah ṭhan. Mipi ral in a kahmi a si nain a khawngdengmi an um lo. February 22, Natpauk tlang kahdohnak ah KNDF in mipi hriamtlai pakhat nih a nunnak a pek tiah KNDF News & Information Department nih a thanh. The Chinland Post

Be First to Comment

Leave a Reply

Your email address will not be published.