Press "Enter" to skip to content

Falam Peng Parte Khua, SAC Ralhrang Nih An Khangh Zat Thawngfiang

Falam Peng Parte Khua Inn 6 SAC Ralkap Nih An Khangh! Chin ramkulh, Falam pengchung um mi Parte khua inn 6 cu nizaan May 10 ah SAC nih an khangh, tiah khuachung mi nih an chim. Parte khua cu Falam-Kalay motor lampi ah a um mi khua a si i, inn 90 leng umnak khua pakhat a si. SAC ralkap hna cu May 9, ah Falam in an chuak i, nizaan May 10 ah cuka khua ah ah cun zaan an riak, tiah theih a si.

SAC ralkap hna le Chin mizapi vengtu ralkap hna karlak ah fak ngai in kahdohnak a chuah caah, Falam-Kalay lampi ah ummi Parte khua le Lungbang khua mipi hna cu a himnak hmun ah an zaam hna, tiah theih a si. Credit; The Chin Post

Thawngdang Relchap>>>><<<<< Chemphut In Maw Ral An Do Lai? Mah hi bia roling cu a luan cia kum 30 lio i CNF ralkap in ram tang kan rak um lio ah upat mi Laimi kan pa ralbawi ngan hlun pakhat nih a rak chim mi bia a si tiah ka rak theih. Upa pakhat nih hi ti i a rak chim mi bia hi, mah cu lio ah cun mi zei rello bia phun ah vun ruah khawh ngai awk a rak si nain,

ram sifaak bawmtu ngei lo le raldonak kong ah hmuhton experiences zong a ngei bal rih lo mi Chin mino tlangval siangngakchia rual nih Kawl ralkap pi vun kah doh timh ve kha, kum tampi ral a rak tu le hmuhton tampi a rak ngei cia tuk cang mi kan pa pakhat nih a sia a kan herhnak bia a rak chim mi tu a rak si ko lai ti tu lei in ka vun ruah piak ṭhan cang.

Tu tan i Ramkomh Kawlram (Union of Burma) pumpi i buainak a hun chuak mi zong ah hin, hmun kip kaa kip in mino upa nu thlu loin hriamnam hman ral kah thiamnak an cawn cio hna hmuh le theih a si tikah, a bik khun in Chin ram chung ah khua kip peng kip in Kawl ralkap tukdo an hun si ve tikah tuan deuh i ka rak ruah ve mi cu zei meithal hriamnam le kuan hmang in dah ral an tukdo lai ti khi a si.

Hi lio ah Kawl ralkap pawl cu a zei ti hmenh in vun tuar khawh awk le ngaihthiam khawh awk ṭha le zoh sawh awk ṭha cu an si ti hna lo i, hmun kip kaa kip in a um namiang hriamnam meithal he vun kahdo cio cu an hun si hna. Mah cu sining cu atu tiang i vun hmuh le theih mi hi a si. Hi zawn ah vun ruah awk ngai in a hung um mi cu, caan sau ah zei tin dah hmalak le kal a si lai timi hi a si.

A fiang ngai mi pakhat cu, Kawl ralkap nih cun raldonak lei in si seh, zei dang teinak in si seh kan sung cang lai ti an i hngalh tak hnu lawng ah ram uknak nawl cu thlah an timh te ding khi a si. Cu ti asi lo tu ahcun atu bantuk an lungput le ziaza ningte hin ram uk an timh rih ko lai. 2023 kum ah rampi thimnak kan tuah lai an ti.

Va tuah kho tak hna seh law, 2008 rampi phunglam (constitution) ning in a hei si lai i rampi president zong anmah duh mi thim khawh te ding khi a hei si te lai. Mah cu aho zong nih hmuh duh mi le theih duh mi a si ti lo. Hmun kip i PDF le CDF etc. pawl zong nih an meithal kha Kawl ralkap kut ah an hei chia hlei hna lai lo. Kawl ralkap kahdonak cu a faak deuh chin cang lai.

Natein cuti a si ah Kawl ralkap pawl cu pehzulh in kahdo khawh hna awk ah zei tin dah bomzen, kuan le hriamnam meithal hi zalh le hmuh khawh a si lai timi a biapi ngai mi biahalnak a hung chuak lengmang. Atu lio dirhmun ning in cun midang nih an zuar chin mi kha kawl le cawk a si. Caan sau caah a si kho lo. Lam dang le lam thar kawl a hau cang.

Mah cu ah a si kho mi cu, meithal sernak seh le thilri cawk le ser a si khawh rih lo hmenh ah, YouTube link chung i ka vun langhter mi bomzen le meithal kuan fang sernak seh thilri pawl bantuk cu cawk khawhnak dirhmun ah a um ko cang tiah ka ruah. Nizan nai ah Kawl CDM ralkap bu pakhat nih meithal sernak tuah an i timhnak kong an chim.

Tangka let ruk in a dih mi meithal man cu let khat man ah dih ding in ser khawh kan i tim lai an ti. NUG nih an bawmh hna i an i zuam ahcun a si kho ding mi a si ko. Mah hi kong hi CNF ṭuanvo ngei upa pawl zong nih a ruat le a tuaktan an um ko hna lai tiah ka ruah. Cu belte practical ah chuahpi kho hna seh law ti khi saduh ka thah piak ngai hna.

KIA le UWSA i an hriamnam sernak seh le thilri cu China ram in a lut mi le an laak mi a si. Kannih zong India ram lei in luhpi le laak khawh a si ve ko lai dah. Tu tan ahcun Mirang nih ‘Where there’s a will, there’s a way’ an timi phungthluk bia hi biatak deuh in i tlaih ve a hau ko lai dah. Crd; David C B. Ling

Be First to Comment

Leave a Reply

Your email address will not be published.