Press "Enter" to skip to content

February 25 Ah Ralhrang Nih Mipi Vengtu Ralkap 15 Bak An Thah Hna

Sagaing ramṭhen, Shwebo peng Hnamasazit cu nihin February 25 zing sml. 5:00 ah ralhrang nih hriamngan in an kah hnu ah khuachung ah an luhhnawh hna i inn an khangh leng ah PDF 15 an nunnak a liam i Civil mi zong an thah hna; Khuapi ti awk in a khangh caah khua an chuaktak, tiah theih a si.

“Zing sml. 6:00 hrawng ah khua an khangh i, PDF 15 an nunnak liam. Ralhrang nih hriamngan in khuachung an kah caah civil mi zong thi mi an um i an ruak an kawl cuahmah lio hna si. Minung pa zeizat an thih cu a fiang rih lo, kan khua ning ti awk in a kaang,” tiah tualchung mi pakhat nih a chim.

Ralhrang hna nih cun Hnamasazit khua an khangh khawh in Yiphyukung khua le Myohla khua pawl zong an luhhnawwh hna i khua mi hna cu a himnak ah an zaam hna, tiah theih a si. Credit; The Chin Post

Sagaing ramṭhen, ShweBo peng NgapihOo(ငါးပိအိုး), Khaipin(ဂွေးပင်) le Hnamah-sayit (နှမစားရစ်) khua hna cu February 24 zanlei le 25 zinglei ah SAC ralhrang nih hriamngan in an kah hnu ah mei in an khangh, tiah ShweBo thawngzamhnak nih an thanh.

“Zaan Sml-10 luan in ralhrang nih hriamngan in khua cu an kah i khua mi pawl an zaam. Zinglei ah Hnamah-sayit (နှမစားရစ်) khua cu mei in an khangh leng ah hriamngan in an kah ruangah nu pakhat a nunnak liam. Khuachung i kan luh ngam rih lo caah inn pazeizat a kangh ti hi kan hngal kho rih lo tiah,” khua mi pakhat nih a chim.

February 24 zaan ah inn 200 hrawng umnak NgapihOo khua cu a khua ning ti awk in a kaang i khua mi dihlak in an zaam. Cun, Kuaipinkung khua zong a kaang cuahmah rih, tiah theih a si. Hriamngan a kaptu le mei a duahtu SAC ralhrang hi Tilung (သီးလုံး) khua ah umhmun khuar mi an si. Seihkhun(ဆိပ်ခွန်) khua zong ah SAC ralhrang nih umhmun an khuar caah khua mi an zaam hna, tiah theih a si.

Cubantuk in ralhrang nih ruahlopi in an luhhnawh ruangah NgapihOo, Hnamahsayit khua pawl leng ah Maungtat(မောင်းတက်), Ungpoh(အုန်းပေါက်), Tekung(သဲကုန်း), Yawtitkung(ရွာသစ်ကုန်း), Kangyikung(ကန်ကြီးကုန်း), Takanta(တကံသာ), Segyi(ဆည်ကြီး), Cucia(ကြိုးကြာ) khua hna in khua mi minung 5000 leng an zaam, tiah ShweBo thawngzamhnak nih a thanh.

Shwebo, Ah Phyo-saw-thi Pakhat Mipi Ralkap Nih An Fimtawl: Sagaing ramṭhen, Shwebo peng nichuah ah a um mo Kwekone khua ah Pyo-Saw-Tti, sanguk bawi U Htun Htun Oo le Uu Myint Than cu Shwebo Defense Force, Ghost rider, BERMESE DRAGON FORCE le Shwebo Yam Belu(ယမ်းဘီလူး) i bawm in an fimtawl hna i meithal pahnih an laakpiak hna, tiah nizan February 24 ah Shwebo Yam Belu nih cathanh an chuah.

Nihin February 25 zingka suimilam 11 ah Kwekone khua lei ah rallam sial in a ra mi ralhrang le Pyo-Saw-Tti phu pawl cu Ghost Rider phu nih bomb 9 in an puah hna i ralhrang 35 nak tlawm lo an thi kho, ralhrang motor 1 zong a kaang i a rawk, tiah Ghost Rider sin in theih a si.

“Nizan ah Pyo-Saw-Tti pawl kan fimtawl hna. Cu ruangah Pyo-Saw-Tti dang pawl cu SAC ralhrang nih an va auh chap mi hna a si lai ti in kan ruah,” tiah Ghost Rider rianngeitu pakhat nih a chim. Bomb an puah hna hnu ah SAC ralhrang nih meithal le hriamngan in an kah ve hna i, hnulei an kir pah ah mipi vengtu ralkap Maya(မာယာ) an khen i a nunnak a liam, tiah an cathanh ah cun an langhter. Credit: The Chin Post

Be First to Comment

Leave a Reply

Your email address will not be published.