General Ze Thu Aung le A chungkhar CDM An Tuah
Nayphidaw, No.45 Scout Air Camp i kum 17 rian a ṭuan hnu ah Mandalay ramṭhen, Pyinoolwin ah training a kai lio mi General Ze Thu Aung cu Demoso-Local PDF(DMO-Local PDF) sinah February 15 ah a chungkhar he CDM an tuah, tiah DMO-Local PDF nih cathanh an chuah.
Ralhrang tuahsernak a cohlan lo ruangah mipi vengtu ralkap sinah a rak i lut mi General Ze Thu Aung le a chungkhar cu DMO-Local PDF nih lungnuam tein an don hna i a himnak hmun ah an chiah cang hna.
CDM a tuah mi general Ze Thu Aung cu SAC ralhrang nih uknak an laak hnu ah a voikhatnak CDM a tuah mi general a si, tiah cathanh ah an langhter. Mipi sinah luh a duh mi SAC ralhrang pohpoh cu DMO-Local PDF nih lungnuam tein kan in cohlan ko hna, tiah DMO-Local PDF nih cathanh an chuah. Crd; The Chin Post
Phapun Ummi Ralhrang Ngunkhuai Kholhnak Zung KNLA Nih An Hrawh: KNU bridage 5 hmunhma phapun (Mutraw) pengkomhYunsalin tiva (ယွန်းစလင်း) hnu lei kap ah ummi ralhrang ngunkhuai kolhnak zung cu KNLA nih an luhhnawh i an hrawh. Kahdohnak voi 4 a chuak i ralhrang 3 an thi, 2 hliam an tuar, tiah theih a si.
Sualnak ngei lo mipi nih rethei ngai in an kawl mi phaisa hramhram in a hal tawntu, Thumade(ထူမဒဲ) khua ah ummi ralhrang kuttang um ngunkhuai kholhnak zung cu KNLA bridage 5 battalion, 15 battalio 2 nih an luh hnawh i an hrawh, tiah Mutraw thawngzamhnak nih a langhter.
February 20 zing Sml-8:30 ah Kahicu(ကဟီးကျိုး) ralhrang sakhan cu sakhan ralhrang pawl ti an than karlak ah KNLA nih luh hnawh in an doh hna i ralhrang 1 a thi. Cun, Sml- 9:15 ah Mepuhkhi(မဲပုခီး) ah voikhat, Ngia-tah-yu-cu (ညာတဃိုကျိုး) ah voikhat, Mewai(မဲဝိုင်) ah voikhat KNLA nih an doh hna. Ralhrang 2 an thi i 2 hliam an tuar, tiah theih a si.
Mutraw pengkomh chung ah ri lonh in a rak lut mi ralhrang phu hna cu February ni 19 zing Sml- 9:42 ah Thumawde(ထူမောဒဲ) ah hriamngan lung 3 in an kah caah khuachung mipi inn pathum a rawk, tiah KNU bridage 5 thawng an thanh.
SAC Ralhrang Nih Unknak An Laak Hnu 386 Chungah Minung 1,566 Thah An Tong Cang: AAPP nih February 21 tiang cathanh a chuah ning ah Myanmar ramchung ralhrang phu hna nih nawlngeihnak an laak hnu ni 386 chung ah sualnak ngeilo minung 1,566 thah an tong cang, tiah theih a si.
Ralhrang tlaihkhih a tong mi dihlak hi minung 12,249 an si i tlaih ding in nawlchuah mi minung 1,973 an phan cang. Nawlngeihnak latu ralhrang phu hna nih mipi nunnak an laak mi chung ah Yangon in minung tambik nunnak a liam i, Mon ramkulh chungin minung 12 an nunnak a liam ve. Tlaihkhih a tong mi minung 400 luan an si i, chung chung ah cun minung 200 nih luatnak an hmuh, tiah theih a si. Crd: The Chin Post
