Good News! SAC Sii Lei Ralkap Pakhat Nih A Hriamnam He Mipi Ralkap Sinah A Fonh
Tayatchaung Ah SAC Sii Lei Ralkap Pakhat Cu A Hriamthil He Mipi Sin Ah A Lut. Taningtharyi ramṭhen Tayatchaung peng Winwa palik sakhan ah a ṭuanmi sii lei ralkap pakhat nih a hriamthil i put in mipi lei ah a ṭang tiah cuka hmunhma um tualchung hriamtlai phu nih an chim.
Kum 23 tluk a simi sii lei ralkap cu no.8 Operations Command Headquarters tang ah a ummi Tayatchaung peng hrambunh khahmahyiah 403 battalion chungtel pakhat a si.
Mizapi leikap ah ka ṭang lai tiin sii lei ralkap pakhat nih kuanfang 100, rifle ah hmanmi bomb le kut cheh bomb lung khat i put in cu tualchung hriamtlai phu sin ah a lut.
” Winwa palik sakhan ah umhmun an khuarnak a sau cang, February 13 in kan sin ah a fon, a tu ah cun a humhimnak hmunhma a phan cang” tiah cu ka hmunhma hrambunh tualchung hriamtlai phu chungtel pakhat nih a chim. Khit Thit Media, The Chin Post
Relchap; Magway ramṭhen, Yesagyo peng Nayin khua cu SAC ralkap nih an khangh caah tualchung mi hna an umnak inn 30 leng a ciam tiah Yay Lay Kyun phu in ṭuanvo ngeitu pakhat nih a chim.
February ni 26 ah Yesagyo peng Minkhua ah umhmun khuarmi SAC ralkap le pyusawhti phu hna nih Nayin khua cu luhhnaeh in an khangh tiah theih a si.
“Tualchung mi aa hliammi cu an um lo, Nayin khuami hna cu ralhrial in an umnak a sau cang. SAC ralkap nih khuachung an khangh caah inn 30 leng cu dapcaam ah a cang” tiah Yay Lay Kyun phu in ṭuanvo ngeitu pakhat nih a chim.
SAC ralkap nih Nayin khua cu a hlan ah rallam sial in an rak luhhnawh bal cang caah, khuami hna cu 2022, July 26 in an umnak hmun kaltak in ralhrial dirhmun an phan tiah theih a si. TCP
Mandalay ramṭhen, Madaya peng ah SAC ralkap nih umhmun an khuarnak hmunhma hna thla khat chung drone hmang in bomb thlakhnawh an ton caah SAC ralkap 8 an thi tiah Natsoe Underground Revolutionary Army in Bu Natsoe nih a chim.
February ni 1 in 25 tiang Madaya pengchung ah SAC ralkap nih umhmun an khuarnak hmunhma hna cu Natsoe Underground Revolutionary Army nih drone hmang in voi 13 bomb an thlak hnawh hna, cu chung ah cun SAC ralkap 8 an thi hliamhma tuar an tam tiah theih a si.
“Madaya ah a ummi SAC ralkap nih umhmun an khuarnak hmunhma hna le rallam an sialnak hmun hna cu Natsoe Underground Revolutionary Army nih February ni 1 thawk in kan doh hna. Hi kahdohnak ah hin SAC ralkap hliamhma tuar an tam, 8 an thi” tiah Natsoe phu in ṭuanvo ngeitu pakhat nih a chim. Khit Thit Media
Tamu Ah SAC Ralkap Hriamngan Kahnak In Ngakchia Pakhat Nunnak Liam, Hliamtuar Zong An Um. Sagaing ramṭhen Tamu, Myomah (12/a) sang Nanhpalone ah SAC ralkap nih hriamngan an duhnak hmun poh an kah caah sangchung um pastor fa pakhat a nunnak liam, minung 2 nih hliamhma an tuar tiah theih a si.
Nizan February ni 25 ah ngakchia cu innhmai lente aa celh lioah hriamngan cu a puak tiah theih a si. Hliamhma tuarmi minung 2 le nu pakhat cu Tamu siizung ah an kalpi hna tiah theih a si. Zalen
