Hakha Khualipi Ah SAC Ralhrang Nih CDF Drone An Lak Piak Hna
Chin ramkulh, Hakha khuachung February 20 ah SAC ralhrang nih a tuahmi voi 74nak Chin miphunpi ni lawmhnak caan hmannak ah CDF phu nih drone in doh an kan timh nain kan i veng kho, tiah ralhrang phu hna nih cathanh an chuah. SAC ralhrang cathanh chuah ning ah nizan February 20 Chin Miphunpi Ni zanlei suimilam 3:30 hrawng ah khuachung vengtu nih CDF ngeihmi drone le kutser bomb pakhat cu kan laak khawh.
Hakha, SAC Minister Office ah tuahmi a voi 74nak Chin miphunpi ni ah SAC ralhrang lei Defence Minister in Lt. Colonel Myat Tun Oo le council member U Maung le SAC chungtel hna zong an i tel, tiah theih a si. Nizan February 20 ah tuahmi Chin miphunpi ni caan hmannak ah hin SAC ralhrang Chairman Min Aung Hlaing nih ca zong a kuat hna, tiah theih a si. CDF Hakha lei in in drone kongkau ah hin cathanh an chuah mi hmuh a si rih lo. Credit; The Chin Post
Rohingya miphun cung i thahnawnnak a tuahtu Kawlram buaceihnak cu ICJ nih nihin February 21 ah an thok cang lai. 2017 lio ah Myanmar ramchung Arakan( Rakhine) ramkulh chung ah Rohingya miphun pawl cu Myanmar cozah nih miphun cihmih lainawnnak a rak tuah, tiah Ganbia ram nih ICJ ah report tuah.
2019 kum lio ahcun Myanmar ai-awh in Daw Aung San Suu Kyi a rak kai i teinak a rak co. Daw Aung San Suu Kyi nih a rak i khamnak cu NUG Cozah nih a lak ṭhan i UN Myanmar Palai U Kyaw Moe Htun ṭuanvo an pek ṭhan. Tutan ICJ biaceihnak ah ralhrang lei nih Vuanci KoKo Hlaing le Lawyer(Sihni) Daw Thida Oo an thlah ve hna. Nihin ICJ ah ralhrang Palai pawl maw luhnak nawl ngei lai NUG dah ti cu hngalh a si rih lo.
Nikhat Chung Lawng Ah Ralhrang 80 Leng An Thi: NUG- Dohthlennak an tuah hnu February 20, 2022 nikhat chung lawng ah ralhrang lei in 83 an thi, hliam a tuar mi minung 16 an si, tiah NUG nih cathanh a chuah. Ramchung dihlak ah Myanmar mipi nih SAC ralhrang uknak cu an ci hmit dih ding in le zalonnak hmu kho ding in dai tein duhlonak cu mipi nih ramṭhen le peng tampi ah an langhter.
Ni caan a liam liam hnu ah duhlonak langhter in kahdohnak tiang thok a si i, nizan February 20, 2022 nikhat lawng ah Magwe ramṭhen le Tanintharyi ramṭhen ah voi 1, Mandalay ramṭhen ah voi 3 le Sagaing ramṭhen ah kahdohnak voi 13 a chuak, tiah NUG nih a thanh.
Credit: The Chin Post
