Hakha le Thangtlang Kar Ah Ralhrang Langta Pahnih Nih Bom A Thlak Cuahmah
Hakha le Thangtlang kar ah ralhrang Langta pahnih nih bom a thlak cuahmah. Cun Ramthlo khua pawng lei ah Jet nih bom a tlak cuahmah tiah kan theih.
Dokthek le Chuncung kar a riak ralhrang hna cu, HK ralhrang nih JCB telh in motor 7 nih don an timh hna i, tuhi Hakha thar gate ah an dir lio, motor 7 chungah pakhat cu, khuachung leiah a va kir i, ralhrang hi an dih lakah 50 an si men lai tiah kan theih. Salai William
Arakan Army An Dirhnak Kum 14 Tlin Camtuak Ah NUG Nih Lawmhpinak Ca An Kuat ah Arakan Army(AA) an dirhnak kum 14 tlin camtuak ah NUG runvennak zung nih AA cu lawmhpinak ca an kuat, tiah theih a si.
NUG runvennak zung nih, AA hriam an tlaihnak kum 14 tlin camtuak ah ca an kuatmi chung ah, Rakhine ralkap hna le Rakhine mizapi nan dihlak ca ah thlaza kan in campiak hna.
Rakhine mizapi nih mahte uknak, mahte khuakhan lairelnak le mahte i tawlrelnak nawl ngeih khawh ding ah hriam nan tlaihnak kum 14 tlin camtuak nan phak khawh caah kan in lawmhpi hna, tiah an langhter.
Cu pin ah kum 14 hriam nan tlaih chung ah nunnak, inn le lo, ngeihchiah chawva le pum tlamtling lo tiang in ram le miphun ca ah Rakhine ralkap hna le Rakhine mizapi nih nan peknak cung ah kan in upat hna, tiah an langhter.
Mizapi nih hranhram uknak doh lio Pau dohthlennak ah AA cu mizapi lei ṭang in hramhram uknak latu SAC ralkap an doh pin ah PDF hna zong an bawmh hna, tiah NUG runvennak zung nih an cakuat ah an langhter.
NUG runvennak zung nih, kan ralpa kan tei khawh nakding ah lungkhat tein kan dohṭi lai i, AA zong nih nan hmuitinh le nan khelmi nan tlinh khawh i nan hmuh khawh nakhnga thlaza kan in campiak hna, tiah an langhter.
