Israel Pathian nih chun ah Langhnak (Vision) a ka pek mi Lai Ram le Laimiphun A kan kilvennak bia A si.Chun laifang pi ah khin lufak nawnpi in ka um i, Zungkhan chungah dai tein ka va it, ka lu le chantling ai tawngh bak ah khin mang a si le Langhnak a si cu ka thei lo. Keinih cun (vision) a si ka ti ko. Zei a si paoh ah Israel Pathian nih kan ram le kan miphun caah a ka hmuhter mi a si tiin ka ruah ve. Cu caah Ram chung um Laimiphun le Ram leng um Laimiphun ca’h thazang pek pah in hun tial ka duh mi a si. Cu mang tham cu ka ti ko nain Ramkip um LAIMIPHUN le Ram chung um mi vialte kan thinphan liopi i, kan ram le kan Miphun ca’h mangtha a si ko mi cu tiin ka hun tial mi a si.
Ka chim cang bantuk in ka lu le chantling a hun i tawngh bak ah cun ruah sur thawng le thlitu hran thawng cu ka hun theih thluahmah cawlh ko. Cu lioah cun,”Aw pakhat nih khin lengah va chuak law thil a um tu ning khi va zoh tuah a hun ka ti,” kha ka theih.Ka va chuak i khua ka van cuanh tik ah cun vawlei cu muihnak nih a zelh dih i a tuam dih ko kha ka hmuh. Tlawmpal ah thli fakpi in a hung hrang i van cu a hung thiang thluahmah ko, cu lioah cun Angki rang aih mipa a tungsang nawn mipa nih khin Au rinnak (Loudspeaker) aa put i thangpi in a hung au, a chim mi cu, “ram Uknak a rawk dih cang,ram Uknak a rawk dih cang, a cung an khuhmi canphio vialte cu thlichia nih a lak dih cang,ram uknak a rawk dih cang,” tiin a au lengmang mi pa khi ka hei hmuh. A ka hmuh ve i a kut in a hei ka zauh/ a hei ka auh pah a kut cun a hei ka huih pah fawn. A ka auh a si khi ka ti i a sinah cun ka va tli ve i ka va phak cawlh ve.
Thirtung nganpi an phun mi tangah a rak dir i, hi thirtungpi hi Ramri tung a si a ka ti. Ramri tung a tangah cun thirtidong (pipe) lianpi cu ramri in kan Laitlang lei ah cun khawzei tiang dah a phak ti cu kan thei lo, ka hmuhnak tiang cu ai kham zehzuah ko.
Tlangaupa nih, ” Thirtidong (pipe) cu nan Ramri bak in a cat lai i thisen a hung luang cang lai, Chin ram kulh chungah a luang tik ahcun nan miphun Laimiphun nan ningpi in nan thi dih cang lai, cu a si caah nan miphun Laimiphun nan ningpi in nan thihlonak dingah cun Tengkipung khi va la law Tidongpi a Cah hi bawh ko, a cah bak in tidong ah khanTengkipung a kaa kha hei khumh/ hlinh cawlh a ka ti. Cun Tengkipung cu kai put i tidong cah cu ka bawh, tlawmpal ah a hung cat taktak i a chim bantuk cun ka tuah ve. Tidong in thisen cu a hung chuak i kan Lai ram kulh chung i a luang ding mi vialte cu Tengkipung chungah an lut dih i ai chawl caah kan ram ri lenglei ah cun an kir dih / an luang dih than.
Tengkipung cu fekte in ka tlaih i ka bawh hnawh lio ahcun Tlangautu pa nih ka keng a hun ka tawngh i “NAN RAM CHIN RAM KULH LE CHIN MIPHUN CU NAN HIM DIH CANG A HUN KA TI,” cun ka Tengkipung cu ka thlah cawlh ve.Tlangaupa nih a tu nai i thisen na khirh mi kha vun zoh tuah a ka ti i kan pahnih in RAM RI THLANG CUNG cun khuaram cu kan cuan than i, ka hmuh mi cu ka tih tuk i thinphan thlalaunak in ka khat cawlh ko. Ka rak khirhmi thisen kha ti bantuk, thisen bantuk in Ti lian nganpi ah ai cang i ka zoh i ka mit hmuh phak lo tiangin Tilian cu a luang thluahmah ko, miruak rel cawk lo le a nung bu in a fenhmi rel cawk lo cu Ti chungah an pil pah an vuanpah khi ka hmuh hna.Kan ram chungah luh ai tim mi a hung kai mi zong Ti lian nih a lak cawlh hna i pakhat hmanh Kan ram chungah an lut kho ti lo. Tilian nih cun a fenh dih ko hna. Kan ram cu Israel Pathian nih a rak kan kilven i a him cang! Kan Luat cang!HaleluiYah!! HaleluiYah!
Bia siaherh: Kan miphun le kan ram ningpi in kan pupa hna chan in a tu kan mah chan tiangah kan sualnak vialte kha kan i ngaihchih i Israel Pathian sinah kan kir ahcun kan ram le kan Miphun cu a kan zangfah lai i Sa le Ral, Mangtam, Rai phun zakip chungin a kan Khamh hrimhrim ko lai. Chin miphun/ Laimiphun nan dihlak cungah Israel Pathian Yahweh Elohim nih Thluachuah phuntling in pe cio ko hna seh, Amen.Nithum & Zanthum Rawlulhnak.Thlacam tarket cu atanglei (4) ka tial mi hna in Luatnak kan hmuh khawhnak hnga fakpi in mitthli he thla kan cam mi a si. Credit: Ephraim Lian Rum
Be First to Comment