January 22-25 Chung Kahdohnak Ralhrang Thihzat An Langter, An Tam Taktak Si
Magway ramṭhen, Saw peng Kyautthuh (ကျောက်ထု) ah January 22-25 tiang nili chung kahdohnak ah ralhrang phu lei in minung 22 nak tlawmlo an thi, tiah Kyautthuh (ကျောက်ထု) People Defence Force (PDF) nih an chim. Kyautthuh (ကျောက်ထု) in Shwe Awng Ta(ရွှေအောင်သာ) khua lei ah rallam a sialtu ralhrang phu hna cu January 22 ah hriamngan in kahdoh an tong.
January 23 zinglei ah Kyautthuh (ကျောက်ထု) PDF nih bomb puahhnawh in an doh ṭhan hna caah ralhrang minung 7 hrawng an thi, tiah Kyautthuh (ကျောက်ထု) PDF in chimphuannak nawlngeitu nih DVB ah a chim. January 23 ah Gyijae(ကြီးကျေး) khua mizapi facang cu an hrawhpiak hna lengah khuachung cycle cu ralhrang phu hna nih an fir.
Khuachung thil a hrawk i, cycle a firtu ralhrang phu hna cu January 24 zinglei Kyautthuh (ကျောက်ထု) lei an kalnak ah, hmun 4 in bomb puahhnawh an tong i hriamngan le hriamhme he kaphnih kar kahdohnak a chuak. Cu kahdohnak ah cun ralhrang phu lei minung 10 nak tlawm lo an thi i hliamtuar zong an tam tiah theih a si.
Cu kahdohnak ah cun Kyautthuh (ကျောက်ထု) PDF in minung 3 nih ram le miphun ca ah an nunnak an pek, nunnak a liammi mipi ralkap hna ca ah kan lung a faak tuk, hmailei ah cun a sikhawh chung in kanmah lei a thi le hliamtuar um lo ding in ralring tein kan i zuam lai tiah an chim.
January 24 ah Mihaye(မိအယ်) khua i zaan riakmi ralhrang phu hna cu January 25 chun ah Kyautthuh(ကျောက်ထု) PDF nih bawh in an doh hna i, ralhrang phu chungtel minung 5 nak tlawmlo an thi hliamhma tuar zong an tam. Mizapi nih anmah le tikhawhnak lam in an kan telpi a si ahcun hi dohthlennak hi tuan ah a dih kho ko lai.
Cucaah mizapi nih hung kan telpi cio uh tiah forhfialnak zong a chim. Kaphnihkar kahdohnak kong he pehtlai in ralhrang lei a thi mi kong ah ralhrang phu lei nih cathanh chuahmi a um rih lo. DVB, The Chin Post
