Kachin Ramkulh Chungah Thazaang A Chaptu SAC Ralhrang Rual Cu KIA Le PDF Nih An Kah!
Nawlngeihnak latu SAC ralhrang nih Kachin ramkulh chungah a ralkap thazaang a chap chin lengmang caah KIA le PDF i fonhin SAC ralhrang ralkap hna cu kan kah tiah KIA thawngzamhnak nih cathanh an chuah.
Kachinnet Burmese nih kahdohnak kong he pehtlai in thawngthanhnak a tuah tikah a ralkap thazaang a chap chin lengmangtu SAC ralhrang cu January 27-28 ah Hu Pin le Pin Baw pawngkam ah KIA le PDF fonhmi phu he an i kap tiah a langhter. Kahdohnak kongah kaphnih thimi le hliammi tu a langhter lo.
Hu Pin PDF i cathanh chuahmi ningin Mu Ngyin in Mu Kaung leikap ah a kalmi SAC ralhrang ralkap motor rual cu hmun hnih ah kan kahdoh hna tikah SAC ralhrang leikap ah bawi telh in ralkap 14 an thih pinah tampi nih hliam an tuar tiah an langhter.
KIA le SAC ralhrang hna cu Shan ramkulh innitlaklei sang zongah kahdohnak a chuak tiah an chim. KIA Brigate (6), Battalion 36 hmunhma chung simi Mu Paw leikap ah January 29 ah kahdohnak a chuak tiah KIA thawngzamhnak nih a langhter.SAC ralhrang ခမရ ၄၂၀ tiah ruahmi ralhrang rual 60 tluk cu KIA umnak leiah kahdohnak an rak tuah caah minute 20 chung an i kap tiah an chim.
January 28 zongah khan KIA Brigate 4, hmunhma le Brigate 10 hmunhma leiah SAC ralhrang le KU Kanh hriamtlai MNDAA karlak ah kahdohnak a fak ngaingai caah SAC ralhrang nih vanlawng zong a hmang tiah an langhter.
Ref: People’s Spring
