Kahdohnak A Fak Caah SAC Ralhrang An Zaam, Mipi Hriamtlai Nih An Thilri Pawl An Laak
Laykaykaw ah hmainawr in kahdohnak a tuah mi Council ralhraang an zaam than, an zaam taak mi hriamnam le thilri an laak. April 15, 2022, Karen ramkulh, Myawaddy peng, Laykaykaw ah KNLA le PDF phu komh hmainawr in kahdohnak a tuah i hnukir in a zaam than mi Council ralhraang pawl hriamnam le thilri cu nihin ah kan laak than tiah Cobra phu nih an thanh.
Cobra phu nih runven mi Laykaykaw hmunhma tlangbo hna cu council ralhraang nih chuh ding in hmai an rak nawr i, zahan zaan suimilaam 11:00 in zinglei suimilaam 3:30 tiang kahdohnak fak a chuak. Cobra nih hmunhma thianhnak an tuah i hriamnam le thilri an lak mi cu an rak tarlangh cang i nihin zaanlei ah hriamnam dang an lak than tiah kan theih.
An lak than mi hriamnam hna cu 60MM bomb thei 18, 81MM 1, RPG 4, zen bawm 3, 5.56 kuan 300, 7.63 sniper zenthong 100, ke lamh bomb 1, MA 1 zenthong bawm 9 kan lak than tiah Crobra phu nih an thanh. Credit; The Hakha Post
Relchap; Ayarwady ramṭhen, Maopin khuachung titoih puai tuahnak donhhlei ah nihin April 15 zaanlei ah puahkehnak a chuak i, hi kong he pehtlai in kum 10 tluk ngakchia pakhat telh in kum 18 tling rih lo mi ngakchia pathum cu tlaih an si, tiah palik he naihniam in a ummi pakhat nih a chim. CCTV a langh ning ah kum 10 tluk ngakchia pakhat le kum 17 ngakchia tlaih an si, tiah palik he naihniam in um mi pakhat nih a chim.
“Tlaih a tong mi ngakchia hna cu SAC ralkap nih Toeshwewa(တိုးရွှေဝါ) hall ah an hruai hna i, an hro hna, ngakchia nih zeibia an chim cu ka thei lo, midang tlai ṭhan ding in khuachung lei ah palik le SAC ralkap hna cu an kal,” tiah cu palik he naihniam in ummi pakhat nih Ayarwady Times ah a chim.
Maopin (မအူပင်) pengchung SAC ralkap nih titoih puai tuahnak donhhlei ah cun CCTV an bunh an si i, SAC ralkap sniper nih donhhlei hmailei in an ven hna, tiah tualchung mi nih an chim. The Chin Post
Relchap; Sagaing ramṭhen, Monyua khuapi lampi um Kaan Tharyar Tawng ah hlathlainak tuah ding in a kal mi SAC ralkap mawṭaw cu Myo Piah Pioh Kyua ralkap phuhnih fonh (မြို့ပြပျောက်ကြား တပ်ဖွဲ့ ၂) nih bomb an puah hna i, SAC ralkap a thi mi an um nain zeizat dah an thih cu fiang tein kan thei kho rih lo, tiah Generation Defense Force hna sin in theih a si. Bomb a puahtu hna cu Generation Defense Force ( GDF) Le Kani Army ( KNA ) an si, tiah theih a si.
Sagaing ramṭhen, Htee Cheih khuapi ah April 15 zinglei Sml 6 hrawng ah Muang Kone ( ေမာင်ကုန်း) in Fu phortu mawṭaw a cit mi SAC ralkap hna cu Tone Lung thlanhmun pawng ah mizapi vengtu ralkap hna nih bomb puah in an doh hna, bomb puahnak ah thi le hliam kong fiang in theih a si rih lo. Cu SAC ralkap hna citmi Fu phor mawṭaw bomb a puahtu cu Ko Tuang Kyua (ကိုးတောင်ကျား အဖွဲ့), Moe Ngeo (မိုးညိုအဖွဲ့) le Special 9-HPDF phufonh hna an si, tiah theih a si.
Magwe ramṭhen, Htee Lin khuapi ah April 13 ni ah khan PDF le SAC ralkap kahdohnak a chuak i, Cu kahdohnak ah meithal kuan nih a khen i a zaam mi ralbawi Nay Lyin Aung ruak cu hmuh a si, tiah khua mi hna sin in theih a si. Cu ralbawipa ruak cu nihin April 15 ah hmuh a si i, Htee Lin siizung ah chiah a si i, zinglei Sml 10:00 ah meikhangh in an vui, tiah theih a si.
