Press "Enter" to skip to content

Kahdohnak Ah Ralhrang An Thih Tuk Caah Helicopter Le Vanlawng Deuh In Ralkap Thazaang Hman Ai Tim

Kachin ramkulh, Hpakant peng, Manawhhmaw pawng kahdohnak ah ralhrang lei tatzinhmu le ralkap dang a za(100) in an thih caah ralhrang nih Helicopter in ralkap thazaang a chap, tiah tualchung thawngzamh KNG nih a langhter. Manawhmaw pawng kahdohnak ah Tatzinhmu le ralhrang 100 hrawng an thih cang caah tatzin ning in an zaam, tiah KUA thawngzamh nih a langhter fawn.

Ralhrang nih an ralkap thazaang chap ding in February 5 ah Helicopter 4 a hman i ralkap a rak ṭhumh hna, tiah theih asi. Ralhrang cu raltuknak i an sungh tuk caah Jet vanlawng hmang in mizapi umnak tinh in an kah hna i Pastor pakhat a nunnak liam i midang 3 hliam an tuar. Manawhmaw pawng ahhin ralhrang Kha-Kah-Yah 111 Tatzin le KIA Tatzin No. 44 an i kap i ralhrang lei hi an tatzin ning deng in an thi, tiah theih a si.

Tamu Ah Ralhrang Ngeihmi Inwa Bank Cu ABSDF Le PDF Phufonh Nih An Doh Hna I Ralhrang  2 An Thi; Sagaing ramṭhen, Tamu peng ralhrang phu hna ngeihmi Inwa Bank cu mizapi vengtu ralkap PDF-CEU le ABSDF phu hna nih February 6, zanlei ah kutcheh bomb he an doh hna, tiah PDF-CEU nih cathanh an chuah.

February 6, zanlei suimilam 5:00 hrawng ah PDF-CEU le ABSDF phufonh hna nih Tamu khuachung Inwa Bank hmai security hngaktu ralhrang phu umhmun chung ah kutcheh bomb in an doh hna caah ralhrang phu chungtel minung 2 an thi, minung 5 nih hliamhma an tuar tiah mizapi vengtu ralkap phu PDF-CEU nih an chim. ABSDF siangngakchia ralkap cu ralhrang phu hna he kahdaihnak min a thu mi an si ko, nain February 1, 2021 ah ralhrang phu hna nih hramhram in nawlngeihnak an laak caah ralhrang phu hna cu tlangcung hriamtlai phu hna nij doh an si, tiah ABSDF chairman Tan Khe nih a chim. CRD THE CHIN POST

Be First to Comment

Leave a Reply

Your email address will not be published.