Kalay-PDF Nih Min Aung Hlaing Ralkap 20 An Thah Hna, Mah Chungah Ralbawi An I Tel Chap

Kalaymyo Yeshin Kahdohnak Ah SAC Ralkap Ralbawi 3 Tel In Ralkap 20 An Thi. Sagaing ramṭhen Kalaymyo peng chaklei Yeshin (ရေရှင်) khuapawng ah April 22 i a cang mi kahdohnak chung ah SAC ralkap lei ralbawi 3 le pyusawthi hna tel in minung 20 hrawng an thi, tiah PDF Kalay nih April 23 ah an thanh.

Myitta (မြစ်သာ) tiva nichuahlei um mi Yeshin (ရေရှင်) khua ah ralkap 250 he rallam hmunthum a sial mi SAC ralkap hna cu PDF-Kalay, CDF-KKG, RKDF le pah-kah-phah (ပကဖ) phufonh nih an kahdoh hna. Cu kahdohnak chung ah cun tualchung hriamtlai phu in minung pakhat a nunnak a liam. SAC ralkap hriamngan kahnak in Yeshin (ရေရှင်) khua inn 9 an kang, tiah theih a si.

April 23 kahdohnak a chuahnak hmunhma cu PDF-Kalay nih hmunhma thianhhliamhnak an tuah lio ah SAC ralkap hriamthil 5.56 kuan 224, AP 95 Ozi kuan(အူဇီ) 61, Ozi (အူဇီ) kuanbawm 2, bomb lung 3, MA kuanbawm 4, phone pakhat kan laak, tiah an langhter chih. (Mai Anna Par Journalist), Credit; The Chin Post

Relchap; Ukraine Lviv Khualipi cu Russia Nih Missle in Kah Asi. Ukraine Nitlak lei ah aum mi an khuapi Lviv cu Russian nih Dungci in an kah cuahmah ko. Minung 6 atlawmbik an thih, Dungci pathum nih ralkap innlo an kah khawh tiah Lviv Khua Uk Maksym Kozystkiv nih achim.

Hmun kip ti ngawt in Russia nih bomb an thlak, Mipi i i chawk nak lampi kha abik in an kah. Mi cung ah zawnruahnak le thlachiat ruatnak a ngei bak lomi ansi. Ral he aa pehtlai lomi mipi kha hehchet tiah an kah hna. Mipi bawmhchan nak lampi vialte an pit dih. Mipi chanchuah tu an um lo tiah Vice PM Iryna Vereshchuk nih a ti. An twiter ah a tial mi asi.

Ukraine thlanglei Kherson Khuapi pakhat lawng hi Russia nih an uk khawh rih tiah Ukraine PM Denys Shmyhal nih a ti. Mariupul cu Russia nih lak an duh ngai ko nain an lak khawh hlei lo. Nunnak pek in Ukraine ralkap nih an dirhkam caah asi. Zarhte ni ah Mariupul ah Russia 4000 nunnak an lak tiah Ukraine nih an fek ter. Russia nih cun Russia athih mi vialte hi 2500 – 3000 lawng asi an ti ve. Crd; Joseph R. Thang

Relchap; “2022 cu daihnak kum a sinak kong le ram pumpi hriamtlaih buainak a daih khawhnak hnga a ṭuan lai tiah ka rak chim. Cu thil a tak in ṭuan khawhnak caah tlangcung hriamtlai hruaitu pawl he tonnak ngei ding in kan sawm hna. Tlangcung hriamtlai phu vialte keimah pumpak in kan ton hna lai. Cun, State Administration Council palai phu pawl he biaruahnak kan ngei lai.”

Asinain, atu bantuk Min Aung Hliang sawmnak cu anmah Ralkap nih tlaihmi TV (MRTV le MWD) in an thanh hnu tlawmpal ah Karen National Union (KNU) le Kachin Independence Organization (KIO) telh in Tlangcung hriamtlai phu (EAO) cheukhat nih an al colhnak thawngpang hun theih colh an si. Atu bantuk timhtuah a simi tonnak ah hin, tlangcung hriamtlai hruaitu pawl le chungtel pahnih kai ding le a kai dingmi cazin cu a hnubik May 9 ah thawngthanh ding in a biachimnak ah a telh chih. Kaphnih lei ṭha tein ceihkhan hnu ah tonnak a ni kan khiahte lai tiah a chim.

SAC in biachimnak nawl a ngeitu Major-General Zaw Min Htun nih cun ram chung in a rak kaimi caah himnak kan lakpiak hna lai. Ramchung khuazei hmunhma a si hmanh ah ralkap nih an umnak tiang kan don hna lai tiah RFA ah a chim. Pa-Oh National Liberation Organization (PNLO) a hruaitu General Hkun Okker nih cun, SAC nih a timhlamhmi thimnak hlan caan karlak daihnak caah rianrang in tuah a duh i thimnak tikah daihnak a len khawhnak hnga caah a tu bantuk in lam a kawl i a kan sawm hi a si tiah RFA ah a chim.

“Central in a tlaihmi a tamtuk. Committee pawl he an i ceih ahcun committee pawl nih an report kha a mah nih a zoh chin caah rian hma a kal lomi a tamtuk. Cucaah, a mah pumpak in a tuah ahcun rian hma a kal deuh lai tiah a ruah i si. Zeiruang kan ti a si ahcun, thimnak tuah ding aa timhmi hi thla kuahra lawng aa duh cang. Cucaah, a caan a ngeih chung te ah rianrang in biaruahnak a duh hi a si” tiah PNLO General Hkun Okker nih RFA ah a chim.

Karen National Union (KNU) ramdang lei riantlaitu Pado Saw Taw Ni nih a hlan i daihnak lam rian kan rak ṭuan lio kan zoh chih a si ahcun, SAC a thiltuah hi kan zum lo tiah a chim. “Daihnak hi kan duh lo a si bak lo. Asinain, daihnak timi cu kaa lawng in chim a ngah lo. Daihnak taktak he aa pehtlaimi thil sining pawl kha a langhter hmasa a hau. Cuti a langhter hmasa lo ahcun, a minung a rak langh zongah cohlan awk a ṭha lo.

Kan rak ton tuk cang. Daihnak kong he pehtlai in a chung tein rian kan rak ṭuan cang caah zeibantuk thil dah an tuah ti cu a hmebik tiang kan theih cang. Cucaah, kan mah nih kan chimi zulhphung an cohlan lo ahcun zeitin hmanh in thok khawh a si lai lo.” SAC hruaitu nih daihnak kong biaruahnak a duhmi hi ramdang nih a pekmi harnak ruangah tuah a timh sawhsawh mi a si tiah ramkhel lei thiamsang a simi Doctor Sai Kyi Zin Soe nih a chim.

“Atu bantuk a thiltuah hi ramdaihter ka duh ko tiah a langhter sawhsawh mi a si. Atu tonnak zong hi tlangcung hriamtlai phu pawl lawng a sawh duh hna. PDF, NUG le a dangdang a dohtu phu pawl an i tel lo. A sawh duhmi cu China nih a pekmi harnak, ramdang nih a phunphun in sual an phawt lioah daihnak lam ka tuah ko timi a langhter sawhsawh mi lawng a si.”

Min Aung Hliang nih NUG le PDF pawl a kahdoh hna lioah tlangcung hriamtlai phu pawl he kadohnak dirter chung ding a duh caah a si tiah Hluttaw palai hlun U Ye Htun nih a chim. Myanmar ram ah hramhram in uknak lak a si hnu ah a chuakmi buainak daihter khawhnak hnga caah zapi biaruahnak ngei ding in NCA phu nih an forhfial ve hna.

SAC biachimnak nawl a ngeitu Zaw Min Htun nih cun zeibantuk tlangcung hriamtlai phu pawl poah riikhiahnak um lo in biaruahnak ah tel khawh a si ko nain PDF le NUG he biaruahnak a um lai lo tiah a chim. Kahdaih biaruahnak he pehtlai in tlangcung hriamtlai phu pawl cu SAC nih atu le atu sawmnak a tuah ko hna nain General Min Aung Hlaing nih amah pumpak kan ton hna lai a timi hi a voikhatnak a si.