Kan Dothlennak Ah I Hnawhhnam Tuk Hlah Usih! MAH nih CNA/F cu zei hmanh an si loh, tiah nehsawh tlanglamh in Media hmai ah a rak chim

Kan Dothlennak Ah I Hnawhhnam Tuk Hlah Usih! MAH nih CNA/F cu zei hmanh an si loh, tiah nehsawh tlanglamh in Media hmai ah a rak chim khuapau dothlennak ahcun CNA/F hi ai buaipi bik cem mi ah a hung cang.

A tu ah India cozah nih ralhrang kutneh kha ai theihter loh Vawleipi ka hlen khawh hna lai tiah ai ruah. Vawleipi hmai ah a aukhuang kho Chin mi kan um a ral hngal lo. Cu lawng hlah a tu Kalantan Project pi khi a lung khan in a kal kho ti loh. An kan nek an kan zawmhtaih mi kha kan nih Chin mi ca ahcun thazaang laknak a si. Kawl chia hru le Kala nak nih Chin ram ah hmun an ngei lai loh. Ram a that tik ahcun khi Project pi kong ah nawl ngeitu cu Miphun ralkap, miphun dawtu ramkhel phu an si ko lai.

Ral kan thawh hi tampi sunghnak kan tong nain ramkhel thanghphawhnak ah tampi kan hlawk ve. Kachin cu e, Karen cu e ti ding a si ti lo a tu cu kan caan a phan cang. Lungkhat in dir caan a si. Lung tuk zong in kal lo ding.

A tu kan ral hi a dih colh lai loh hih, cu caah i hnawhhnam tuk lo a biapi. Hruaitu hna zong nih mipi lunglak nak men ah nak men in biachim hi i ralrin ding a si. Na chim mi bia kha a tlin lo tikah kutchu tuh a fawi te. 2021 ah tukum hrimhrim ah kan tei lai timi upa bia tam ngai a leng. A si tak lo a tu tiang. Kawlram thil sining dothlennak caan sau a rauh rih lainak hi fiang pup in chim ah a tha mizapi zong kan lung a dong hlei lai loh.

Kan mah Chin mi bantuk in dothlennak tlang a rak au mi Karen, Kachin, Shan le a dang tlang cung mi kan nu le kan pa hna chuah hlan in dothlennak an tuah nihin tiang. Kan mah Chin mi zong kan dothlennak hi a dihnai rih lai lo caah lungsau ko hna usih. Cu caah dothlennak lio ahcun i fim kan a hau. Credit; Tler Lung

Relchap; Dohthlennak Ruangah Pa Le Fa, U Le Nau An I Ṭhe “Nan ka hmuh hmasa ahcun ka kap u, kan hmu hmasa hna ahcun kan kah ve ko hna lai”. A cunglei biatlang hi hringtu a pa nih SAC ralkap a simi a fapa sinah phone chungin a chimhmi a si.

Feb 1, 2021 ah ralkap nih hramhram in nawlngeihnak an lakmi duh loin hriamtlaih in dohthlennak a tuahtu hna sinah Bo Cakei Hrang (ဗိုလ်ကျားရိုင်း) zong a lut ve. Cuticun an chungkhar cu hmunhnih ah an i ṭhen. A ruang cu a fapa pahnih hna cu SAC ralkap an si.

“Hringtu kan pa a si tiin nan ka zuah khawh men, asinain kei cu kan zuah hna lai lo” tiah ramlak thingkung tangah a ṭhumi Pu Cakei nih a fapa cu phone chungin a chimh.

A ngaingai ti ahcun a fapa pahnih hna hi amah nih a fial hna ruangah ralkap a rak lutmi an si. A u deuh hi cu a pa nih phone a chawnh zongah a tlai ti lo. A pa nih cun a fapa ngakchia deuh sinah SAC ralkap an sual ning le thilṭhalo an tuahmi vialte a chimh nain a fapa nih SAC ralkap an ṭhatnak kongin a leh. Pu Cakei nih cun a fapa pahnih cu SAC ralkap chuahtak in dohthlennak ah i tel ve dingin a chimh lengmang hna. Asinain a bia an ngai duh lo.

Ka bia an ngaih duh lo caah kan i ton ahcun i zaangfahnak um loin kan i kah a hau ko ti cu Pu Cakei biakhiahnak a si. Pu Cakei nih fanu/fapa 8 a ngeih hna i a fapa pahnih cu SAC ralkap ah ralbawi an si. Ram a buai hlanah cun fapa pahnih ralbawi an simi cu an mithmai a hngal i an i lungsi fawn. Asinain cu vialte cu ram a buai hnuah aa thleng dih ai.

SAC ralkap ṭhatlonak vialte a hmuh tikah Pu Cakei cu a lungfak, a thin a hung i a fapa pahnih hnuchit in PDF ah a lut. Ram a buai hlanah cun Pu Cakei cu lothlo sawhsawh a si i meithal zong a tlai bal lo. Asinan atu cu an umnak PDF ah hruaitu pakhat a si cang.

A hruaimi PDF min cu Wild Tigers ti a si i chungtel 70 hrawng an um. Asinain meithal zun 3 lawng an ngei. A fapa dang pali cu amah he PDF ah an um ve. SAC ralkap a ṭuanmi a fapa pahnih hna zong Pu Cakei te umnak (sakhan) he meng 30 hrawng lawng aa hlatnak ah an um ve.

 

Nikhat cu zinglei 3:00am hrawngah an pawngkam khua pakhat nih Pu Cakei hruaimi PDF sinah phone an rak chawnh hna i SAC ralkap nih an kan luhhnawh caah kan bawm zok ulaw tiah an nawl hna.

Wild Tigers nih cun rianrang in an fuh colh hna. Asinain an kalnak lam ah an rak bawh hna i fak ngai in an i kap. Hriamnam an i thlau tuk caah Pu Cakei le a hawile cu hnu an tolh ṭhan. Kahdohnak a dih hnu tlawmpal ah SAC ralkap nih PDF 15 kan thah hna tiah an thanh. Cu chungah cun Pu Cakei fapa pakhat zong aa tel. Cu hlan deuh ah Pu Cakei te khua cu SAC ralkap nih an khanghpiak hna.

Pu Cakei nih cun SAC ralkap a ṭuanmi a fapa cu a chawnh i “Nanmah uico rual ruangah kan khua zong vutcam ah a cang dih cang, kan inn zong a ciam viar cang. Na upa zong a thi i a ruak hmanh kan la kho lo” tiah lungfak ngai in a chimh. Cu hnuah ralrin peknak bia a cah i phone a chiah.

“Kahdohnak ah kan i ton a si ahcun ahohmanh kan zuah hna lai lo, kei cu mipi mithmai lawng ka zoh lai, nanmah mithmai ka zoh lai lo”. Biahalnak: Kan ram a ṭhatnak dingah chungchuak fale tiangin hnu an chit cang! Nang lei kei nih kan ram ṭhatnak caah zeidah kan tuah khawh ve cang? A cunglei tuanbia hi phuahcop a si lo i Wild Tigers hruaitu chungkhar tuanbia a si. BBC Burmese nih a ṭialmi kha a tawifiannak in ka lehmi a si. By- Salai CP Lian