Good News! kan Ralkap Hna Nih SAC Ralkap Minung Tam Tuk Lawmmam An Thah Hna, Meithal (7) An Lak
Bago ramṭhen, Yetashi peng tualchung mi hna thilri a chut i rallam sialtu SAC ralkap hna cu an kir lei ah kahdoh an ton caah SAC ralkap 30 leng an thi i meithal 7 le hriamthil dang telh in an firmi sui le phone hna kan laak tiah Taungo pengkomh PDF nih an thanh.
February ni 16, zinglei suimilam 9:00AM in chunhnu suimilam 1:00PM tiang ah Bago ramṭhen Taungo pengkomh PDF battalion 3501, ṭatkhuai 4, ṭatkhuai 6 phufonh le SAC ralkap kar Yetashi peng Zayitkone khua le Laittho peng Peintila khua ni tlaklei ah kaphnih kar kahdohnak a chuak. Cu kahdohnak ah cun SAC ralkap 30 leng an thih pin ah hliamhma fak tuar an tam tiah theih a si.
SAC ralkap sin in laakmi meithal le hriamthil hna cu MA 3 pali, MA 11 pahnih, MA 2 pakhat, kuanbawm 18, kuanfang 520, 60mm bomb lung hnih le riahcaw tampi hna an si.
A thimi SAC ralkap sin in laakmi thilri hna cu; suikuthrolh 2, suiṭhi 1, kutdong hrolh 1 le phone lung 3 hna an si. Cu an laakmi sui le phone hna cu a ngeitu sin ah pek ding in timhtuahnak an ngei tiah theih a si. Khit Thit Media
Adang; Myanmar ram pumpi huap February ni 18, nikhat chung ah SAC ralkap 58 an thi tiah theih a si. SAC ralkap a thimi zat cazin langhtermi cu tualchung hriamtlai phu hna nih cathanh chuahmi le an chimning zohchih in le khomhsuat in Khit Thit Media nih a langhter.
February ni 18, nikhat chung ah SAC ralkap lei a thimi hi Sagaing ramṭhen in 51, Mandalay ramṭhen in 5 le Magway ramṭhen ah 2 tiin nikhat chung ah SAC ralkap 58 an thi. Magway ramṭhen ah PDF chungtel 2 an nunnak a liam tiah an thanhmi cazin ah an langhter. TCP
SAC kuttang ah a ummi Myanmar A Lyin thawngzamhnak nih 2023, February ni 18 chuahmi ca chung ah “sualpalhnak a ngei lomi PDF chungtel hna cu an chungkhar sin ah kalter an si” tiah tlangtar in CDF Matupi chungtel SAC sin ah an i fon tiah an langhter.
“Hi thil an thanhmi hi a lem menmen a si, kanmah lei ah hriam chiah riangmang in anmah sin ah aa fonhmi pakhatt hmanhh kan um lo” tiah CDF-Matupi in ṭuanvoo ngeitu pakhat a simi Naing John Kim nih a chim.
“Sualpalhnak a ngei lomi Sagaing ramṭhen Tamu peng, Shwebo peng, Magway ramṭhen Pakokko peng le Pauk peng, Chin ramkulh Matupi peng in PDF le CDF chungtel pa 6 le nu 1 tiin minung 7 cu min kan thutter hna hnu ah bawmhchanhnak thilri pek in an chungkhar sin ah kan kalter hna” tiah Myanmar Alyin thawngzamhnak nih cun a langhter.
Myanmar Alyin nih an thanhmi ca chung ah cun Matupi peng in CDF chungtel minung zeizah an si le mizei an si fiang tein a langhtermi a um lo. Zalen
Sagaing ramṭhen, Kanbalu peng nichuahlei ah SAC ralkap nih February ni 16 in 18 tiang nithum chung rallam sial in hmunhma thianhhlimhnak an tuah caah khuate khua 22 in tualchung mi 20,000 leng ralhrial dirhmun an phan tiah tualchung mi hna nih an chim.
Kanbalu peng khua 22 ah chungkhar 4,775 an um i milu 23,875 cu a himnak hmunhma ah an tlizaam hna tiah tualchung mi pakhat nih a chim.
SAC ralkap khuachung an luh paoh ah cun tlik le zaam lawng kan rian ko tiah Kanbalu peng Maetae khuami pakhat nih a chim.
“Ni hra chung ah nikhat hi cu tlik le zaam lawng kan rian ko, tualchung mipi kan har tuk hringhran cang” tiah a chimchap.
February ni 18, zanlei ah rallam sialtu SAC ralkap an kir caah cheukhat tualchung mi hna cu February ni 18 zan ah an umnak khua cio ah a kirmi zong an um tiah a chim. RFA
Chin ramkulh, Mindat peng chung ah SAC ralkap nih a ruang um loin hriamngan a kah caah tualchung mi hna thilri an rawk ngai tiah CDF-Mindat battalion 4 nih a langhter.
February ni 18, chunhnu suimilam 2:35PM in 3:10PM tiang Mindat battalion 274 in Mindat peng Mashiyaw khua komh Wam khuachung tiang hriamngan hmang in voi 10 tiang kahdohnak an tuah caah khuami hna cu a himnak hmun ah an i dor hna, tualchung mi hna an umnak inn zong a rawk ngai tiah theih a si.
A luancia January ni 22, zaan suimilam 12:00 hrawng zong ah Mindat peng Chinland Defence Force – Mindat umnak sakhan cu SAC ralkap jet fighter nih voi hnih tiang kahdohnak a rak tuah caah hriamthil le thilri zeimawzat a rak rawk tiah CDF-Mindat nih an rak langhter bal cang. Khit Thit Media
