kan Meithal Kuan A Dih Zongah Lai Meithal In Ralhrang Cuh Kan Doh Hna Lai
SAC ralkap nih Chin ram Kanpalet peng lei ah thazaang chap in rallam an sial i CDF- Kanpetlet nih kuanfang an ngeih tuk ti lo caah phetchem deuh in SAC ralkap cu an kah hna, tiah theih a si. “Kan kuanfang a dih cikcek si zong ah kan ngeihchun Thelpak(Lai meithal) in kan doh ṭhiam hna lai” tiah CDF Kanpalet Brigadier nih a chim.
“Atu hi kan ngeihchun hriamnam tein kan doh hna, sinain meithal kuanfang kan chambau ngai cang. Hihi ralvennak ah a har bak mi pakhat a si i, SAC ralkap zong nih zeibantuk timhtuahnak he Kanpalet lei ah thazaang chap in an kan fuh ti kan hngal lo. Sinain kan meithal kuan a dih zong ah Lai meithal te zong in kan doh peng ṭhiam hna lai,” tiah a chim.
SAC ralkap pawl cu Chin ram, Kanpalet peng le Magwe ramṭhen ramri Kyauhthuh lei ah ka 3 in rallam an sial caah March 4 ahkhan CDF kanpalet he an rak i kap i, SAC ralkap 7 an rak thi. “CDF-Kanpalet Battalion pakhat umnak lei ah SAC ralkap nih ka 3 in rallam an rak sial i kan kah hna caah anmah lei 7 an thi, Kanptlet khuapi panh in an ra thluahmah lio,” tiah a chim chih.
Febuary 28 zong ah Kanpalet peng, Masatuai khua le Saw peng Suailuaicin khua kar ah SAC ralhrang le CDF- Kanpetlet an i kap i SAC ralkap 10 an thi. Miruak hna cu an hawile nih lamkam thlam pakhat chung ah an pumh hna hi thlam he an khangh chih colh hna, tiah CDF Kanpetlet nih an cathanh ah an rak langhter.
SAC ralkap hna le CNO/CNDF kahdohnak February chung ah voi 5 a chuak i, SAC ralkap 41 an thi; midang 50 hrawng hliam an tuar. CNDF ralkap 2 an nunnak a liam ve, tiah CNDF nih cathanh an chuah. Chin Mizapi ralkap le SAC ralkap kahdohnak cu Chin ramkulh, Falam peng le Sagaing ramṭhen, Kalay peng hna chung ah a cang, tiah theih a si.
February 7 ah Kalay peng ah kahdohnak a chuak i SAC ralkap 12 an thi, 6 hliam an tuar. CNDF ralkap pakhat a thi. February 11 ah Parte khua ah SAC ralkap le CNDF karlak kahdohnak a chuak ṭhan i, SAC ralkap 5 an thi; pa 7 hliam an tuar. February 12 ah Hteen Soe sakhan kahdohnak ah Chin Mizapi ralkap bomb nih SAC ralkap a hliamh hna i, 3 an thih lengah 10 hliam an tuar, tiah theih a si.
February ni 13 ah Falam khuapi hmun pakhat ah CNDF ralkap pakhat bomb lamhsual ruangah a nunnak a liam. February 25 ah Hteen Soe sakhan ah kahdohnak a chuak ṭhan i SAC ralkap 10 an thi; midang 11 hliam an tuar. Lung Yan veng le Ṭaal khua karlak February 28 ni kahdohnak ah SAC ralkap 11 an thi i tamlakte hliam an tuar, tiah CNDF nih cathanh a chuah. February 7 Kalay peng chung kahdohnak le February 28 Lung Yan ( လုံးရန်) veng le Ṭaal khua karlak kahdohnak hna ah CNA le mizapi vengtu ralkap an i bawm hna, tiah theih a si.
