Kan pale tampi nih Israel miphun ral an tei nak le an ralthatnak lawngte an chim tawn i zumh sual a fawi ngai

Moses nih cun a ral kha tei ding le tei lo ding a tuaktan hmasa, Joshua bel ai chuahsual. Kan pale tampi nih Israel miphun ral an tei nak le an ralthatnak lawngte an chim tawn i zumh sual a fawi ngai. Ral an sunghnak le an ral an ngamh tuk sual caan ah zohchia in an i chuahsual a tampi ve timi theih a herh.

Moses nih kamhmi ram Canaan kha lakhruak in a luh hnawh lo. Spy 12 a thlah hmasa hna i an ral thazaang le fawi tein tei awk an tha maw timi kha ni 40 chung an zohfel hmasa. Spy 10 nih tihnung tuk rih, an ralkap tei awk an tha rih lo tiin ruahnak an pek caah hruaitu tha a si bantuk in Canaan ram cu rianrang a lak lo kha a si.

Ram car ah harnak phun kip tuar buin kum tampi timhtuahnak an rak ngei. Moses a thih hnu lawng ah Joshua nih kamhmi ram a luhpi hna kha a si. Joshua zong raltuk a thawn tuk caah ral a sung kho lo ding phun in ai ruahsual bal ve. Ai timi khua kha ralkap thawng an ngei lo, fawi tuk in kan tei ko lai tiah a ngamh tuk sual. Timhtuah nak tha a rak ngei lo, ai ralring lo.

A ralkap tlawmpal lawng a thlah hna i Ai khua cu an tuk, nain Ai khuami nih an thuat ciammam hna i Joshua ralkap cu zamnak hmanh an rak thei lo. Tampi an thi. Zohchia taktak in an sung. Cuti zohchia tuk in an sungh hnu lawng ah Joshua cu a ngaihchia tuk i vawlei ah bawh in a mitthli he Pathian sin ngaihthiam a hal than kha a si. By- Salai Lung Thli Tum